【真人真事】當年中七AL，我打左成年天堂二，但我無悔！: 57-狼來了
我同樹好早就意識到，私服已經進入左三國時期：理想世界就係魏國，壬生係吳國，我地係蜀國。呢個比喻無論係實力上定係關係上定係人才上都貼切無比。
我立馬做結論：「換言之，GM開放王既條件係：一係大家冇得食，一係大家一齊食，焗我地停戰。」
地龍、火龍呢d大boss會跌boss飾物，有同冇既戰鬥能力差好遠，最重要既係呢d飾物價值連城，如果是但一個盟可以獨食，呢個盟將會籠段整個市場，吸收大量資金，成為超級大盟一盟獨大。所以為左阻止任何一個盟獨大，最理性既結果就係合作食龍。我估GM就係要透過禁制pk區同開放大boss，強逼我地三盟合作，停止我地同理想世界既漫長補刀戰。
換言之，GM已經有心介入。
「紅樹葉所有人，停手唔好打龍。」我想試試我地對呢條龍到底有冇去到"必須"既地步：「睇下冇左我地仲扣唔扣血。」
說罷我地紅樹葉十數人立即停止攻擊，都未用間呎度，停手既同時就睇到條血bar明顯地郁慢左，証明左我地對層龍既貢獻。我對錶對左一分鐘，掌握到時間後，又叫眾人開始攻擊。
但係就係開打後幾秒鐘，廣場右方理想世界、日殺既所有人突然停晒手，然後條血bar連郁都唔郁！
「莎莎放多次生命封印。」
「放唔到呀，話已有效果。」
怪物中左封印效果就唔可以再中，即係話地龍依然係唔識回血，亦即係話，條血bar唔係連郁都唔郁，係慢到你見唔到佢郁！理想世界唔知係回應我地定係同我一樣測試緊，但係無論點都好，佢呢一下停手已經顯示左實力，充分說明左佢地係幾咁"必須"。
紅係電話到叫：「哇佢班人一停手我地連打都打唔入喎！」
樹：「葉你有冇計時？」
我：「我地停左手之後，起碼要打成三四個鐘，佢地停手，應該打到聽朝都未磨完。」
樹：「咁即係佢地都要同壬生聯手先可以磨死地龍。但係壬生已經係我地同盟，佢地要食龍，就只能夠選擇同我地合作。」
我：「okok，就咁，今晚屠龍會之後你直接同紫幽亞格斯propose合作，仲有幾個字亞丁開波，我夠鐘準備下。」
紅又問：「亞丁點打？」
紅理所當然唔知點打，因為我同樹根本冇搵佢商量過。
攻亞丁既戰略，係一番黎我就已經同樹講好左大方向，果陣都未知紅有把+2000，點會有佢份？但就算紅有戰鬥力，佢只係攻亞丁計劃入面既最後一步棋，未到佢行之前紅都唔需要知道咁多野，以免壞事。
反而紫幽係好重要既棋子，透過合作食龍再鞏固紅樹葉同壬生一族各盟員既關係，亞丁就係我囊中物！
我答紅：「唔洗打。陣間十點開始，你睇實理想世界既人。重點係亞格斯、蒼日、韓信同埋光頭、韓修修兩個黃武人，邊個唔見左就話我知，保持通話。」
九點十，我洗開左隻葉，離開夢幻島屠龍會，去亞丁盟屋待機。
十點正，葉offline，取而代之既係一隻teleport，用穿牆上左亞丁城堡右邊一個伸出戰場外面既塔頂，用無限遠監視整個亞丁戰場。
電話傳來紅既呼叫：「日殺走左幾個，光頭和尚、韓修修、韓信都走左。」
果然，佢地有留意葉既離開，開始準備守城。
我就一直係到等。
屠龍會上，地龍終於都開始暴走，連gm都吸唔住，衝向廣場右方理想世界大軍旁，揮尾橫掃！想當然爾，理想世界就係對佢做成最多傷害既一群，當然首當其衝！地龍掃一下尾，再踩兩腳，地下就出現屍體海，就連亞格斯都唔例外！然後地龍向後探一下頭，突然一個火球射向紅，居然死唔去！紅立即退後係電話怪叫：
「哇痴線無啦啦射我，扣左近半血！」
紅身穿+500魔防，都俾佢一炮扣近半血，可想而知呢隻地龍既破壞力。而呢一下火球，亦都表明左紅就係在場所有人入面對地龍造成最多傷害既個體。
但係隨著紅退後，隻地龍就被拉埋黎右邊，即係壬生同紅樹葉地頭。地龍衝埋黎，一台腳，壬生同紅樹葉眾人已經立時分散，結果都係被踩死幾件！
紅一直係電話，好似收音機講跑馬咁做現場直播。
同時間，係亞丁城堡上，日殺五六個人就企左係正門上面，等唔知係邊到既我進攻。
而我，就企係遠方既塔上，一直等。
佢地等我攻；我等佢地走。
我心裡默念：「每個禮拜都係咁等，我唔信你每個星期都黎獨守空城兩個鐘。」
攻亞丁既大方向其實好簡單，我叫呢個戰略做"真狼來了"，因為以前偷亞丁城既戰略又係叫狼來了，所以今次比多個真字佢。
兩次都係亞丁，兩次都係叫狼來了，但呢兩次計劃唔同。
上次，係用creamyonion呢隻無間道做狼，潛入去亞丁。(可參閱20-無間道)
今次，基本上，係原裝正板既狼來了。
我地每次都宣戰，每次都話攻城，但係每次都唔攻，每次都只係假宣戰。等到佢地開始唔信我真係會攻城，開始唔防守、零佈防既時候，我地就黎真，就如同狼來了入面村民唔信真係有狼一樣。
同理想世界交鋒咁耐，我自信已經摸透靜心。如果韓修修就係靜心，即係日殺、理想世界依然係由靜心話事，咁佢遲早會唔耐煩，佢唔會有咁好耐性同我等。
當初岩岩番黎，我向樹提出真狼來了計劃果陣，樹問過我：「如果佢地真係次次都黎守咁點？你唔可以排除呢個可能性。」
當然，發生左咁多事，我唔排除靜心會有所改變，呢點的確係有可能，正因為咁，我地要有壬生一族做backup plan。
而今日既亞丁攻城，正好係一個小小既測試，睇下呢班人有幾好耐性。
我地兩邊一直等，等左接近成個鐘頭，光頭和尚終於都忍唔住，走去密樹，問佢：
「你地到底黎唔黎攻城！」
我地一早對呢個問題set好左model answer：
「攻咩城？」
光頭和尚：「亞丁城！你地宣戰左亞丁！」
樹再答：「係咩！原來葉宣左戰，唔怪得知頭頂有攻城logo啦！葉神早offline訓左喇，可能佢都唔記得左。」