DSE點令我由一個毒撚變做player: 15.

「Cyrus，出黎食飯啦，你訓左成日仲喱係間房度做咩姐。」
 
呀媽既腳步聲伴隨著佢把聲由客廳傳來。
 
我即刻擺低部手機：冇呀，我起左身好耐啦，執梗房之嘛。
 
行出廳前，我唔死心咁望一望手機上面mk淇個對話，我4點sd出既一句「起身未呀，有d事想問你」仍然係未得到任何回覆。
 
/
 




「Cyrus，究竟你琴晚去左邊度？」食食下飯，呀爸無端端問我。
 
因為mk淇咁耐都冇應我，再加上seven d野令我好心煩，今日同屋企人食野個時我冇講過野，不發一言，呀爸同呀媽有幾次都想開口問我，關心我做咩事，但佢地每次都欲言又止咁，大概係覺得需要尊重我，我已經大個，唔需要問長問短，審犯咁問我野掛。
我望住呀爸呀媽，都唔知點樣答佢地好。佢地年紀已經好大，我身為家中既獨子，擔心我係正常不過既。
 
呀媽見我個樣咁沉重，同呀爸一唱一和起上黎：Cyrus應該係因為dse讀書壓力太力搞到個人咁累姐。
佢停一停，用擔憂既眼神望住我：不過你真係太辛苦就要停一停，唔好谷到咁行，有咩你記住講出黎。
 
坐係佢旁邊既呀爸點點頭，繼續講：我知你都大個，我地都管唔到你，但你下次夜晚出去要講聲，你知唔知琴晚你出去個時個下山門聲嚇到你呀媽醒左，又嗌唔住你，最尾你呀媽做左成晚廳長，等你翻黎，成晚都冇合埋對眼。但你翻到黎又自己走左入房，好似當佢透明咁，我地真係好擔心你發生左d咩事變成咁。
 




我望住呀爸呀媽既眼神，真係覺得好warm，由細到大都明白在家千般好既道理，係屋企可以唔需要朋友，可以打機，可以有俾人錫既感覺，最重要既係，我係屋企有俾人尊重既感覺。諗起琴日為左搵mk淇而搞到呀媽擔心左成晚，即刻覺得有d內疚。仲要我翻到黎因為太累冇留意到佢，我真係一個不孝子
 
我慢慢開口答：琴日steven有d事，夜晚叫左我出去姐，傾完太累就順便係佢屋企訓埋，只係唔記得同你地講，下不為例。
 
Seven作為我兄弟，都有上過黎，見過哂我呀爸呀媽，佢地知道seven既身世久唔久仲會叫佢一齊食飯，希望俾d家庭溫暖佢，所以佢地對seven既印象幾好，亦都好放心我同佢玩。
果然，佢地聽完之後露出一個放心既神情：哦，原來係steven，咁冇乜所謂啦。下次記住有d交帶就得啦。
 
我笑一笑，聽到seven個名又開始有小小唔舒服，於是放低碗筷：我食完野啦，溫書先。
 
翻到入房，只見mk淇覆左我。




 
我好開心，即刻開左手機睇下佢sd咩過黎。
 
我：[4.08]起身未呀，有d事想問你
 
佢：[8.30]做咩事呀.？
 
我好猶疑，我唔否認自己好自私，當初冇經過深思熟慮就想俾佢電話seven，但到而家又想據為己有，4點個時其實搵佢只係諗住得到佢同意，俾佢電話seven。
我山左個頁面，諗梗點答佢。
 
佢：[8.34]點丫您.又5覆機.
 
我又開翻個頁面，用左wtsapp咁耐，第一次已讀不回人。
 
我：[8.35]其實你對steven感覺係點




 
佢：莪古距有d相抄莪牌感lor.（我估佢有d想抄我牌咁囉，屌mk妹究竟識唔識字，睇撚到我，仲要佢根本冇回應過我問題。）
 
我：下你又知？你覺得佢憑乜想拎你電話？（外加笑喊符號，我覺得佢真係過份自信）
 
佢之後錄左一段分幾鐘既錄音黎，內容都係窒下窒下咁，我諗佢加埋er左都有20幾秒。
內容大概係話琴日seven睇戲個時都好進取，又借嬲俾佢又盛，陪佢去廁所都有係咁撩佢講野，話係人都feel到佢想追佢喎，所以佢估到下一步seven應該係想拎佢電話。
 
我聽完段錄音真係唔想再覆，得啦知你勁，多人媾，一開始又話鍾意我又盛，而家seven一埋黎就姣撚到乜咁。算點姐，琴日邊個揹你呀黃淇，打完齋唔要和尚。
 
Mk淇見我聽左，個錄音變左色（完全唔明點解wtsapp會發明呢d On9功能），又催我覆。
 
[8.47]您呷醋牙.
[8.51]莪知您有睇加.
[8.55]林逸峰.您再5復我打俾您加拉.




 
我睇完只係覺得真係好煩厭。
 
為左唔俾佢阻住我溫書，我索性熄左部機佢，呢d梗張關頭，俾女影響實在太唔扺。再加上我無謂要因為mk淇既事憎seven，所以佢既野我決定擺埋一邊先。