美國留學點滴: 治安問題

富貴不還鄉，如錦衣夜行耳！呢句說話，大家都耳熟能詳，就係講一個人做左大佬都唔番鄉下晒下命，就好似著到靚一靚係夜晚行街咁，冇人睇到。

但係錦衣夜行呢句成語，其實係冇得翻譯做英文。唔係講緊個句子係冇得翻譯，而係個意思冇得翻譯。因為係美國，你夠薑錦衣夜行丫，唔洗錦衣，剩係夜行你都唔掂！

香港警察呢，就極醜惡既，呢句說話，大家都一樣耳熟能詳。但係同時間，呢班差人其實好盡責，佢地真係維持到香港既治安。最起碼，你可以夜行，凌晨三點鐘係佐敦道拎住個prada都冇人會打劫你。

美國？諗都唔好諗。尤其係我地呢d留學生，唔知頭唔知路，夜晚真係唔好亂咁行，被人湯左你都唔知咩事。

你以為大城市治安就會好d？太天真。





洛杉磯，LA，夠大未？

藍可兒案就係洛杉磯發生。再之前，兩個中國留學生係自己架寶馬內被槍殺，又係洛杉磯。

事實上，每個城市，或多或少都有幾個貧民區，而呢d貧民區就係治安最差既地區。

咁你點知邊到係貧民區呢？其實唔難。當你揸住架車，行下行下，突然覺得勢色唔對，成個氛圍同周遭地區完全唔同……

「咦！點解周圍d屋既門窗全部裝晒鋼閘！！」





「咦！點解d街燈壞壞地！！？」

「咦！點解會有個小肥黑人姐姐企係街邊擔住口煙！！？」

最緊要，係當你走入一間KFC，你會驚覺……

「咦！點解會有成呎厚玻璃隔住個counter！！仲要用咪講野！！我係咪入錯左銀行！！？」

冇入錯，你只不過係入左貧民區。





a.k.a.全美國最恐怖既地方。

恐怖到連快餐店都要裝防彈玻璃！係呢到，你唔會搵到任何一間銀行既分行，因為冇銀行會係到開分行，連自動櫃員機都唔會有。全部民房既門窗都裝晒鋼閘，係窗口望出去就好似監倉望出去一樣。而呢個地區唯一一間超級市場walmart，門口個石Q係長期拎住把shotgun既。

LA既貧民區就係一個咁既地方。

This! Is! Pung Man Kui！

如果你夠薑，凌晨兩點鐘係呢到既內街渣車兜三個圈，你就會見到傳說中既癮君子同白粉販。

如果你夠薑係到兜圈不特止，仲要泊係旁邊等十分鐘，你就會見到有個十靚歲小朋友，走埋黎，Knock Knock敲你個窗。

好喇好喇，如果你真係咁夠薑，你不妨拉低窗，懶係好笑咁答埋佢Who's there？

呢個十靚歲小朋友唔會俾個名你，佢剩係會問你：「Want some coke?」





如果你真係真係真係咁夠薑，你就答「sure why not」啦！但係我唔夠薑，我答佢「I'm not thristy」就開車逢一聲，頭也不回地走了。

以上既事，全部都係我個local朋友講俾我聽。

係真係假，我點知？你當我係咩人？我咁潔身自愛，點會咁夠薑兜入去？我最多剩係試過係貧民區隔離既大路上泊車，然後一個緊身衫黑人小肥姐姐行埋黎－－

「hey sweety do you want a date?」

「um...」

同埋最多最多最多都剩係試過，夜晚十點，自己一個揸車去座落於貧民區既popeyes，即係大力水手炸雞，drive through，買雞食。

但係你真係想像唔到，你去買幾件炸雞咋，係進行"合法食品交易"呀，居然會搞到好似進行緊非法毒品交易一樣。





係果到，你想俾錢，係唔可以就咁俾，而係要透過一個保險箱俾。呢個保險箱又係用成呎厚玻璃制成，分開買家同賣家。買賣雙方，係活在兩個世界。

呢個保險箱有雙重保險，點樣交易呢？首先買方unlock，放錢入去。注意，買方unlock果陣，賣方果邊就會lock死左，想開都開唔到。然後，買方lock番，咁賣方果邊就會解鎖，佢unlock拎錢，呢個時候買方係打唔開個保險箱。

直到賣方放入炸雞，lock番個箱，買方先可以打番開，拎雞，鎖番，完成合法食品交易。

買件雞都要咁安全，可想而知呢個地方治安幾咁差。

你有幾何見過一間kfc，你同個counter係有道防彈玻璃隔住架？你去買野食，仲要用咪點餐？你以為你去緊探監！

最後，我仲試過，人生中最恐怖既一次。

我一個人，夜晚十一點，係貧民區出面條大馬路到行。行下行下，有部車泊左係到。車入面開左燈，燈下面有兩個妙齡白人少女照緊鏡。突然間，我同司機位既少女四目交投。正當我打算報以微笑既時候，"gluk"一聲，佢鎖門！！！！！！！！！！

wtf！我仲以為我後面有槍手！！！！！





即刻望一望後面，然後我先明白到，原來我就係果個槍手……

果一刻我先明白，當一個地方冇左極醜惡既差佬，係零安全感下，人與人之間既信任係幾咁薄弱。

附圖就係貧民區快餐廳既一角倩影：