美國留學點滴: 鼻毛、鼻敏感

朋友問我，番左黎香港幾個月，有冇覺得唔慣，同以前唔同？

無錯，唔記得同大家講，我一早已經留完學番左黎香港。

「有呀，而家既香港同四年前，真係差好遠。」

朋友追問：「有咩唔同？」

「四年前既香港， 一條鼻毛都冇。」





認真，唔係講笑。係美國住四年，我係從來都唔需要剪鼻毛！鼻毛！？咩黎架？由細到大我剩係係科幻片先見過佢，老老實實，我以為鼻毛係李力持先有架！！

直到四年後，我畢完業旅埋行，番左黎香港一個月。

一個早上。

一個風平浪靜既早上。

我刷緊牙。





唔覺意望下塊鏡。

係鼻哥窿下面，居然凸左條4mm濃黑粗厚既毛出黎。

果一個moment，我，崩潰！！！！！！！

係咪我搞得太多爛gag！？我係咪已變左做李力持！？點解上帝咁麻木不仁要咁樣對我！？點解我拜左咁耐黃大仙你都唔保護我！？點解會有隻外星生物係我鼻哥窿入面痾條4mm濃黑粗厚既屎出黎！！！！天呀！！！！！！！！！！！


但係隨著時間飛逝，轉眼間，我已經番左黎三個月。






我純熟地拎起果把向上微彎、尖到插得死人既較剪，塞入個鼻哥窿………

唔係！果把唔係鼻毛剪！！呢個世界，點會有一把專門用黎剪鼻毛既較剪咁核凸丫！！根本連鼻毛都冇，幻覺黎架咋，鼻毛係唔存在架…

……

好吧我認，我係特登去左屈人寺買左把三十八個八不鏽鋼尖頭鼻毛剪。

個sell屎姐姐仲話：「先生你試唔試下呢隻飛利浦齊頭電動鼻毛剪？最新出架，保証你既鼻毛貼貼服服。」

我弱小既心靈實在受唔起咁多打擊。

岩岩先接受完自己有條鼻毛凸左出黎，你而家話俾我聽，原來飛利浦唔係賣電視既！！！





「唔要！我唔要！你求其拎把最平既俾我啦！！」

……

直到而家我都唔敢相信，我居然要做埋d咁既野。

但由果日我望到自己第一條鼻毛開始，我不得不接受，我既人生已經改變。我由一個男仔，脫胎換骨長大成人，變成一個男人，一個要剪鼻毛既男人。

以前，我望人係望佢對眼先。而家，我望人係望佢個鼻先。然後我就發現，原來鼻毛呢家野，好多男人都會凸番一兩條出黎。

佢地可能心諗：「出黎行，唔凸番一兩條鼻毛點叫真男人呀？」

又或者佢地根本就唔知自己條4mm濃黑粗厚原來走左出黎，但係唔好意思，sorry，我真係覺得好嘔心。





呢一切一切，都係因為香港既空氣質素。

其實我都唔想再講落去，搞到好似唱衰緊香港咁，所以我用反話講：「香港既環境真係好好，空氣又清新！我番左黎香港之後d鼻敏感走晒，鼻毛都縮番入去，連鼻屎都冇粒呀，你睇下我個鼻哥窿，幾乾淨！」

冇錯，番左黎香港，除左多左條鼻毛，多左幾粒鼻屎之外，我仲多左個鼻敏感。

由細到大，我都以為自己既鼻敏感係天生，係冇得醫。仲記得三歲果陣，係賽馬會乜乜物物診所，個醫生叔叔話：「冇得醫架，你成世都係咁架喇，每逢轉季記得帶包紙巾出街喇小朋友。」

年紀輕輕我就身懷絕症，廣告仲話有病就要睇醫生，乜原來醫生連流鼻水都醫唔好架咩，實在為三歲既我帶黎唔小陰影。

呢段痛苦既日子，我挨左十八年。每次人地食緊飯，我就係到包雲吞；每次考試，桌面總要放定一包tempo……

忍受同學既縑棄，忍受旁人既眼光，我挨左十八年！

一直到我去左美國，有一日班同學講起鼻敏感，我先驚為天人：「原來半年前仲係香港讀中學果陣，我仲留緊鼻水架！點解而家會冇左！」





霎時間先發現，原來幾位同學都係鼻敏感患者，原來幾位都係年紀輕輕就身懷絕症，又同樣地原來幾位都係過左美國之後就不藥而癒！我地忽然發現，原來我地終於可以好似正常人咁生活，我地終於唔洗日日過住打乞痴同包雲吞既生活，我地終於明白點解美國係冇得賣tempo，因為根本就唔需要！we are free！！

冇鼻敏感既日子有幾咁快活，未患過絕症既人係唔會明白我有幾咁興奮，果一刻我既心情就好似中左六合彩頭獎，之餘，仲發現自己原來係李+x失散左既第三個仔，既同時，仲有個中東油王女話要做我妾侍一樣。

然後，我開始習慣。

我開始習慣做番個正常人。

我開始忘記過往痛苦，洗心革面重新做人，呼吸清爽既空氣，過住冇鼻敏感既日子。

就咁過左四年。

直到四年後，我畢完業旅埋行，番左黎香港三個月。





一個早上。

一個風平浪靜既早上。

我剪緊鼻毛。

一放把鼻毛剪上去……沾住左？

望下塊鏡，係鼻哥窿下面，居然流左條4cm濃厚鼻涕出黎。

突然間我好頭痛……我……好似有一段悲傷既記憶……一段被封印既過去，剎那間被解除：「屌，原來我以前係有鼻敏感！過左美國好番，四年都冇野，番左黎一轉季又復發！！！」

丫！我恨香港！！