【真人真事】當年中七AL，我打左成年天堂二，但我無悔！: 62-要脅
我唔係想怪樹，只係覺得好可惜。
當初係樹同我講要把握機會，偏偏樹就次次捉到鹿都唔識脫角。
但係呢句說話係唔應該出現，我一講完就知自己又講錯野，立即轉話題，問樹：「咁你套+250防仲係咪到？」
+250防，即係連戰果套贊助防。果陣樹被日殺偷襲只係跌左把+1000弓，套防具仲係身上。
「係到，gm俾番我。」樹又換一換話題：「今日食唔食王？」
我亦順佢轉話題：「你琴日單日食王單野當冇事？而家仲要知係連戰Hack，開得拖啦，仲邊得閒食王。」
樹反而好老定：「你放心，有壬生係到，唔會打得成，最多都係嘴炮，而且我地有著數。」
嘴炮係online game述語，顧名思義，就係以嘴代炮，罵戰咁解。
呢方面，樹又真係算得幾準。
難得傾番黎既和約，其實雙方都唔想破壞，但係雙方都想從中拎著數。結果偷食王引黎既，果然就只係一連串係論壇同game入面既嘴炮，以及冷戰－－表面仍然係分單雙日，但係暗啞底就兩邊互搶王。
今日星期二係雙日，本來應該屬壬生食。王預計大概七點鐘重生，但係我地九點先集齊到人。結果去到海盜船，亦即係小王"扎肯"既居所果陣，已經得番個吉房。
紅問：「咁即係點呀？」
大綠答佢：「即係好似以前咁，鬥搶王囉……」
紅：「佢地咁即係擺到明違約喎！」
樹諗都唔洗諗，直接提出：「咁我地咪唔食龍鬥搶王囉，再罰埋佢地寫千字文。」
一直到呢一刻，見到"唔食龍"呢三個字我先明白，樹所定立既和約，種種既條款、罰則，背後個如意算盤原來係咁打！
我地呢個三盟和約，係建基於合作屠龍上面。最重要既係，和約入面設左個陷阱，就係"合作屠龍"要等齊人先得，冇確立固定日期，所以並不需要嚴格遵守！
"屠龍"呢件事係必須要三盟合作先做到，是但一方退出都唔可以成功。如果將和約當成一場交易，咁我地就係用"合作屠龍"黎交換"單雙日食王、停戰"。換言之，只要對於理想世界黎講，"合作屠龍"既利益係高於"單雙日食王、停戰"既利益，我地就可以用"唔屠龍"黎要脅理想世界！
分析一下。假如是但一方毀約，咁理想世界就冇得食龍，冇左屠龍後得番黎既大量寶物之餘，就連食小王都要同我地槍。而問題就係紅樹葉加埋壬生一族，兩盟合埋人數仲多過理想世界，有心搶既話理想世界唔會夠我地兩盟聯手搶。而毀約換番黎既就只係可以名正言順地同我地繼續開戰，仲唔見得一定會打嬴－－完全冇著數。
但係相反，毀約後，我地紅樹葉固之然冇得食龍，但搶王我地仲搶得勁過理想世界。而重點就在於，基於我地紅樹葉夠晒窮，仲要係窮慣果隻，屠龍最重要既寶物拍賣會對我地黎講根本就冇著數，因為根本冇錢bid寶物，我地去屠龍只係純粹分理想世界既錢，仲要因為人少只可以分得雞碎咁多。換言之，毀約後，就算計埋機會成本我地根本都係零損失！
成場"交易"，純以利益黎講，得益既只有理想世界同壬生一族。
呢點，正正就係樹單日都可以咁放心去搶王食既原因！因為我地有籌碼，唔係，應該係話，正正係因為我地根本冇籌碼！你同個冇籌碼既玩show hand，睇下邊個驚輸？
如果睇唔明上文唔緊要。簡單黎講，而家我地紅樹葉就係北韓，你地聯合國班爛坦一係就俾著數我，一係我就退出六方會談玩核武，就係咁簡單！
而千字文既作用，就好似美國對北韓實施經濟制裁一樣，靠嚇。一方面係用黎恐嚇韓修修令佢唔敢違約，另一方面就係比佢假信心，確保"違約"呢件事亦都唔會係我地身上發生。
以前冇龍既時候，完全冇利益瓜葛，雙方只有仇恨同胸口果啖氣，根本冇可能出現和約。但係龍一出現，就係大大個金礦擺係面前，要打開金礦，就必須三盟合作，所以和約先可以應運而生。而係咁樣既情況下，邊個得到最少利益，邊個就最唔care個金礦。邊個最唔care，邊個就有主導權。
本來，我要樹確立和約，目的只係籠絡壬生一族既盟員，好等我有軍隊打仗。但估唔到樹心思細密，可以反轉成件事。
諗到呢一點，我佩服樹之餘，亦都開始佩服gm。
當晚，樹、紫幽、韓修修就為搶王一事，進行左第二次三盟會談，我例牌冇出現－－沉悶冗長既談判絕對唔係我專長。
最終結果，就係一向霸氣外露既韓修修，係屠龍既巨大利益下再一次收歛屈服，寫左佢第一篇千字道歉文post上論壇俾全server既人過目，當然立時引黎不少人士借機抽水落阱下石，戰神亦係其中一份子。
至於hacker既問題，據樹所講韓修修連提都冇提過。我本來以為呢單野牽連什廣，理想世界絕對會借機開戰。但結果可能gm根本就冇同理想世界講連戰就係hacker？我都唔知。我剩係知，照以前靜心既性格，冇理由咁都忍到。佢之所以唔提，一係係gm既取態問題，一係就係佢盟內既取態問題。
兩點所帶出黎既訊息好唔同，亦都好重要。
如果係gm冇講俾佢聽，咁點解gm要講俾樹聽？純粹因為連戰係我地盟？冇可能。gm講俾我地聽而唔講俾理想世界聽，表示左gm既立場，係支持我地。
如果係佢盟認為眼前屠龍既利益比較重要，連戰hacker可以算數既話，即係佢係死忍。如果我係佢既話，我會想盡辦法脫離和約既要脅，加強軍備，令自己盟可以一盟屠龍，到時唔止屠龍，仲要大屠殺－－即係唔係唔報仇，只係時辰未到。
但眼前無論係邊樣，事實就係，理想世界當冇事發生過。
當晚，大理想世界整個同盟整個恢復番晒、三盟和約繼續生效、我同樹繼續係凌晨時份練火星人部隊，整個hacker事件就好似八萬五咁一樣已經唔存在。
只不過我感覺到，風向已經悄悄改變。
星期日，係我重新執掌紅樹葉後既第二次亞丁攻城戰。
同前幾次攻城一樣，我宣左戰唔攻，但係今次韓修修等人冇再過問，只係靜靜地咁企係城牆防守。
係第二次三盟會談直到第二次亞丁城戰期間呢四日，我地只係屠過一次地龍同一次火龍。地龍好合作，唔跌地龍耳環；相反火龍就跌左佢條"火龍項鍊"。"火龍項鍊"效果係大幅度增加物攻魔攻，傷害反射，仲要加血加睡眠抗性，係打手既超級寶物－－俾壬生一族bid走左。
至於扎肯、巴溫呢d小王，我地雙方都好和平，繼續奉行單雙日制度－－表面上。
由樹發起，每晚雙日十一點半準時走去食王，利用小王重生時間不定既特點(小王重生時間平均係24小時，實際上每次都唔會準時重生)，係唔搶王既情況下，用時差skip左理想世界單日食王幾次，蟻后巴溫扎肯奧爾芬佢地通通都食唔到。
重點係，理想世界同日殺，粒聲都唔出，add都唔add下。