【真人真事】當年中七AL，我打左成年天堂二，但我無悔！: 61-我很帥
細心諗一下，Hacker一事，最有可能既結果係咩野？
係咩事都冇。
因為咁大規模既黑客事件，gm一定會作出賠償，根本唔洗擔心財物損失，更何況果班俾錢玩既贊助玩家？老實講gm都未必夠膽得罪佢地呢班客仔。反而紅樹葉可能就要硬食一個"唔夠打就Hack"既死貓，計番起黎，紅樹葉根本唔係得益者，而係hacker事件入面真正既受害者！
我什至懷疑，係咪理想世界班人扮晒野自己hack自己，扮係受傷害果個，之後再屈我地？
但係諗咁多都係冇答案；冇答案既野就唔應該諗咁多。當下呢個moment，我選擇開個party，enjoy下，成班人一齊玩、吹水，咁樣先叫玩遊戲。
當晚，我係私服論壇入面，收到半年冇見過既連戰send俾我既pm：「我很帥」
平時我有個習慣，人地問我點解，我唔想答或者唔識答既話，就會答佢：「因為我型囉。」
連戰問過我：「點解你會諗到用1ag機守奇岩？」我答：「我型囉。」
紅問過我：「點解AL都唔溫書？」我答：「一個字，型。」
所以，"我很帥"呢三個字，係有典故，係有意思。但係我完全唔明白，點解成半年冇見過既連戰，要係果晚pm比我。
我cap圖比樹睇，樹笑左笑，答我：「佢係咁架啦你估佢唔到。」
(出乎意料地，呢張圖仲係到)
星期一，Hacker事件過左一日，樹同理想世界既數據都仲未恢復。理想世界班人用分身，開左個叫夢幻世界既盟，暫時玩住，而樹就繼續用我隻矮人creamyonion。
但係既然理想世界成個盟冇左，"單日理想世界食王"既規定就形同虛設。
小綠問左一句：「大大隻"扎肯"擺係到，唔係唔食掛？」
扎肯最大既特點就係會跌"扎肯耳環"，又名"小地龍"，因為"扎肯耳環"其實就係"地龍耳環"既弱化板，同樣有吸血能力，俾近戰用最適合不過。而且扎肯易打過地龍幾萬倍，被稱為最經濟實惠既boss。
大綠答話：「而家伺服器已經冇左理想世界呢個盟，我地去食王，就算對番果份聯合聲明都唔算犯規丫。」
樹都答話：「冇錯。聯合聲明講明係適用既關系血盟分別係"紅樹葉"、"狼來了"、"理想世界"、"日殺"、"壬生一族"、"wwe"(壬生既分身盟)六個血盟，而家理想世界冇左，佢地果個又唔係叫理想世界，咁聯合聲明當然係冇效啦！」
當日樹等人定完和約，就由紫幽作代表擬左一份聯合聲明，係論壇發佈。聲明內容就係和約條款，另外加上樹要求既一句：「條款內容適用於以上六盟。」
紅都開口：「咁即係捉字虱姐。」
艾爾：「屌就算俾佢地食都食唔到啦，成班都係垃圾分身，唔通由得隻王擺係到唔食！」
連一向少說話既地獄都贊成：「我贊成。而且和約講明只對理想世界有效，佢地重新開個盟大可以叫番做理想世界，但係佢地叫夢幻世界，咁即係佢地主動放棄。」
我同紫幽一直冇出聲。
結果，星期一晚，樹call齊人開食王團，食晒扎肯、蟻后、核心等等小王。理所當然地，韓修修等人好快就知道，並且強烈控訴，但係理想世界成班都係弱雞分身，除左嘈之外咩都做唔到。
樹開食王團既同時間，我同紫幽去左搵戰神傾計。
「戰神，老老實實，查唔查到邊個係hacker？」
戰神仲係到扮野：「點解會問我？」
我答佢：「係人都知你同gm咩關係。」
戰神真以為我知佢同gm咩關係，答我：
「我細佬話hacker個ip同太極係伺服被hack果日登入論壇個ip係一樣既。」
係太極，即係連戰！？即係周星星！？
咪先！細佬？
戰神一下子爆左兩個秘密俾我聽，我立時語塞，咩都講唔出口，我要時間消化下！
紫幽反而比我冷靜：「佢唔係冇玩好耐咩？同埋你唔係識佢既咩？佢點解要hack？」
紫幽呢幾個問題，透露出既潛台詞係：「我唔信！」
戰神好有條理咁答晒三個問題：「係冇玩好耐喇。我識左佢都好耐，以前一齊係魔界果陣仲約過出黎燒烤。唔知佢做咩事要hack。」
然後，我先終於俾到反應：「痴線！有乜可能喎？」
然後，剎那間，就係果一刻，靈光一閃，我突然理解到，咩叫做"我很帥"－－佢係連問點解都幫我慳番，"我很帥"既意思就係：「我唔想講點解。」
然後，我先明白到，點解連樹都會被佢hack埋。
其實好可能佢只係想hack樹，del埋理想世界只不過係順便。
點解我會咁估？因為我同佢係同一種人，我理解佢。我地永遠都唔想人地問咁多自己既私人感受，亦唔想同任何人解釋。(所以係呢到，我亦都點到即止，幫佢留一留白，大家睇得明心知就算，睇唔明就由得佢罷。)
戰神答我：「我都好驚訝，但係事實就係事實。」
其實gm係戰神細佬，呢件事遠比知道hacker係連戰震撼。「我都好驚訝，但係事實就係事實」－－呢句說話應該係我講。
「聽日你細佬就會恢復d角式啦係咪？」我話峰一轉，又帶入攻城：「咁即係星期日會繼續打亞丁，你join唔join？」
戰神對自爆左"gm大佬"呢個身份亳不在意，反而對攻城戰就挑通眼眉：「你確定你星期日會打亞丁？係真打先搵我啦。」
由戰神既說話就睇得出，佢完全睇透晒我既所謂"攻城"係做緊乜。但係一個咁眉精眼企既人卻真心相信我果句"係人都知你同gm咩關係"？
我應該點樣理解呢種反差？
兩個可能：
1. 真係係人都知，得我唔知。
2. 佢覺得俾人知都冇乜所謂。
如果係2，佢一開始唔洗扮野。即係話，好可能以前魔界批舊玩家，即係靜心、亞格斯等人係知道呢件事，所以"係人都知"，咁亦都可以解釋點解靜心會忌佢。
我既回覆係：「我都唔知喎！咁我星期六先再搵你啦！」
星期二，gm宣佈"伺服器遭受外來黑客入侵"，又叫所有被hack既人係論壇或game入面搵佢，但冇講邊個係hacker。
我亦都冇將我同戰神既對話同樹講。
但係我一online，樹就搵我：「gm講左全部都係連戰做。」
我故作驚訝：「有乜可能呀？」
「我都唔信。」樹話：「以我地認識既佢，邊似會識Hack server？何況，咩事要hack埋我先？」
「係囉。」我選擇繼續扮落去：「係gm同你講既？佢論壇都冇講係邊個。」
「今日我一online就俾gm召左去黑房，之後佢問我角式本身有d咩，我答完佢就俾番我，又同我講話查ip查到係連戰Hack。」
我一聽就聽到重點係邊到，即刻打俾樹問佢：
「你有冇同佢講我地有幾十把加滿武防，仲有幾百億係身！！？」
當然樹係冇咁多野－－但係gm咁樣問法，好明顯，一係佢根本冇辦法恢復本來既data，一係gm自己懶得遂個查－－既然懶得查，報大少少數，只要合理，佢都唔會懷疑。
但係樹都即時答我：「冇呀！果個moment佢問我咩我就答咩架啦，邊有人會即時諗到呢d野咁仆街架！」
我由衷地抱怨：「錯失晒機會！果陣洗錢又係咁！」