【真人真事】當年中七AL，我打左成年天堂二，但我無悔！: 63-亞丁戰略 (一)
我有點兒擔心。
我問樹：「有風，都唔洗駛咁盡姐？」
樹答我：「果個蒼日，係佢教我有風就要駛盡艃。」
蒼日同樹有咩私人恩怨，我唔知，亦都冇興趣知。蒼日係我走果陣只係+700弓，到我番左黎已經變左+1000，斷估都係我離開果半年內，兩盟無間斷打打殺殺間積落既私仇，所以亦無意過問。
我擔心既係，韓修修同光頭呢兩公婆。連戰hack完又冇投訴，俾樹用和約要脅又唔出聲，大事化小唔係我一向認識既佢地。
一路係山上遙望城牆上呢兩個人，我就一路思量。
突然間發覺，似乎有好多事都唔到我控制。離開既半年間，好多野已成定局，我一個人，冇可能改變到整個大環境。
亞丁城戰，如同所有人預料一樣，係理想世界同日殺白守兩個鐘冇人攻既情況下，沉悶地結束。
到底咩葫蘆賣咩藥，就連盟內既艾爾都忍唔住問：
「葉到底搞乜？次次攻城宣完戰都唔online，樹不如你開佢accout去攻！」
暗殺答嘴：「咪傻啦就算開左都唔夠打啦。」
小愛：「而且壬生自己有城堡，冇得參戰幫手，我地唔會係對手。」
所有對話我都看在眼裡，但係我選擇保持緘默，繼續默默咁練火星人部隊。
如是這，又一個星期，奇岩攻城戰。
又係一樣，我宣戰唔攻。
又係一樣，佢地仍然一大班人係到守。
又係一樣，兩個鐘頭白守冇人攻完場。
唔同既係，今次守城人數明顯比上星期亞丁戰少左，最起碼光頭和尚唔係到，呢個訊號表示－－時機成熟。
第二日，我正式係血盟頻道向大家宣佈：「下星期日八點，亞丁城門前集合，今次黎真，唔好講俾其他人聽。」
艾爾搶先回答：「終於都攻喇咩！我等左好耐！！！」
…………
宣佈攻城後，有幾樣準備功夫要做。
第一樣，係戰神。
「今個星期日攻亞丁，真野，參唔參加？但係唔好洩露出去喎。」
戰神爽快地答我：「好。」
「你皇族有修加特城堡唔攻得，入我盟？」
又係一個單字：「好。」
「好，同埋你有三件+1000武，係咪即係有三套+250防？借黎得唔得？」
戰神好易話為：「有，借俾你都冇問題，但係亞丁你點打先？」
「哈，點打就要靠你幾套防具，同你隻分身……」
…………
然後，我又搵紅夾份做左幾場戲：
我著住套冇加過，仲要係封印中既王朝甲，帶隊打地獄島。封印王朝甲既外表同我平時用開既+25王朝白金甲一模一樣，但係實際數字差天共地，結果當然滅團。
係同盟頻道上，我立即叫罵：「頂你阿紅，係咪又開我account換左我套防！」
紅：「借套甲黎玩下之麻，唔係咁小氣呀麻。」
「你借就借啦換套冇加既防fake我托呀！岩岩滅撚左團呀鋪鋪都係咁！我改password唔俾你入先！」
第一場戲做完後，我又叫紅搵日凌晨偷偷地加自己隻補師分身入盟。
到左星期五既夜晚，我就係同盟頻屌佢：「阿紅哥，你加入盟果個人比我踢左喇。」
紅：「做乜踢我朋友！」
「都話分身入分身盟狼來了洛！我地盟剩係入正身，偷偷地加分身仲擺係你朋友，以為我咁蠢會唔知咩！」
…………
事後，紅係電話問我：「點解要咁做？」
「為左唔俾……」
紅打斷我：「唔係，我係問點解要搵我唔搵樹？」
「啊，咁呢樣就心照啦。」我換一換話題：「你隻地龍介指，可唔可以問gm叫佢換做+500既俾你。」
紅套防具係+500，當然管魔防既飾物都係+500。但係紅幾乎耗盡整個盟既資金買番黎果粒地龍介指，卻只係+0，就算有幾多特殊效果，魔防都比唔上+500既王朝介指。但係冇理由有更強既野唔俾人換番做+500，所以我叫佢直接搵gm。
但冇諗到gm一早就做左野：「換左啦，果日買完gm俾既就係+500地龍介，仲叫我除番一隻+500王朝介指俾佢。」
「啊，咁你成套防拎黎俾我著。」
…………
搵紅做完戲，我又要做獨腳戲。
星期六，我係同盟頻道向所有人，主要係壬生一族既所有人，宣佈：「聽日亞丁攻城係真野，有冇人想參加？」
當然，事前已經同紫幽商量左。我一講完，紫幽就答話：「如果壬生一族既人想參戰就報名俾我，我踢你地之後你地再入紅樹葉，我都會參加。」
因為壬生一族已經坐擁海音城堡，唔能夠向亞丁宣戰，要攻就要加入紅樹葉。但如果盟員主動退盟既話，24小時內唔可以加入其他盟，所以我特登星期六先講，佢地要參戰就唔可以主動退盟，一定要由紫幽踢人。
高級行者"煌"身先士卒，第一個俾紫幽踢左。
然後……「點解收唔到既？」我驚一驚訝，再答：「丫頂，琴日紅偷偷地收左自己隻分身入盟俾我踢左，而家收唔到人！」
一個盟踢完人之後，24小時內係唔可以再收番人。即係話，隨左我地紅樹葉因為踢左紅既分身而收唔到人之外，壬生一族係呢廿四小時內，亦都冇人可以收新人入盟，連盟主紫幽都唔得。
「咁不如你地入我分身盟狼來了，用狼來了再宣戰，再同狼來了結盟就可以share同盟頻道。」
結果係紫幽號領下，壬生大概有半個盟入左狼來了，所有前紅樹葉過左檔壬生既人，包括煌、小草等等都入晒去。理所當然，大綠小綠小明等好戰派亦都在內。
…………
最後，係換盟主。
凌晨時份，我同樹練好最後一隻火星人，六隻練全滿既火星人小隊就大功告成，我立即申請將紅樹葉既盟主轉俾其中一隻"Σα"(Sigma alpha)。只要到聽朝十一點，server例行維修完後盟主轉讓就會生效，到時候，如果唔上私服網頁特登check既話，就只有紅樹葉既人先知道盟主換位呢件事。
萬事俱備，只欠東風。
星期日八點，理想世界、日殺兩盟一大堆人企係亞丁城牆上。
而城牆下面，就係紅樹葉、狼來了，一大堆人，靜坐。
兩軍對峙，卻箭不發、刀不揮，鴉雀無聲、一片靜寂。
但係各自既同盟頻道內，卻嘈雜如市集一樣，一大堆叫罵聲：
「葉又唔係到！？」「到底係咪攻城架！」「浪費我時間！！！！」
離攻城戰開始已經過左十分鐘，我－－紅樹葉盟主－－葉，根本就冇係戰場上出現過！
因為我連line都冇on！
光頭和尚拎住把發出黃色光芒既伊克魯斯弓，企係亞丁城堡正門右則既防禦塔上，望住偏地紅葉，等左十幾分鐘，終於忍唔住大聲叫罵：
「係攻就放馬過黎！唔好同我搞咩鬼計，再等多五分鐘就算你地唔攻我都照樣開打！」
樹坐係地上，向塔上回罵：
「我夠想攻啦！葉都唔係到我地攻黎托呀，旗都插唔到呀！」
此時此刻，敵我雙方都係一片混亂。大概冇人預計過，葉居然連自己人都呃埋！