【真人真事】當年中七AL，我打左成年天堂二，但我無悔！: 56-+500霸主
樹思路清晰，明白呢個敏感話題唔應該係遊戲入面討論，立即打俾我：
「戰神同gm係同一個位出現，得兩個可能性－－
1：『戰神』呢個人物係由gm打坐標傳送。
2：『戰神』同『gm』兩個人物都係由隱形既第三者召喚師召喚。
但係召喚師都要靠gm先隱到形。」
我答番樹：「即係無論如何，戰神係由gm傳送過黎，佢地肯定有路！」
坦白講，自神喻島一役我就覺得戰神有唔妥。成個服入面，有+1000武器既人話多唔多話少唔少，而家什至有+1500、+2000，但係無論+幾，每人都係得果一把，偏偏戰神佢一個人就最起碼show過三把出黎：+1000矛、+1000弓、+1000雙刀。
戰神有三個角式，分別係最常見既"戰神"、以前送奇岩比我地既"價值"、係神喻島參戰既"輸贏"，三隻都係黑妖。我曾經諗過，戰神係咪有錢得濟，幫三個角式分別買一套+1000，所以先有三套？但係有幾多人會咁無聊？
愈諗，就愈覺鬼戰神好奇怪。點解靜心要怕佢？我唯一知道既就係戰神靜心兩個以前都係屬"魔界"，而魔界分裂十居其九同呢兩個人有關。呢點係由戰神對靜心既態度推敲出黎，但係完全解釋唔到點解靜心要怕呢個人。唔通佢就係gm？
樹應該同我諗緊同一樣野，佢回應我：「肯定有路。但係戰神唔會係gm，因為佢地兩個而家一齊郁緊，不過好可能戰神係gm朋友。」
呢個moment，gm一邊係到表演秒殺地龍，戰神就係另一邊撩緊紅隻抽，所以佢冇可能係gm，冇人可以操縱分身操到咁，就算gm都唔得。
我諗番起……一路以黎，戰神都好主動幫我地紅樹葉打理想世界，無論係以前定而家。佢口頭上既原因係：「好耐冇打過，好悶」。一直以黎我都覺得佢只係一個喜歡撩事鬥非既有錢仔，係到唯恐天下不亂，所以「好悶」呢個理由合理得不能再合理。但係呢一刻我卻開始懷疑，係咪因為礙於身份，戰神唔可以直接同靜心開拖，所以一定要透過我地紅樹葉？而所謂既身份，係同gm有關？
突然間，靈光一閃，我諗起一個關鍵人物！！
立即問樹：「你老婆以前係咪同戰神一齊！！？」
樹對老婆呢個詞唔係好滿意：「um……薰以前係同戰神一齊，之後同太極。」
我又隨即回答：「咁你問佢咪知戰神乜料囉！」
「好耐以前問過啦，薰同戰神都係in game識，冇料到。」
呢點我真係岩岩先知，又問樹：「冇同居咩？咁點解佢會同太極同居？」
樹略帶煩厭咁答我：「我點知姐屌，佢又唔係真係我老婆！」
好明顯，樹唔係好想同我討論薰呢個人。我講多句「咁算啦byebye」，就咁cut左線。
戰神、太極兩個人係幫我地紅樹葉成長既主要人物，以前我認為只要佢地係幫我，只要我知道佢地唔會害我，我就唔洗太理會佢地既目的同身份。但係到而家，同紫幽建立左全服最大既同盟之後，我開始覺得有必要理會一下查下佢地；我開始覺得，自己有好多野唔知道，有好多人有好多野瞞住我；我開始覺得，有一絲不安。
又係突然間，靈光一閃，我發現自己同漢高祖劉邦一樣，岩岩建完國就開始懷疑忠臣……
我了解左自己多一分。
電腦前既我係到不停思考，遊戲入面既葉已經跟隨gm對地龍開火。
gm吸住條龍，等地龍不停打自己，就叫大家對地龍開火。
地龍係成個天堂二入面數一數二既大boss，除左體形係一個玩家既幾千倍咁大之外，仲要血量去到幾百定幾千萬，每秒鐘都回幾十萬血，攻擊力又爆晒錶。當初玩正服開放地龍，server成二百幾人聯軍去屠龍都殺唔掂，全軍覆沒，可想而知係幾強。
但係而家gm吸實條龍，我地根本係單方面屠殺。之不過，地龍實在太強，所有人加埋，扣佢血既速度居然仲慢過佢每秒自然回復既速度，根本就打唔入！打左成幾個字，地龍條血bar連郁都冇郁過！
紅係到大叫：「喂gm條龍回血咁快，我咁靚仔都唔夠打啦！」
gm冇理佢。
但係紅一句回血快，就令我諗起冷門職業"霸主"既一招"生命封印"，用黎封鎖敵人血量回復。如果係普通霸主用，魔攻太低，出一百次可能先得一次可以封引到地龍，但係我地紅樹葉最多既就係+500魔杖！
我係血盟頻道發號：「soso你換把+500比莎莎，莎莎用"生命封印"試下！」
贊助武器既事，係紅樹葉內部早已經通天，我番黎後亦都冇再收過新人，所有人都通過我同樹以前制定既trustlevel既考驗，可以放心講野。
soso依照指示換左把+500王朝魔杖俾莎莎。莎莎開始揮動手杖施咒，手上頓時閃出紫光，再諗一諗咒，果然一擊即中，一個巨型火光魔法陣憑空出現，圍住成條地龍閃左一下！
如果按照現實既比例，呢個曇花一現既火光巨型魔法陣，可能有成三個大球場咁巨型！！！
呢一下表演，令所有在場人士都歡呼。但係在場咁多人，有幾多人留意到係莎莎所放？佢地仲以為係gm施放既魔法，係到高呼「gm萬歲」，因為魔法陣一施就立即見效，地龍條血bar終於都向左移動，終於佢都開始扣血！！
當下靈感湧現，所有煩惱一掃而空，戰神既事都可以丟埋一邊，我滿腦子都係點樣運用呢隻+500霸主既各種方法！以前從來都冇諗過要俾霸主用贊助魔杖，亦都冇人咁樣做過，更加從來都未見過咁大個魔法陣！霸主用+500魔杖原來可以咁把炮！
眾人拎起刀劍，隨勢不斷向地龍攻擊，而我亦都冷靜落黎，拎起把間呎量度地龍條血bar，對錶計時。
計完又拎起電話，係三line入面，我同紅同樹講：「照條血bar計，就算呢到咁多人都起碼要打個半鐘，仲未計佢扣半血之後會暴走。」
樹講埋我想講既下半段：「即係如果GM用呢個實力做標準，就算有生命封印，我地三個盟都冇一個可以獨食，要食就必須要三個都係到。」
紅：「邊三個？」
樹：「我地、壬生、理想。」