[地鐵&生存]打機玩得extreme，呢個生存遊戲我都要玩extreme: CH.5 線路的精英
未幾，A的聲音再次由廣播器播出：
「大家開始投入遊戲啦喎，真係開心，而家做少少簡單嘅宣佈：
第二關已經有三萬人完成啦，所以第二回合遊戲將會係三十分鐘後完結，未完成第一關嘅朋友或者未拎獎勵嘅朋友要快手啲啦，時間唔等人。
另外，而家已經接近夜晚十二點，可能大家會因為呢個遊戲而冇左睡意，
但為左令大家可以精精神神咁參與落去，第三回合遊戲完左之後，大家會有一個七個鐘嘅休息時間，而第三回合將會係第二回合完結之後即時開始。」
「仆你個街，我唔覺得過左第三回合之後有人訓得著囉 ...」阿謙語氣帶有極大的不安感。
因為他手上的獎勵盒子，內裡是兩把鋒利的牛肉刀。
「係咪好快會有人死？」阿琳恐懼的問。
「斷估唔會係叫我地玩切牛肉囉 ...」阿謙苦笑：「美孚好危險，我地快啲返去荃灣西，人少啲都安全啲。」
----------
阿發和強叔，也得到他們的獎勵，兩個鎚子。
「鎚仔 ... 強叔你點睇？」阿發問。
「可以點睇，見步行步啦。」強叔回應：「我地睇埋阿光拎到啲咩再諗啦。」
他們回到樂富站，數分鐘後，阿光趕來跟他倆會合。
「阿光，你拎到咩？」強叔首先開口。
「實心鐵棍。」阿光打開盒子給他們查看，是一根長約50cm的鐵棍：「你地呢？」
「鎚仔 ...」
「係咪要我地打交？」阿光問。
「好大機會，如果唔係唔會比呢啲野我地。」
「咁搞法咪會死好多人？」
「呢個組織搞咁多野騎劫地鐵都係想我地自相殘殺啫，佢地有咩做唔出呀？」阿發把鎚子收藏在腰間。
「咁又係 ...」
「放心啦，我地有三個人，又拎到武器，第一堆死嘅點都未輪到我地，我地而家搵個位抖陣先啦，如果唔係人地啲痴線佬殺到埋身我地都冇體力還擊！」
十五分鐘後，第二回合的遊戲時間完結。
A的聲音準時出現在廣播器中：
「好！我而家宣佈，第二回合完結，而家我將會講解第三回合嘅玩法，大家要留心聽清楚呀！
經過左兩個回合，我諗大家都會發覺，你地身邊有啲完全冇用嘅人，有冇諗過，點解佢地會留得低？
有冇諗過，佢地本身，根本唔應該留低？而家，你地可以除去呢班係你心入面嘅廢物！
第二回合成功完成第二關嘅朋友，相信你地已經收到我地提供比你地嘅獎勵，冇錯，就係武器啦！第三回合呢啲武器將會大派用場！
第三回合，係限時個半鐘入面，你地可以盡情咁 ... 殺人！將呢個社會嘅籮底橙，社會垃圾剷除！
我地會將每一條線路分段，大家可以係指定地區遊走殺人，每殺一個人，將會跟據身處位置而獲得唔同分數：
如果係開始據點同埋第二回合拎到嘅新據點殺人，會得到2分，其他遊走據點殺人，就有1分，得到最高分嘅五十位朋友，係第四回合會有一個巨大優勢！
為左令呢個遊戲更好玩，我地已經係每一個車站收藏左一啲武器，分別有：
1把AK47步槍
1把MP5衝鋒槍
2把黑星手槍
2把蟒蛇左輪手槍
5把牛肉刀
5支實心鐵棍
10個工具用鎚
10把瑞士萬用刀
10把生果刀
我地希望，留得低嘅人都係精英，所以，將會有10%，即係九萬人，透過呢個人生淘汰賽入面落敗，同時得到最大嘅懲罰，死亡！
另外，港島線嘅乘客，由於第二回合第一位完成嘅朋友係你地嘅線路，所以，你地將會獲得一個特別信息，遊戲開始嗰陣我地會將信息send比大家。
而唔係港島線嘅乘客，你地都可以得到同樣信息，因為我地亦係每一個車站嘅隱閉位置放好左一張信息卡，只要搵到信息卡，得到提示，你地一定會好開心。
遊戲，正式開始，請大家留意我地而家send比你地嘅路線圖，小心，唔好去錯地方，如果唔係我地會即時槍斃你地！」
「鈴！」手機傳來信息，阿謙打開查看。
「致各乘客：
各線路的遊走方式如下：
港島線：共分三組，堅尼地城至中環；金鐘至北角及鰂魚涌至柴灣
荃灣線：共分三組，中環至油麻地；旺角至荔枝角及美孚至荃灣
觀塘線：共分三組，油麻地至九龍塘；樂富至九龍灣及牛頭角至調景嶺
將軍澳線：共分兩組，北角至調景嶺及康城至寶琳
機場快線：不分組別
迪士尼線：不分組別
東涌線：共分兩組，東涌至荔景及南昌至香港
東鐵線：共分四組，紅磡至九龍塘；大圍至火炭(馬場站將開放使用)；大學至粉嶺及落馬洲至羅湖
馬鐵線：共分兩組，大圍至第一城及石門至烏溪沙
西鐵線：共分三組，屯門至元朗；錦上路至南昌及柯士甸至紅磡
各地區每一分鐘，將有數班列車到達各站的所有月台(各尾站除外，因只能往一個方向，所以只有一班列車)，給各乘客作遊走之用。
請各乘客珍惜生命，先下手為強！」
「美孚站果然唔安全 ...」阿謙的猜想正確。
「我地而家要點做？」
「我地而家入左錦上路先，去到再諗辦法，只要入到去，就算荃灣西失守都要等最少六分鐘先入到黎，留得住條命先係重點。」
「嗯 ... 阿謙呀 ...」
「做咩呀？」
「你會保護我嫁可？」
「... 會。」
港島線的第一名 ... Ciro，收到另一個信息。
信息只有一句：
「如在轉線站擊殺其他線路的乘客，將會得到五倍分數。」
「嘿 ... 呢個game愈黎愈有趣。」
他從腰間拔出蟒蛇手槍，然後單手插進夾克的口袋。
「我仲有 ... 24粒子彈 ...」
遠處，有一個中年男人站在往柴灣站的月台等候列車。
當列車到達時，男人正想走進車廂 ...
「砰！」
男人的左邊頭顱中槍，向右倒在地上，一動也不動。
「而家，仲有 ... 23粒子彈 ...」
Ciro走上車，安然坐好。
「就算轉線站拎五倍分又點？殺得夠多就得啦 ...」
他的取態是，由柴灣站開始，一步一步殺回堅尼地城。
此刻的他，體內的邪惡細胞開始增加，比起分數，他更渴望得到殺人的快感。
港島線內，能有人阻止這個發育中的魔王嗎？還是，人們只能成為魔王成長的經驗值？
電子屏幕上的生存人數，由900000變成899999 ...
第一場乘客之間的殺戮，正式開始 ...
樂富站的乘客，三五成群的慢慢集結起來 ...
「我地而家應該點做？真係去殺人呀？」強叔問。
「睇定啲先，唔好急，愈急就愈亂，其實樂富唔係咁好守，大堂太細啦，如果比其他站嘅人衝晒上黎真係困獸鬥冇得走 ...」阿發回應。
「咁換個大啲嘅站呀？」阿光提議。
「都可以，呢個回合岩岩開始，我諗啲人都冇咁快亂黎，係呢，阿光你本身係由邊個站出發嫁？」阿發轉頭問阿光。
「我係由佐敦返牛頭角。」
「哦 ... 個game一開始嗰陣你係九龍塘？」
「係呀，做咩咁問？」
「冇，我係度諗緊，你揀左九龍塘站做據點，但遊走路線圖就岩岩分隔左九龍塘同樂富 ... 咁你咪可以遊走晒大半條觀塘線囉？」
「係喎，」強叔發現同樣的問題：「你好似好著數。」
「係掛 ...」
「咁嘅話，不如我地分頭行事啦，阿光你試下搭一程過去油麻地睇下咩情況，而我地就過九龍灣嗰邊，十五分鐘後返樂富呢度等，點睇？」
「都好 ...」
他們走到月台 ...
當阿光站在往油麻地的月台時，被黑衣蒙面人截停。
「唔會有車嫁，過另一邊啦。」蒙面人冷冷的說。
「下？但係我個據點車站係九龍塘喎 ...」阿光不解。
「呢個係線路安排問題，快啲行返過另一邊啦，你就算想返去都要等呢round完左先得，第三round係先計遊走路線，再計據點車站。」
「哦 ...」阿光只好跟阿發和強叔重新會合。
「咦？返左黎嘅？」強叔問。
「係呀 ... 佢話唔比去九龍塘喎，要完左呢round先得。」
「咁一齊去九龍灣嗰邊啦 ...」
很快，一輛列車到達 ...
車門開啟的一瞬間，數個血流披面的人衝出來拚命逃跑，緊接著有兩個手持牛肉刀的青年死命的追趕。
「屌！真係斬人呀！」強叔指著他們大叫。
阿光下意識想要往大堂跑，阿發見狀立即把他和強叔拉進車廂。
「嘟嘟嘟嘟嘟 ...」車門關上。
「阿光你係咪傻嫁？佢地比人斬緊，你仲跟埋佢地行同一個方向，遲早比佢地斬埋呀！」阿發生氣的罵道。
阿光已嚇得雙腿發軟，面如死灰，完全接不上話。
列車開動，往黃大仙駛去 ...
「估唔到咁快就黎料 ...」他摸了摸在腰間的鎚子，然後看著受驚的另外兩人：「一定要冷靜 ... 個半鐘啫，頂得住嘅 ...」
阿謙和阿琳成功到達錦上路站 ...
「呼 ...」他的壓力抒解了不少。
「咦？個站好少人喎！」阿琳四處打量著。
整個月台大約只有十餘人。
「出面冇人嘅？」阿謙自言自語。
「你講咩話？」
「呢度好似有個跳蚤市場，但點解冇人 ...」
「我地控制車站之餘，每個車站方圓二百米都比我地封鎖左，唔會有人入到黎，等你地可以專心玩遊戲。」一個蒙面人走上前解答問題。
「下？」
「我地已經向出面發放消息，話地鐵所有車站比人同時嚴重破壞，需要搶修，而且洩漏易燃化學物品，最少封閉一個禮拜。」
「咁都得？」
「專心玩遊戲啦！你地都唔想死嫁嘛。」蒙面人走回自己的站崗位置。
「而家點算呀？」阿琳問。
「落大堂睇下先啦 ...」
他倆走到大堂，同樣人數稀少。
「我地周圍望下。」阿謙示意阿琳跟上。
他們在大堂繞了一圈，沒發現任何異常情況。
「我又想去廁所 ...」阿琳說。
「又肚痛呀？」
「唔係，小便啫。」阿琳直接走進洗手間。
等待阿琳的時間，阿謙打量著電子屏幕：
「生還人數：891102人。
激烈戰區：旺角站，銅鑼灣站，九龍塘站，中環站。」
「車站人愈多果然愈激烈 ...」
「阿謙 ... 入黎呀 ...」阿琳緊張的走出來，小聲的說。
「下？」
「快啲啦 ... 我發現左啲野 ...」
阿謙走進去後，阿琳指著一張黃色紙說：「你望下！」
紙上寫著一句話：「如在轉線站擊殺其他線路的乘客，將會得到五倍分數。」
「咩話！」
「美孚果然好危險！阿謙你講中左！」
「原來呢個就係A所講嘅提示 ... 咁轉車站一定打到七彩，而且一定有人為左拎更多分而去轉車站做死士。」
「我地一於留係度等呢個回合完啦！」
「你話留係廁所呢度？」
「係呀，我唔想出去，我好驚 ...」
「好啦好啦 ...」
「呢度應該安全 ...」徐銘驊把門反鎖。
他躲在地鐵清潔工放置用具的小雜物房內。
「仆街 ... 班人都痴撚線嘅 ... 完全癲晒 ...」
剛才的數分鐘，他一直在逃命。
有些乘客獲得武器後，看到人便揮棍打，拿刀的更劊子手上身，手起刀落，當中不少是平常斯文有禮的白領。
「斯文敗類 ... 人渣 ...」他回想起那些殺紅了眼的乘客，冷汗直冒。
他瑟縮在房間的一角，把發出的聲浪降至最低，生怕被人發現。
「一於留到呢round完左再出去 ...」
他在一個紙箱中，隨手拿起一瓶蒸餾水，打開喝了一口。
「咦？」他發現了紙箱中有一個小盒子。
他小心拿出來，打開 ...
「嘿嘿 ... 睇黎我啲運開始返黎啦 ...」
這盒子裝著的是一把黑星手槍，連一套後備彈匣。
他把手槍藏在腰間，彈匣放到西裝外套的內袋。
徐銘驊能否靠著這把突如其來的黑星手槍，殺出一條血路嗎？
----------
「噠噠噠噠噠 ~~~」mp5衝鋒槍不斷射出子彈。
「咔 ... 咔 ...」彈匣中的子彈用光，Ciro立即從褲口袋抽出另一個後備彈匣，快速裝上，繼續掃射起來。
「噠噠噠噠噠 ~~~」
「呀 ~~~」柴灣站的乘客死的死，逃的逃，情況慘不忍睹。
「砰砰砰！」有子彈回擊，Ciro快速閃到一面牆躲避。
「咁快搵到把AK？」Ciro大喊，他跟阿發一樣有參與Wargame，認出了槍聲。
「你唔係柴灣站嘅人，但拎左我地站把MP5喎！」一把男聲回應。
「咁又點？」
「砰砰砰！」AK47再次掃射，卻不是向Ciro的方向。
「暫時結盟，殺晒呢個站嘅垃圾先。」男聲問。
「Deal！」
「噠噠噠噠噠 ~~~」「砰砰砰砰砰 ~~~」
一分鐘不絕的槍聲後，兩個男生走到大堂正中央。
「幾好野呀！我叫Dennis，點稱呼？」紅髮青年左手提著AK47，右手伸出。
「Ciro。」Ciro跟他握手。
兩個男生面露邪惡的笑臉，走到月台，等候西行線的列車。
「鬥快殺得多，玩唔玩？」Dennis嘻嘻笑的問。
「玩，梗係玩！」
「哈哈哈哈哈 ~~~」兩人一起大笑。
港島線東部，血腥場面將陸續有來 ...
阿發、強叔和阿光在鑽石山站出現阻礙 ...
當列車到達後打開車門時，數個拿鎚子的MK，不斷追打其他乘客，在車門間不斷跑來跑去。
「屌，班MK咁搞法，有排都開唔到車。」阿發抱怨。
「你同佢地其實幾似樣，哈哈！」
「唔好以貌取人好冇？我染頭髮唔代表我係MK，而且我變左金毛係因為之前啲色甩晒未補色啫，唔係特登整嘅。」
「咁等唔係辦法，不如落左車先啦。」
「都好喎。」
他們三人正打算走出列車 ...
「你三個，入返去！」其中一個MK仔見狀，對他們咆哮。
「你同我地講呀？」阿發扮作不知情，反問道。
「唔係同你講唔通同我老母講呀？屌你老母！」
「好呀，你屌啦，但我老母差唔多六十歲啦喎，你啲口味咁特別嘅？」
「仆街啦你！」
MK仔拿起手中的鎚子，向阿發衝去。
阿發立即從腰間拔出自己的鎚子，向MK仔的下腹投擲，MK被突如其來的一擊嚇到，完全來不及反應，命中後痛苦的倒地。
「超！得個樣，講就兇狠，做就碌撚！」
可是，其他MK仔發現後開始集結起來，阿發，強叔和阿光被圍住。
三人各自緊握著鎚子 ...
「我諗咁嘅環境，都係要打嫁啦 ...」阿發認真地注視著每一個面目猙獰的MK仔。
「放心，阿發，我撐你。」強叔苦笑。
「收嗲啦阿叔！」一個MK仔按捺不住，拿著一根鐵棍迎頭向強叔揮打。
只見阿光動作更敏捷，在MK仔揮動鐵棍的一瞬間，衝到強叔身邊，一手抓著MK仔的手腕，再向下巴送上一拳。
「嘩 ... 阿光，堅揪呀！」阿發比了一根大拇指。
「呢班友仔都係得個樣嘅啫，」阿光也苦笑起來：「既然而家打人殺人都唔犯法嘅，佢地先撩者賤，冇計啦，阿發，強叔，上呀！」
「呀 ~~~」
各人位置：
阿謙、阿琳：錦上路站
阿發、強叔、阿光：鑽石山站
徐銘驊：中環站
Ciro、Dennis：前往鰂魚涌站中
徐銘驊打開小雜物房的門，確定沒有人在附近後，小心翼翼的從小通道回到大堂。
可是，中環站的情況相當混亂，四處出現一波又一波的追打和逃跑。
突然 ...
「快啲走呀！快啲呀！」約二十人從中環站與香港站之間的通道跑過來，不斷呼喊著。
「東涌線啲人打到黎啦！」
「咩話？東涌線？」徐銘驊心中出現一個問號。
為甚麼東涌線的乘客會攻擊其他線路的乘客？
只見這批乘客的後方，有更大的一群人，手持武器，眼神兇悍的衝過來。
「殺呀！殺晒中環站班仆街！」拿頭的人拿著兩把牛肉刀不斷揮舞，好比戰國的宮本武藏。
「砰！」徐銘驊向天開了一槍，打算勸退他們，卻未能成功。
此舉反而令原本待在中環站的乘客受驚，四處逃命，人們看到路就跑，看到人就推，場面混亂得一發不可收拾。
「痴撚線，子彈都唔理？」徐銘驊也不敢怠慢，撤退至中環站的荃灣線月台：「唔得，要避一避先 ...」
他走到一扇門前，猛力推開，然後把自己反鎖在內。
「避一避先 ...」
----------
Ciro和Dennis兩頭怪物再次成功在杏花村站做了一次清場行動，順通做了一次補給。
「仲有幾多子彈？」Dennis問。
「百幾。」
Dennis將一把AK47拋給Ciro。
「換AK啦，呢個站有好多AK子彈，但搵唔到MP5子彈。」
「下？」
「呢個game唔知要玩幾耐，我地一定要以穩陣為主。」
「砰砰。」Ciro試了一下AK47的手感：「後座力好大。」
「適者生存，習慣下啦。」
「...」
「拎齊野啦嘛？你將MP5啲子彈比晒我啦。」
「下？」
「拎黎啦！」
Ciro把子彈從MP5彈匣拆出來，然後把每一顆子彈內的火藥倒出。
「你想做咩？」Ciro問。
Dennis輕笑了一聲。
「想唔想學整炸彈？」
第三回合遊戲時間尚餘最後半小時，生存人數：831057
阿謙和阿琳，已窩在女廁廁格中很久，可是錦上路站看來沒有爆發激烈的打鬥。
「不如我地出去睇下點呀，係廁所又臭又焗 ...」阿琳提議。
「唔好，第三回合好快就完，阿琳你忍多陣啦，完左再出去都未遲。」
「咁好啦 ...」
「你等我一陣。」
阿謙走出廁格，確定廁所沒有人後，打開洗手間的清潔用具櫃，拿出工具打算在門前製造障礙物。
「幫手裝水。」阿謙示意阿琳幫忙。
「嗯。」
阿謙把數個裝滿水的桶子放在門前，然後拆掉掃帚地拖等的棍子，束起一個柵欄。
「子彈打唔穿呢通門，咁樣整出面啲人好難撞入黎，應該安全。」
「仲有23分鐘 ...」阿琳看著手錶。
「嗯 ...」
十五分鐘後 ...
「砰！」大堂傳來一下槍聲。
阿謙立即拉著阿琳的手走進廁格中，鎖上門。
阿琳的身體猛烈的顫抖，眼淚在眼框中打轉。
「唔洗驚，冇事 ...」阿謙也很害怕，但在阿琳面前不敢表露出來。
「我好驚 ... 我地會唔會死 ...」
「有我係度，冇人可以殺你。」阿謙輕輕抱著阿琳。
「嗚 ...」
「砰！」
「呀 ~~~」
儘管看不到外面的情況，可阿謙知道一定慘不忍睹。
「千祈唔好咁快搵到入黎 ...」
距離第三回合完結時間，還有6分鐘 ...
鑽石山站 ...
阿光提著紗布、繃帶和消毒藥水等急救用品，跑回月台。
「阿發，頂住呀！」
剛才的戰鬥，阿發的背被斬了兩刀，傷口不斷流血，而強叔也被打至左手手肘脫臼。
強叔看到阿光後，立即上前幫忙。
阿發痛苦得面容扭曲，發出痛苦的呻吟聲。
「強叔，止左血未？」阿光問。
「止唔到，個傷口keep住滲血。」
「得，等我黎。」阿光稀釋了消毒藥水，替阿發處理傷口：「阿發，忍住痛。」
「呀 ~~~」藥水一碰到傷口，阿發失聲尖叫，痛得眼水直流。
「咬住佢。」阿光把一條毛巾塞往阿發的嘴，以防他咬到舌頭：「忍多陣，好快。」
「嗚 ~~~ 嗚 ~~~」
止血後，阿光立即替阿發包紮傷口，阿發的尖叫聲也慢慢收細。
「呼 ... 呼 ...」阿發一直替冷汗。
「放心，冇事嫁啦。」阿光扶直阿發，給他坐起來。
「班友真係痴撚線 ...」強叔嘆氣。
「執返條命仔已經上天保佑，睇黎遲啲仲癲。」阿光轉而幫強叔駁臼：「強叔，忍住，一 ... 二 ... 三 ...」
「啪！」
「呀 ~~~」強叔痛得大叫。
「試下郁一郁有冇好啲？」
他動了動左手 ...
「好啲，冇岩岩咁痛，阿光，你咁犀利嘅？」
「我有急救牌，加上我老竇係跌打師傅，識少少咁啦。」
「估唔到你又打得又救得，好彩同你一齊啫。」
「大家咁話啦，呢啲非常時期，多個同伴總好過多個敵人。」
「多謝你 ... 阿 ... 光 ... 你 ... 救左 ... 我條命 ...」
「你講呢啲？咪咁老土啦！」
此時，A的聲音又出現在廣播器：
「第三回合結束！恭喜各位成功過關！大家比原定時間早左兩分鐘完成喎，睇黎我地已經成功激發左各位嘅戰鬥力。
今日嘅遊戲已經完結，而家會有七個鐘時間休息，聽日朝早八點鐘將會開始第四回合遊戲，請大家好好把握休息時間。
另外，呢個時間係休戰期，大家唔可以攻擊其他乘客，如果比我地發現，我地會好似之前咁，槍斃你地，好，大家Good night！」
阿謙和阿琳聽到廣播後，立時鬆一口氣。
「冇事啦 ...」阿琳深呼吸了一口。
「係呀，冇事啦。」
阿謙拆除障礙物，和阿琳走出大堂。
「嘩！」阿琳用口掩著嘴巴。
錦上路站的大堂，四處都是屍體，剛才的戰鬥約有五十人死亡，蒙面人們正在清理屍體。
「睇黎岩岩都幾激烈 ...」阿謙身旁的屍體，身上有數個子彈孔，死相淒慘。
一個蒙面人看到阿謙和阿琳後，向他們走來。
「你地要唔要被鋪？」蒙面人問。
「有咩？」
「有，等我一陣。」
蒙面人離開了一會，回來時提著兩份被鋪，交給阿謙。
「唔該。」阿謙向他們道謝。
「唔洗，如果要野食就去C出口嗰邊，餐車係嗰邊，Good night。」
「等等，」阿謙叫停正想離開的蒙面人：「我想問下，呢個站啲人係咪死晒？」
「唔係，但頭先有乘客係荃灣西嗰邊過黎清左一次場，錦上路站嘅生還者集中左係B出口，你地想Join埋一齊可以去睇下。」
「真係唔該晒你。」
「加油，你地要抖足精神玩第四回合，如果唔係，我諗你地都幾難捱。」蒙面人離開。
----------
「挑！咁快就完！」Dennis不滿。
「咪咁狼死，有排你殺！」Ciro微笑。
他們兩人在筲箕灣站再次清場後，到達西灣河站時遊戲便完結。
「咁而家點？」Dennis問。
「返筲箕灣先啦，呢個站我地又唔知有幾多人，聽日再清都未遲。」
他倆回到筲箕灣站進行補給。
徐銘驊從黑暗的小房間走出來，打量四周。
整個月台佈滿了屍體，他小心翼翼的走，不想踩在屍體上。
「痴撚線 ...」
跟據他的觀察，整個中環站的人最少死掉了三分之一。
「喂喂！朋友！」一個白領男人叫停他。
「咩事？」
「你有槍喎！」男人指著他腰間的黑星手槍。
「咁又點？」
「你係咩線路嫁？」
「想殺我呀？」
「你驚咁我講先囉，我係荃灣線嘅。」這男人好像沒惡意。
「我都係，你不如話我知你想點啦。」
「冇，想問你有冇興趣加入我地啫，我地諗住集合呢個站嘅荃灣線人，聽日一齊過九龍。」
「咁呀 ...」
「我地大約有四十人，大家一齊會有個照應呀嘛，有冇興趣？」
「都好。」
「歡迎加入荃灣線中環小隊！」男人跟徐銘驊握手：「我叫Peter，點稱呼？」
「叫我阿驊啦。」
「我地嘅大本營係J出口，同你去識下我地小隊嘅人先啦。」男人帶領徐銘驊到J出口處。
徐銘驊加入了荃灣線中環小隊後，能重上他渴求的高峰嗎？」
各人狀況：
阿謙，阿琳：錦上路站
阿發，強叔，阿光：鑽石山站，阿發受了中等程度修害
徐銘驊：中環站，加入荃灣線中環小隊
Ciro，Dennis：筲箕灣站