【真人真事】當年中七AL，我打左成年天堂二，但我無悔！: 53-意外
只有贊助武器先可以單拖補到樹刀，而且亦只有樹先係贊助武器可以獵殺既對象。因為用贊助武器打落樹身上，數字同用+100武器打落普通玩家身上一樣，cap圖都唔可能成為犯罪証明。
所以，肯定係贊助武器。
我立即問樹：「睇唔睇到係咩武器？」
樹答：「打完就走左，剩係知係弓。但係我同戰神射過，+1000弓冇可能咁痛。」
聽到呢句，我開始心諗，唔會係紅玩野掛……比+1000弓更強既武器，唔洗問，全服就係得果把，紅既+2000王朝弓。
我又同樹講：「不如即刻download番個發光檔案。」
發光檔案，即係好耐之前，我地用黎睇+幾多既程式。改板之後我同樹兩個都冇重新下載過，但係到而家，好明顯係有必要。因為如果冇發光檔既話，只要+16以上就會通通顯示做紅色，根本分唔到邊個係+16、邊個係+100、邊個係+1000，連邊個有贊助邊個冇贊助都分唔清楚。
二話不說，兩人立即offline，上網download，裝埋，我地兩個又立即上線。樹繼續去原始島打錢，我就去準備，而同時間紅到底係到做乜？唔知，佢冇online。
係原始島一條必經既通道入面既一個彎位，我已經佈下左天羅地網。soso、艾爾、薰三個+500巫師企定定係到standby，我就用teleport係遠處監視。
果然，樹打錢打左唔夠三個字，傳送點就突然出現一把發出黃光既伊克魯斯弓！
我心裡一驚，紫光+500、綠光+700、白光+1000，黃光？見都未見過！
「黃光E弓。」
樹都好驚訝：「黃光！？」
但係已經再冇時間俾我地驚訝，呢把黃光弓一出現就立即衝入原始島左邊既通道。
佢係想搵樹。
換句話講，佢唔知道原始島內既情形。
唔似得我地，呢把黃光弓既持有人根本冇任何分身可以監視到島內環境，所以佢唔知道呢條通道入面，有一把白光弓，三把紫光魔杖等緊佢。同時間，亦可以確定呢條友深知樹既行蹤，知道樹長駐於此，只要黎原始島左邊就一定可以搵到佢，即係話呢個人一定了解我地。
到底係乜水？我唯一可以確定既就係呢個人唔係紅，因為紅果把係王朝弓，呢把係伊克魯斯弓。
唔理咁多，無論係乜水，人到，照殺！
昏暗既通道入面，一把黃光弓就好似大燈一樣，異常明顯。手持黃光弓既人類直衝入內，左腳剛踏入通道既彎位，立時連食幾發"炎旋爆破"、"冰旋巨鎚"、"風旋重擊"，受三屬性魔法連轟！雖然soso等人只係用緊紫光魔杖，但巫師破壞力驚人，+500已經足夠。係黃光弓仲未趕得上發箭之際，樹已經補上尾刀，一下"七箭"，呢把黃光弓連弦都未被拉過就已經死左，樹亦變左做紅人。
樹對住條屍體問：「你係邊個？」
就係呢個moment，畫面停頓，呢隻一直係原始島監視緊既teleport突然彈左個視窗出黎：「與伺服器中斷連線」左下方既系統欄仲寫住《別人正在登入你的帳戶》……
呢句說話我熟得不能再熟，因為紅成日都咁樣玩我隻葉！
只要你玩緊既時候有人登入你既account，你就會被系統直接踢落線，新登入果個就會入左黎。
但係知道teleport既人就只有我、樹……同埋咪嚕！半年前我離開既時候傳位俾咪嚕，同時將teleport123三個account俾左佢用黎方便盟員。樹岩岩先同人打緊，冇可能係佢，咁即係…而家係咪嚕，即係紫幽用緊我既teleport！
係機會！
阿樹果邊點，我已經唔得閒理。呢個magic moment就係捉住紫幽既最好時機，冇野緊要得過紫幽！
等三分鐘，我再次入番岩岩既teleport，一個account有八隻召喚師，咪嚕到底用緊邊個？咪嚕平時有用收集者周圍收集道具，佢用teleport肯定係用黎傳去有野收既練功點。如果係練功點，咁我肯定，一定係呢個，平時最難入去，亦係最多野收既"諸神熔爐"。
我揀左"諸神熔爐"呢隻召喚師，一登入，果然紫幽就係到打緊怪，於是立即大叫：「咪嚕！！！」
「……」紫幽點點點，清埋手上隻怪，走埋黎，又點點點：「………」
我冇講任何野。
相對無言。
良久，紫幽先打破沉默：
「唉……你隻teleport實在太好用。」
終於，終於，紫幽第一次，簡接認左自己係咪嚕。
我答紫幽：「你一直都避開我。」
紫幽答我：「葉…我唔係避開你…我係，我邊有面目見你…你俾個盟我管，結果搞到而家咁樣，你叫我點面對你，我冇勇氣認我係咪嚕…。」
我冇怪過你。果陣我隨手就拋左個波俾你，乜都冇交待過，任何交接野都冇做，點可能管得好？係我疏忽，講到尾其實係我錯。
但係眼下，千言萬語，盡在心頭，我由番黎開始就諗好左要講既野，而家一句都講唔出口。
紫幽又繼續：「對唔住，葉。」
佢依然係咪嚕。
我依然係葉。
「葉，我真係好對你唔住，原諒我可以麻…？」
……
「你出句聲，我就黎想喊」
……
「……葉」
。。。。。。
電話響起，係樹。一接，樹既粗口連命令連珠炮咁射埋黎：「仆你個街去撚左邊呀屌你！叫極你都唔撚應，跌撚左把弓呀仆街！即刻開番原始島teleport，日殺封撚左我入唔撚到！」
我都唔知樹講緊乜野，亦都唔得閒理佢，唯唯諾諾連忙答應：「啊啊啊okokok。」－－然後就收線熄電話，將葉off埋line。
係"諸神熔爐"入面，我同紫幽坐左係到，傾左成個幾鐘頭心底話，互相表明心跡。
之後，我先施施然登入番葉。