【真人真事】當年中七AL，我打左成年天堂二，但我無悔！: 55-屠龍會
gm出左一篇文，話有重大更新加debug，所以關服兩日。
同上次一樣，gm依然話係bug。
關服期間，我諗左好多野。睇住論壇入面，成班人係到討論bug唔bug、公平唔公平，我仿佛見到自己以前既影子。
我唔知有幾多人信gm講野，但我諗所有玩得多私服既人都心知肚明係咩事。然後呢班人入面，唔知又有幾多個又會好似大半年前既我咁，係妥協同爆料之間進行一番心理掙扎。
奈何我已經係呢個遊戲既一份子。
由當日選擇妥協開始，我就係局中人，我係呢個秘小圈子既重點成員。係我離開既半年其間，我問過自己好多次，紅樹葉點解會上位？紅樹葉到底係點樣成長上黎？係因為太極？係因為戰神？係因為樹同葉？唔係，統統都唔係。
係因為妥協。
我地放棄原則，選擇妥協。
大半年前選擇左妥協，兩星期前選擇左番黎。我放棄左兩次原則，如果就咁玩完，咪即係一場笑話？
落紅枯樹沙捲葉；
赤映桑榆緣嘯風。
果陣紅改完"紅樹葉"呢個名，我就作左呢兩句。當初只係一點點感興，但既然上半句既蒼涼之象實現左，我唔希望下半句既強勢之象會消失。
過兩日，我番黎後既第二個星期日，終於都開番服。一入去就俾一大抽公告洗版，正如gm所講，真係有重大更新：
第一：除左宣戰血盟、"決鬥"指令同pk場之外，全服禁pk。
第二：所有道具變成自動執，冇得丟野落地下。
第三：開放所有王，另外將巴列斯放左係奇岩pk場、火龍放左去亞到pk場、地龍放左去夢幻島。
第四：移除bug武器。
第五：晚上七點於夢幻島進行測試屠龍活動以測試王既實力。
雖然樹個account冇被移除，但係因為"移除bug武器"，太極果把+1000王朝弓，從此消失。
慶幸既係，薰一上線就同我地講：「樹套+250防仲係我身上喎！」
樹反而有d擔心：「太極果陣只係話d野俾我保管，佢第時番黎玩既話我點俾番佢…」
薰冇出聲。
我答：「理鬼得佢，屠完龍先算，佢係番黎玩先講啦。」
問心，我唔係好care樹把弓。冇錯，樹把+1000弓係好重要既戰力，但係今日，我地有更強大既戰力，紫幽既"壬生一族"，呢一批本來由紅樹葉分裂出黎既戰力，呢一批人數上仲多過理想世界既軍隊，係今日就會同我地同盟。
盟內眾人聽到屠龍，好似都唔記得左"bug"武器同日殺補刀一樣，部份盟員同好多其他人什至六點就到左夢幻島中心既大圓形噴水池廣場等。我都唔例外，一早就係夢幻島等，話晒都係我入服以黎第一次gm舉辦既屠龍行動，太極、以致日殺既事就暫時由得佢，何況gm禁左pk，我地根本冇仇報。
而且我心中最重要既目標，唔係咩屠龍會，唔係咩報仇，而係今晚十點既亞丁城戰。
係圓形廣場上，理想世界既人一堆人堆晒係傳送點右邊，我地紅樹葉既人就企係傳點左邊，即係佢地既對面，中間隔左個噴水池。兩邊就好似左右派咁分晒勢力，當然我地人數少佢好多。
我掃示呢班右派人，果然比我搵到兩把+1500既黃光武。
一把黃光弓，拎住果個就係"光頭和尚"，即係以前既平頭光尚，係人都知。
但係另一把黃光魔杖，持有人叫做"韓修修"，以前根本見都未見過。
兩個黃武人都屬於"日殺"，即係理想世界既同盟，亦即係原始島殺樹果班人，同時係名義上持有亞丁城堡既血盟。日殺既盟主"韓信"同呢兩個黃武人有講有笑，明顯係識左好耐，"韓修修"唔係新玩家。
我同紅樹二人講：「唔洗審，韓修修九成係靜心，換個名又番番黎。」
一講完，紅就走埋去直接問佢：「你係咪靜心？」
「唔係。」
然後紅就係全頻大叫：「啊，韓修修你唔係就靜心就最好啦，亂咁殺人我仲以為你係靜心！」
日殺既人冇出聲。
紅咁做有咩意思？其實冇意思。不過紅拎住把+2000弓，所有人都要忌佢三分，所以佢講咩都得，呢到係實力既世界。
未幾，夢幻島既傳送點又黎左一大批人，正正係紫幽既"壬生一族"，分佈晒成個中間位，人數同右派不相上下。我一直冇檢查過壬生一族名單，所以一直到呢個時候，我先發現小草、煌等等大量紅樹葉既舊人原來都係壬生一族入面！
然後，紫幽就係中間傳送點出現，望一望四周，走向左邊，向我筆直走埋黎。
同時間，我亦向紫幽走埋去。
係血盟頻道入面，我同紅樹葉既所有人講一句：「以後大家唔好再叫佢做咪嚕，改口叫佢做紫幽喇。」
《『壬生一族』邀請『紅樹葉』成為同盟，你願意接受嗎？》
圓形廣場上，中間分散既人逐漸移向左面。
然後，係綠色既同盟頻道上，我say左一句hi。
葉：「hi」
紫幽：「歡迎」
小草：「葉！！」
悟桐勢十朗(aka小明)：「呵呵」
煌：「！！！！」
oasis綠(aka大綠)：「歡迎新同盟！」
……………下刪數十句
我密大綠：「交易結果，滿意？」
大綠：「滿意，多謝。」
當初大綠答應幫我地補刀，條件就係要我說服紫幽對抗靜心。而家靜心名義上唔係到，我地兩個盟仲同埋盟，莫講話佢滿意，就連我都好滿意。我唯一對呢個同盟唔滿意既，就係個同盟名－－"漫畫卡通聯盟"，不過紫幽鐘意就由得佢，反正唔重要。
係分針仲差幾毫米就到十二既時候，戰神冇啦啦彈左出黎，同我say hi。
機警既樹一見到就立即密我：「有冇見到戰神岩岩係邊到彈出黎？」
我仲係同盟頻吹緊水識緊新朋友，邊得閒留意戰神係邊到出現：「冇呀。」
樹：「我無限遠立到，佢係花區到突現出現，果個位冇可能傳到過去。」
我即刻碌去花區到立一立，就係同時間，gm都冇啦啦係果到出現！
樹即密我：「同一個位！」
「我都見到！」
普通人或者唔會留意，但係我地兩個用慣teleport既都清楚明白，呢個微細位意味著d咩。