美國留學點滴: 悶
係美國生活，你要deal with一個字：悶。
當然啦好多人會唔同意既，阿葉我今次唔放到咁大，重新講一次：
係美國(加州)生活既香港人，你要deal with一個字：悶。
事先聲明，呢篇文唔係講緊冇車果班。冇車果班人基本上你都悶慣架啦，就好似一棵百年大樹咁，你唔會走去問下棵樹：「喂你棟係到同一個位棟左成百幾年，郁都唔郁下你唔悶既咩？」唔悶架，棵樹真係唔會悶架，因為佢生出黎就係咁加麻。棵樹本身就係咁悶，佢點會覺得悶姐？所以冇車既人你地係唔洗去deal with個悶字，因為你地本身就係個悶字，你就係悶既化身，deal with自己，get a life就得架喇。
要deal with個悶字既人，係有車果班。
上一篇講到有車好似幾咁多姿多彩，冇錯，你岩岩買車果陣真係會覺得好爽，真係新奇好玩兼有趣，但係過多一排，你又會悶。
買左架車半年，你已經食晒咁多間快餐店加埋合共七七四十九種唔同既包，westfield間forever21 一入門口左手邊第三排掛咩衫你都已經暸晒如指晒掌，gta iv已經爆左第十六次打緊第十七次，信長乜鬼野彎拉神秒都練好晒，你就會開始覺得，真係好悶。
個個weekend，唔係shopping就係clubbing，唔係打機就係打飛機，有時出黎唱下k，得閒無事又一day。
唔似得香港，美國真係悶到抽筋。你以為個Town仔好似好多野咁，其實超級市場得兩間，mall得一間，唔同種類餐廳來來去去都係果幾間，唱k又係得果間，戲院又係得果間，足球場又係來來去去都係果幾個人，去多幾次識晒，gym room你同樣時間去既話同一部機又係同一個人係到。
放眼成個Town，咩都冇。
香港人係唔會想像得到。係香港，你悶？你落去樓下個mall睇下，就係呢個up dup屋村商場，有齊晒係美國成個Town可以有既野，仲要有多唔洗找呀！
美國真係好悶。
超級悶。
好似機械咁。
有一d哲學味重既人，就會開始反思人生的意義。殷海光點解會出到篇人生的意義，你以為佢平時真係咁得閒諗咁多無謂野？係因為佢係美國哈佛果陣悶咋！
一d好挑戰，又有少少錢既人，就會開始去賭錢。我係唔好賭既，所以我最多都只係放大假去vegas渡下假玩下。但係一班好賭既同學，真係可以個個weekend都去barona朝拜，一時輸到傾家蕩產，日日挨兩個m記一蚊mcdouble同mcchicken當一餐；一時又嬴左個世界，餐餐唔係鋸扒就龍蝦。佢地係過山車咁既生活當中追尋快感黎解悶。
一d好交朋友既人，例如阿葉我，就會開始同local美國人 hang out。
但係我不得不說，悶呢家野美國人真係專長。同local 美國人出街有咩做？出街囉。冇喇，hang out係真係純hang out，係條街到漫無目的地蕩，差在用腳行定係用車行架咋。有時候，可能去coffee shop坐下，可能去食下雪糕，去in&out食個包，拾下拾下，咁就過左幾個鐘，hang完out，see you next time。
我地香港人係做唔到呢樣野。我地係接受唔到同朋友出街，係真係冇野做，因為實在太悶！就算你真係冇野做，平時你都會美其名做散步/睇風景/行沙灘/游車河。你話行下街睇下野？有咩好睇呀？係美國，成條街連鬼影都冇隻，方圓十里乜都冇，你想睇街燈定睇下路邊棵樹問佢悶唔悶丫？
你自己諗下，你約個朋友出街，同佢講：「喂，不如我地由銅鑼灣行去西彎河丫。」
退一萬步，當真係有人咁變態應你約。路程一個鐘，你講咩好？肯定會dead air架喎。dead air點算好？美國人就會答你：「繼續行囉。」
係，佢地係悶慣。佢地接受到dead air，但係我接受唔到，我會不停搵水吹，吹下red hot chili peppers，唔岩傾？又吹下Muse……總之吹晒咁多瓣，總有一瓣係岩傾。
如是這，hang out多幾次，只要keep住有水吹，你個friend就會覺得同你好friend，好似有好多共同話題咁，跟住佢就會邀請你join佢d party。係，我知我係講到好似打機攻略流程咁，但係偏偏就係個個都係咁，你唔好問我d party邊到黎，我點知？總之靠吹水增加友好度，友好度升到咁上下就會有party事件。
咁party做咩呢？party就好多種既，但係以我呢個年齡層，識既都係廿歲頭大學生，我地大學生既party無論係咩party都只係得一個活動：飲酒。
你唔好又問我d酒又係邊到黎，總之就係有酒，無限量供應。無論係將fraternity house扮到成間night club咁既party，定係幾個朋友一齊玩既home party，總之無論任何party，主要活動就係飲酒，其他野？唔記得啦，飲完酒你做左咩邊個記得。
第日你番學見到個friend，佢話琴晚你鬧得我真係好岩，你都唔知答佢乜好，你連自己講過野都唔知。
總之，就係咁單調，美其名叫party，實際上只係飲酒，個個weekend去飲下酒，吹水吹完都唔知吹左乜野，party完都唔知為乜。
可能係美國實在太悶，太多時間諗野，你開始每做一件事前都問自己：「為乜？」
當一個人悶到一個地步，問得多自己為乜，就會發癲。我懷疑美國咁多校園槍擊案，主因都係因為佢地悶得濟，悶到癲左所以殺人。美國咁多天才科學家，主因都係佢地悶得濟，悶到癲左，研究埋d冇人明既野。google班人咁好諗頭，肯定係因為寫code太悶，悶到亂諗野。
終於，到最尾，我為左解悶，開始左寫blog。