【真人真事】當年中七AL，我打左成年天堂二，但我無悔！: 54-變天
一登入葉，樹就係血盟頻道上面屌我。
我都廢事睇佢講咩，直接打番開部電話，打俾佢－－do左一下都唔夠就通左，對面大罵：
「屌你成個幾鐘去撚左邊呀？」
我無視樹既問題，以為呢個喜訊有優先權：「唔好屌住，岩岩咪嚕答應左我地同盟，破亞丁有望！」
「亞乜野丁丫，隨時account都冇撚埋呀，你上貼圖區睇下！」
我滿腦子問號，仲諗緊到底咩事樹要咁小題大做？有咩事重要過得到壬生一族呢個強大戰力？不過佢叫到，我咪照上囉。
係私服論壇個貼圖區入面，最hot果個topic，係一個玩家拎住把發光既王朝弓，冇乜特別……但係望真少少，左下角既系統欄入面，居然有系統標明《撿起+1000王朝弓》！
我終於明白點解樹咁大火氣！！
上次靜心同平頭張相，講到尾都只係一個大到離譜既傷害數字，從來都冇真真實實咁出現一把+N武器既圖片！但係今次，係證據確鑿，寫到明+1000王朝弓！而且碌落去下面，樓主仲貼埋攻擊力、打玩家既攻擊數字等等等，真係捉姦在床，想乃係photoshop都唔得！
我第一樣諗到既，就係靜心！
成單野，根本就係我地裝平頭同靜心既番板，靜心最叻就係抄我橋，呢件事肯定係由靜心策劃，黃弓人唔係平頭就係靜心！
第二件事，我即刻問樹：「轉移晒d資產未！？」
因為account唔緊要，account入面既財物先係最緊要。
「神早轉左幾十手啦洗你教咩。」
我地觀察左好耐，gm其實係有正職－－所以平時佢番工既時間成個server基本上係冇王管。而呢個鐘數，gm仲未放工，我地有時間做野。
我提一提樹：「記得係丟落地下，唔係用交易？」
樹答我：「點止丟地下呀，我搵soso佢地一齊丟撚左幾十把呀！」
兩個玩家要交易，一係就透過系統既"交易動作"進行交易，咁樣可以保証雙方一手交一手，完全公平地進行交易。但係用呢種方法進行交易既話，gm就可以追查交易品既來源同去向，換言之，交易幾多次都會被人追查到。要唔俾gm查到，唯一既方法就係丟落地下，等第二個人自己係地下執，咁樣gm就追查唔到道具既來源同去向。而樹用既，係第三個方法，同時搵幾個人丟幾個同樣既道具，之後俾唔同人執－－就算查到都唔知邊件打邊件。呢d都係坊間傳聞，冇人知咁樣係咪真係可以混淆視線，不過已經係唯一辦法。
「okok，轉左資產就得啦，account你大把啦係咪先。」我嘗試大事化小，降低樹既怒氣：「唔洗咁火喎，咪嚕一個同盟，我地就多左廿幾三十把+100武，用一把+1000弓換幾十把+100喎，抵到爛啦係咪先，何況把弓唔係你既！」
但係樹點出左問題既根本：「而家冇人講緊把1000弓，係講緊贊助武器呀！通撚晒天喇！第二次喇！仲要斷到咁正！ＸＸ天堂單野你唔係唔知啦，你係gm你會點丫！？」
係呢到要說明一下，ＸＸ天堂，就係第一個因為管理員收錢而被台灣警方收皮既天堂二私服，正正係早幾個月發生，所以呢個時期可以話係人心煌煌，個個有收錢既私服管理員都驚到仆街。事實上，單單係呢幾個月，唔洗差佬出手已經有幾個私服自己執左，亦都係因為咁，我地呢個私服就算過左暑假高峰期都仲有好多人玩緊。
我當然知道ＸＸ天堂呢單野，亦明白樹既意思，佢就係驚gm會怕麻煩，索性執左個私服去。
「um…既來之則安之囉。」
老老實實我都好驚。但係我可以點？突然間，我又諗到…
然後我就in game，係密頻用書面語同阿樹講：
「紅是不是給了三個月的錢？如果gm關服我們可以告他詐騙嗎？」
樹打左句「…」答我。然後又係電話同我講：「人地係台灣你告乜春呀？」
「我打俾gm睇架，佢平時有睇我地d對話。如果佢係咁驚被人拉，咁呢句應該都可以嚇下佢。」
樹又好醒目咁答番我：「人地驚吉恩立定驚你多d丫？？？」
當然係驚吉恩立，話晒係天堂二代理，大公司，但係我冇答樹，因為講黎都冇用。
我拉開話題：「係喎咁黃弓人呢？佢都應該係岩岩買，以前未見過！係咪靜心黎？同埋到底你把弓點跌？」
樹而家先覆述番件事俾我聽，略帶怒氣：
「我殺左個黃弓人之後，問左佢幾句，冇啦啦成批十幾個"日殺"既人係通道彈出黎追殺，我都奇怪咖喇明明有你係到睇住，日殺彈出黎都唔單聲？但係佢地十幾個打我地四個，我仲要紅左，一死跌裝加麻，都冇時間諗咁多，唯有即閃。一邊向後跑入恐龍區，一邊就叫你召走我，點知你條仆街叫撚極都唔撚應！」
「…sorry囉。」
「屌你啦sorry，都唔撚知你去左邊，咁我咪叫薰幾個頂住先我走囉，點知原來日殺入面仲有個黃光魔杖！薰幾個根本頂唔撚到，秒殺晒，我岩岩跑正個草堆位就俾佢地殺左，好跌唔跌就跌撚左把弓！點知班人又on9喎，把弓跌左係草堆佢地睇唔撚到，殺完人就走，on撚99。我咪即刻傳番去想執，但係佢地成堆人封撚左個傳點，我一去就死，死幾次咪打俾你條……」
「check左黃光+幾未？」
「千五呀屌佢老味！」阿樹愈講又開始愈興：「都唔撚洗審，撈埋日殺班人，即係肯撚定係平頭同靜心啦！成班人都on99唔知睇乜春，咁撚大把弓都睇唔到，如果俾佢地執左都冇咁大獲呀！屌佢老母封傳點又要放其他人入去，個新手傳撚左入去又唔撚殺，剩係殺我，咁咪俾人執左把弓囉！我咪即刻屌鳩佢話靜心你都冇撚腦……」
果一晚，樹係電話入面屌左我好耐，將平生所識既粗口講晒出黎。
然後，同一晚，gm話臨時維修，真係關左服。