美國留學點滴: 有車既日子

係美國留學，無車同有車既生活，簡直係地獄與天堂既分別！

有左車之後，你從來冇諗過生活係可以咁愉快。你唔止可以去Mcdonald食魚柳包，仲可以去Jack in the box，Carl's Jr，In&Out，Wendys，Burger King……你諗都冇諗過原來食個漢堡包都可以咁多選擇，仲要全部都係十分鐘車程以內！然後慢慢地，你仲可以同個朋友share hidden menu：「試下in & out個animal fries，menu冇架，超正！」冇車既時候，你完全冇諗過有呢一日：「喂大佬，In&Out係觀塘呀，我係尖沙咀行過去為左食個包？」

漢堡包唔岩食？原來出門口直行右轉去到尾仲有兩間港式茶餐廳，左轉就係大華99，最大型既中國超級市場，仲要有燒味飯賣，死未！？咁都唔夠？渣多十分鐘，扒房！Out Back，唔岩仲有BLT，再唔係食拉面、壽司、韓燒、冬陰公。都唔岩？渣車去買送煮飯囉，你從來都冇諗過，原來你住緊既呢個咁既爛鬼Town仔係有咁多野食！多到每一日剩係諗食咩都諗到頭爆。

然後，有一日你渣車兜兜下，竟然去到湖邊！你諗都冇諗過，你住緊既地方，原來十五分鐘車程就可以去到湖邊，得閒可以同女朋友撐下艇仔，泛舟湖上，又多個拍拖地點，幾咁詩情畫意。

然後，你又渣渣下，熄左個gps亂咁兜，竟然係機鋪！？再兜下，frys？strip club？……





係買左車既頭幾日，呢個世界變得好新鮮，好吸引，好似周圍都唔同左咁。你既世界忽然大左好多，你唔再局限於果幾條唔準時既巴士線，你spend係個司機位既時間愈來愈多，什至多過你spend係自己將床既時間，直到一日，你既天堂夢碎－－因為你要入油。

入油，簡直係惡夢。如果渣車既生活就等同於生活係伊甸園，成個天堂咁，咁入油就係伊甸園果條惡蛇。第一次入油，你只會覺得好奇怪：「喂，香港入油唔係有人服侍既咩？」你就好似純真既夏娃一樣，仲未感受到惡蛇既可怕，俾佢呃左。第二次入油，你就奶野喇：「上次唔係兩個半既咩？點解變左三蚊架？」有時你會遇到油價平左，但係我阿葉作為過來人，係到鄭重警告：唔好以為平左係好事，唔好諗住個九係幾咁平，否則到有一日去到四個半，你就會諗：「點解我當初個九果陣唔入定幾筒油呢！！」

只要你唔係有錢過李＋ｘ，油價都會直接影響你渣車既心情。尤其住係洛杉磯果d，你塞左係405成半個鐘，已經夠晒炆架啦，隔離Chevron仲要大大個牌棟係到：今日油價：四個七，你加下係厭我唔夠燥狂？405唔知幾多車禍就係因為見到呢個牌咋，一見到，明明塞車都照俾油，咁就撞左。

再過多排，天堂既壞處就會浮現，尤其是如果你係俾人寄生既話。以下係真人真事：

一次朋友Keith 朝早8點幾去到巴士站，點知去到發現走左班巴士。趕住考試既佢立即打俾宿主--即係我：





「喂阿葉，走左班巴士呀！趕住考試，可唔可以車我呀唔該丫！」

「……咩…話？打錯喎……」迷迷糊糊既我，根本咩到load唔到。我望下個鐘，大佬…八點？之後又訓左。

唔洗幾秒，電話又響：「喂救命呀葉哥！呢科衰左畢唔到嘟…嘟…嘟…嘟…嘟…嘟…嘟…」

然後Keith再打多兩次，終於我都清醒番少少，心諗一場朋友冇奶油見死不舊……抹抹眼屎，面都唔洗牙都唔刷，孖煙通都唔換，拎起條車匙眼都未開就行喇。一插，一撻，一下俾油，一下扭太，叱一聲，就咁hi花左個車尾。

「……頂！」





叱一聲，真係仲醒過鬧鐘，但係個心仲痛過俾同一條女飛兩次。