[地鐵&生存]打機玩得extreme，呢個生存遊戲我都要玩extreme: CH.4 Bouns Stage - 攝影
行刑過後，A繼續宣佈：
「大家都見到，我地嘅工作人員華麗嘅行刑技術，係咪好興奮呢？所以，唔好再嘗試挑戰我地。
而家係八點半，我諗大家都肚餓，為左獎勵各位成功過關，我地已經為大家準備好晚餐。
大家可以放心食用，我地有充足嘅食物供應，我地亦唔會落毒，因為睇你地自相殘殺先夠刺激！」
A剛宣佈完畢，另一批黑衣蒙面人從四面八方進入車站，推著餐車，食物的種類多得如自助餐一樣。
而刀手蒙面人們則快速地清理現場。
「強叔！快啲黎啦！有野食呀！嘩！仲有魚生，痴撚線！」阿發興奮的說。
「咩話？魚生？有冇生蠔呀？」
「乜都有呀，快啲黎揀啦！」
阿謙走到餐車前，盛了一碟福建炒飯，坐在地上慢慢吃起來。
「安全啲好，如果唔係到時肚痛就仆街。」
同樣謹慎的，還有Ciro，他只拿了一條法國長麵包和一支樽裝水。
「又整得幾好食，仲好食過酒店，嘻！」
而徐銘驊，把一大件芝士蛋糕塞入嘴裡。
「係大家享用緊晚餐嘅時候，等我講解一下第二回合嘅遊戲啦，第二回合嘅遊戲，係bonus stage，你地唔會有任何傷亡，只有獎勵。
呢個遊戲就係估地方啦，二十分鐘後，我地會send一張圖片比你地，呢張圖片係你地所屬車站嘅一個地方。
你地要搵出呢個地方，然後影返一張一模一樣嘅相出黎，影相機會有三次，如果三次都影唔岩，咁就冇辦法拎到獎勵啦。
成功影岩相嘅人，你地可以率先拎到第一個獎勵，就係可以去另一個車站玩埋另外一關同埋獲得新車站嘅使用權。
例如，如果你係東鐵線大圍站嘅乘客，你可以揀去沙田站或者九龍塘站是但一個站，但唔可以去車公廟站，因為唔同路線。
同樣地，如果你係馬鐵線嘅大圍站乘客，你就冇得揀啦，只可以去車公廟站玩。
第二關同樣過關嘅乘客，你地會再獲得多一個獎勵，呢個獎勵而家暫時唔透露比大家知，但對你地玩第三回合會有極大優勢。
另外，第一回合贏出嘅將軍澳線乘客，你地將會自動進入第二回合第二關，可以即時選擇新車站進行遊戲，而且可以早五分鐘開始遊戲。
而康城站嗰位第一名完成第一回合嘅乘客，我地私人再追加多一個優勢比佢。
佢而家已經乘搭緊我地嘅專用列車去緊將軍澳站，十五分鐘後直接係將軍澳站進行遊戲，連搭車時間都慳返，唔知佢可唔可以再次拎到第二回合嘅第一名呢？
好，請繼續享用你地嘅晚餐時間，遊戲二十分鐘後開始！」
十五分鐘後，將軍澳線的乘客開始進行遊戲，受益於第一回合，他們的氣勢變得愈來愈好。
「真係唔公平 ...」身處美孚的阿謙不忿的說：「不過，而家距離錦上路站又近一步 ... 呢個回合一定要成功！」
他吃完炒飯後，死死的盯著手機頁面。
「快啲send圖比我啦 ...」
五分鐘後，他準時收到圖片。
他打開信息查看 ...
「屌！仆你個街，點搵呀！」
這是一幅全白的圖片 ...
「成個站都係白色，張圖又淨係得白色，搵條毛呀？」
同樣情況的，還有徐銘驊，他收到的是一張全紅方格圖片。
「屌！玩野咩！」
可是，Ciro卻對著照片大笑。
他的圖片，其實同樣全是紫藍色方格。
他隨意走到牆上，在不同位置同時照了三張紫藍色方格圖片，一次過提交。
「鈴 ...」手機傳來回應。
「恭喜，閣下已完成第二回合第一關，請選擇前進車站：
杏花村站或西灣河站。」
「電腦始終係電腦，一次過分析差唔多嘅野特別慢，博懵呢家野邊難到我？咁又過一關。」
他按著手機 ...
「一於搞掂左杏花村同柴灣先，然後再掃出去！」
他選擇了杏花村站後，走到往柴灣的月台，未幾，一輛只有三卡的列車到達，他走上車，靜靜的坐下。
阿發和強叔方面，情況好像較輕鬆，他們獲得的圖片，分別是一個黑色A字和一個白色B字。
「咁之係點？」強叔問阿發。
「要影一張同呢張一樣嘅相出黎。」
「白色嘅B字，係咪出口嗰個呢？」
強叔走到B出口，對著其中一個指示牌照了一張相片。
「咁樣？」他再次詢問。
「係 ... 係掛，我都唔知呀，呢度附近都有好多B字 ...」
「試下先 ...」
強叔把照片上傳 ...
「鈴 ...」信息傳來。
「圖片錯誤，閣下尚餘兩次機會 ...」
「哎呀 ...」
此時，他倆身邊一名年約10歲的小男生高興的跳起來。
「個細路咁開心，好似過左關。」阿發指著他說。
「不如去問下佢？」
「都好 ...」
他們走到小男生身邊。
「小朋友，你係咪過左關呀？」阿發有禮貌的問小男生。
「係呀，你睇下。」天真的小朋友把手機遞給他們。
「咦？咁嘅？」阿發看著圖片思考。
小男生的圖片，是一張清晰的B2出口指示牌圖片。
「小朋友，點解你張相咁清楚嘅？」阿發再問。
「呢張相放大左嫁，嗱，咁樣 ... 再咁樣 ... 我本身張相係咁樣嫁。」
小男生三兩下，將圖片變成只有啡黃色。
「啊？」阿發好像明白了甚麼似的：「原來係咁，唔該晒你呀小朋友，係呢？你過左關，諗住去邊個車站呀？」
「梗係樂富啦！樂富站細過呢度咁多，一定仲易搵，哈哈！可以係地鐵玩遊戲，真係好玩。」小男生一蹦一跳的離開。
天真無邪，往往隨著成長而消失得無影無蹤。
阿發依照小男生的提示，同樣的試圖將圖片放大縮小 ...
「我明啦 ... 嘿嘿 ...」
同樣發現這個「方法」的，還有阿謙。
他已將圖片還原，由白色一片變成西鐵線月台的一角。
「呢個game，真係少啲腦汁都唔得 ...」他照了一張相片，然後上傳。
「鈴 ...」
「恭喜，閣下已完成第二回合第一關，請選擇前進車站：
荃灣西站或南昌站。」
「咁當然係 ...」
一分鐘後，一列五卡的列車，駛入往屯門方向的月台。
他走上車 ...
「荃灣西站，出發，goal！」
他發現車廂內還有四人。
「原來唔止我一個 ...」他心想。
此四人分別是一對老夫婦，一個中年白領男人和一個毒男。
「等埋呀 ...」車站正在關上的一刻，一個女生成功衝進車廂，辛苦的喘氣。
「啊？」
阿謙打量著女生的長腿，黑絲襪和熱褲令腿部線條更突出。
女生年紀跟阿謙相約，均是二十出頭，臉蛋十分可愛。
「你冇事呀嘛？」阿謙關心的問。
「冇 ... 冇事 ... 呼 ...」女生坐在阿謙身旁的坐位，仍在大口的喘氣。
「你都過左關呀？」
「係呀 ... 個遊戲真係好難呀 ...」
「但你都過到呀，係喎，我叫阿謙，點稱呼呀？」
「阿琳 ... 蔣慧琳 ...」
「阿琳你好。」
「嘻嘻，你好呀，係喎，你住荃灣嫁？」
「唔係呀，做咩咁問？」
「咁點解你搭呢條線嘅？」
「唉 ... 我只係想快啲玩完呢個遊戲返屋企 ...」
「你住西鐵沿線？」
「係呀 ... 我住元朗嫁 ...」
「原來係咁 ...」
「既然大家都去荃灣西，不如我地一齊解埋第二關啦，多個人多個腦諗，應該會快啲過到關。」
「可以呀。」
阿謙得到了阿琳的加入，他們往後的情況能變得更順利嗎？
Ciro到達杏花村站。
他步出列車，細心觀察車站的環境。
他雖然住在筲箕灣，但人生往杏花村或許不夠五次。
「嗯 ... 人唔算多 ...」
車站的人數同樣不太多，但他們分成一個個小組，東照照西拍拍的，應是仍未完成第一關的本站乘客。
「鈴 ...」手機傳來信息。
「擁不擁有也會記住誰，快不快樂留在心底裡 ...」信息只有一句話。
「屌你個嘴，人來人往？搞事呀？」
「人來人往咪呢度囉！」一個肥師奶插口。
「下？」Ciro被外來聲音嚇一跳。
「呢度呀。」
他依著師奶的指示來到一個藝術品前 ...
「原來佢就係人來人往 ... 嘿嘿 ...」
他分別在藝術品正面和側面照了兩張相片。
「最後係 ...」
他在藝術品告示版的標題「人來人往」照下第三張相片，再一次上傳。
「鈴 ...」
「恭喜，閣下已完成第二回合第二關，請返回據點車站拿取獎勵。」
此時，廣播器播出：
「睇黎呢個回合嘅遊戲真係考起大家喎！不過我宣佈，已經有第一位乘客完成第二回合啦！
呢位以港島線筲箕灣站為開始據點嘅乘客，恭喜晒你，你係第三回合將會有一個極大優勢。
港島線嘅乘客，受益於第一名，你地係第三回合亦會有一個起始優勢，其他乘客要加油呀！」
Ciro奸笑了一下。
他回到往堅尼地城的月台，登上列車回到筲箕灣站。
「估唔到有個白痴幫我，真順利，仲要拎埋第一。」
他回到筲箕灣站後，一位黑衣蒙面人等待著他。
「呢樣，就係你係第三回合嘅獎勵。」蒙面人把一個小紙盒交給Ciro後離開。
他打開盒子 ...
「原來係咁 ... 呢個game睇黎愈黎愈好玩 ...」
盒子內，是一把蟒蛇左輪手槍，還有18發後備字彈 ...
看來，遊戲將變得愈來愈殘忍 ...
已到達荃灣西站的阿謙和阿琳，離開月台到達大堂，剛好聽見廣播。
「今次到筲箕灣站 ... 上一回合就新界東，而家就港島東，東區啲人勁咁多嘅 ...」阿謙倒抽一口涼氣。
「下？」阿琳不解。
「睇下先 ...」阿謙沒理會阿琳，打開手機頁面重新查看一遍。
繼筲箕灣站後，原來再多四人完成第二回合遊戲：
第二回合結果：
第一關完成人數：461人
第二關完成人數：4/30000人
各線路第一名：
港島線 - 開始據點 - 筲箕灣站
將軍澳線 - 開始據點 - 康城站
東鐵線 - 開始據點 - 上水站
迪士尼線 - 欣澳站
「第二關寫住三萬分之四，應該只係得頭三萬人完成先有獎勵 ...」阿謙說。
「係喎，」阿琳看著阿謙的手機，點頭表示同意：「換言之，已經有三萬人完成到第二關，就算之後再有人完成到，都唔會有獎。」
「冇錯，所以我地要快手啲，仲有，而家完成左第二關嗰四個人，康城站同欣澳站嗰兩個好大機會就係第一回合贏嗰兩個人，呢啲人一定唔惹少。」
「鈴 ...」他倆的手機同時傳來信息，打斷了對話。
「荃灣西站 ... 荃灣站 ... 荃灣西站 ... 荃灣站 ...」
「下？之係點呀？」阿琳看著信息，完全摸不著頭腦。
「荃灣西站 ... 荃灣站 ...」
「你做乜同個信息一樣嫁！」
「我諗緊 ... 比少少時間我 ... 荃灣西站 ... 荃灣站 ... 有咩共通點呢？」
「都係紅色囉！」
「又好似係喎 ... 咁佢地又有咩唔同呢？」
「一個多個西字一個冇囉，一個係荃灣線一個係西鐵線囉！」
「仲有冇？」
「呀 ...」阿琳突然按著肚子：「等我一陣 ... 肚痛 ... 廁所 ...」
她飛快的跑向洗手間 ...
「荃灣西 ... 荃灣 ... 廁所 ... 荃 ... 荃灣站冇廁所，荃灣西有 ... 有啲野有，有啲野冇 ... 會唔會係講緊呢個站冇左嘅野？」
阿謙等待阿琳上洗手間的時間，快速走了荃灣西站一遍。
「我知啦 ...」
徐銘驊，再一次受到打擊 ...
他的士氣已降至冰點 ...
早早用光三次照相片的機會，他只好在中環站內等待，再等待 ...
「冇可能嫁 ...」
完成第二回合的人數不斷上升，他的失落感變得更大。
「點解 ... 我明明係社會上流嘅人 ...」
社會上流的人，真的全都是尖子嗎？
「搞掂！喂，過上環囉！」兩個青年在徐銘驊身邊走過，他們剛完成第一關。
「你岩，金鐘一定逼爆！Go！」他們是港島線的乘客。
「廢青都過到 ... 點解我過唔到呀！」他咆哮，臉上充滿怨氣。
----------
阿發和強叔，正乘坐往樂富的列車。
「阿發，點解揀樂富？」
「因為樂富站細過鑽石山站囉，搵都搵得方便啲呀嘛，好彩頭先撞到嗰個細路，如果唔係真係有排搞。」
他們到達樂富站後 ...
「好，我地快啲過埋佢，第二關已經有萬幾人搞掂左啦！」阿發乘扶手電梯到大堂。
樂富站的面積很小，人數雖不多，但感覺很擠。
「鈴 ...」
「請回想橫頭磡的鬼故事，你一定有所啟發。」
「下？鬼故？」
「阿發，以前有人話橫頭磡係日本仔打香港嗰陣嘅刑場黎嫁！」
「哦 ... 咁會有咩啟發？」
「呢個站同鬼故嘅關係 ... 阿發，知唔知邊個出口近橫頭磡呀？」
「下？樂富唔係橫頭磡範圍咩？」
「橫頭磡 ... 樂富 ...」
正當他們思考之際，一個年約三十的男人拿著一把膠刀拍照。
「橫頭磡 ... 刑場 ... 個男人拎住把膠刀影相 ... 強叔，你估會唔會同武器有關？」
「有可能 ...」
「咁之係嗰個男人解緊第二關啦，強叔，快啲搵下站頭入面會唔會武器或者利器啦，呢個可能就係答案！」
「恭喜，閣下已完成第二回合第二關，請返回據點車站拿取獎勵。」
「嘩，阿謙你好叻呀！」
「我都係博下，估唔到咁都博得中，哈哈 ...」
阿謙照的相片 ... 是地鐵路線圖上的 ...
美孚站。
「但我唔明 ... 點解係美孚站 ...」阿琳追問。
「荃灣西站同荃灣站雖然都係荃灣範圍，但相隔好遠，行路差唔多十五分鐘路程。」
「係呀，但有咩關係？」
「如果你係荃灣千色店，要去屯門嗰邊，當然係去荃灣西站啦，但如果你係去九龍方向，就唔同講法。
假設你係荃新天地，要去深水埗，比著我，我一定去搭西鐵，而唔會行一大段路返荃灣站再搭。」
「如果唔搭其他交通工具，都岩嘅。」
「所以，荃灣西站同荃灣站，最大分別除左位置之外，乘客要去嘅路線亦係一大決定因素，呢個因素就係轉線站，而兩條線嘅交集點，就係美孚。」
「好似好深咁，唔係好明。」
「唔明都唔緊要，重點係過到關呀嘛，我地返去拎獎勵啦。」
「好。」
「呀，仲有，我地拎完獎勵之後，要即刻返黎。」
「點解呀？」
「我嘅直覺話我知，美孚站會變得好危險 ...」
----------
「恭喜，閣下已完成第二回合第二關，請返回據點車站拿取獎勵。」
「阿光，多謝你把膠刀，哈哈！」阿發說。
「唔洗，你地都幫左我解呢關。」
阿光，就是那個拿著膠刀比劃的男人。
「橫頭磡，既然係以前嘅刑場，自然會有好多斬首場面。」阿發變得愈來愈自信。
「所以你就拎把膠刀影斬頭自拍。」強叔補充道。
「冇錯！」
「阿發，我覺得你而家唔差得過阿謙。」強叔稱讚阿發。
「哈哈！我都覺，可能係呢個遊戲激發左我呢方面嘅才能。」
「咁我地返去黃大仙拎獎勵啦！」
「咁我都返九龍塘拎獎勵，一陣返黎呢度集合啦！」
「OK，分頭行事。」
阿發和強叔也得到了新同伴，阿光。
阿光 - 開始據點 - 觀塘線九龍塘站