【真人真事】當年中七AL，我打左成年天堂二，但我無悔！: 52-其人之道

誠然，靜心宣佈退出，係我意料之外。

按照我既計劃，本來我只係打算整衰理想世界個朵，以及逼gm介入我地既紛爭。最重要既就係激起眾小盟既怒火，將整個服既輿論導向變做反理想世界，到時候就算紫幽，亦即係咪嚕，佢想保持中立，佢盟員都唔會肯，作為盟主亦只能順從。於是就可以俾到台階紫幽，亦俾到理據等我去說服紫幽同我同盟。再加上gm介入後，一定會勒令班贊助武器收歛。然後我地就可以聯軍攻城，佢地又唔用得贊助武守，結果紅樹葉連同壬生同盟就會係最強一方，一舉破晒奇岩亞丁都冇問題，稱霸整個私服。

如意算盤係咁打。

但係靜心直接宣佈退出，我真係完全冇諗過。呢一著，看似係bonus，其實，俾佢逃過左一劫。

靜心退出，換左形象比較正面既亞格斯上台，對理想世界黎講係一件大好事。最起碼，琴日仲圍埋一齊講緊理想世界有幾仆街有幾霸道既幾個小盟，今日得知換左亞格斯做盟主，靜心仲走埋唔玩，立即怒火全消，又咩大快人心，又咩八婆癲婆乜乜物物咁奚落靜心一番，如果可以擺酒我諗佢地連開二百席，擺夠三日酒。然後……然後成班就當咩事都冇發生過，馬照跑舞照跳。





佢地既心態我好明白，簡單黎講，就係打爆機既心態。喂兄台，魔王死左，連隱藏大佬都死埋，爆晒機啦，成隻game已經玩完左，仲唔封碟托呀？

No！咁就封碟，咁我做咁多野咪即係晒心機！？

現實就係，形象正面既亞格斯出黎發個文、道個歉；派下糖、自插兩野、約法下幾章，然後大家就好受落，嘻嘻哈哈，成件事咁就告一段落。

冇錯，我做咁多野就係晒心機。

靜心輸左場仗？我都輸左場公關……





戰神曾經對靜心有一句評價，我至今記憶猶新：


「…除非佢送俾你，否則你搶佢野佢追到天腳底都會搶番…」


呢個評價，我深信不疑，因為以我自己既觀察，佢的確係咁既人。佢一直都懷疑我，佢會咁順攤就咁退出以後唔玩？除非我都唔玩，又或者server執左，否則佢一定會想辦法報仇，天腳底都照追。所以靜心唔會真係走，我十萬個肯定。開個分身，改番個名，重練一隻，有幾難？更什既，直接用人地既account，邊個知？

我咋咋臨上私服網站cap低理想世界既血盟成員名單，到左第二日夜晚，我又上番私服網站，拎住張cap圖慢慢對。新名單上面，盟主之位已經由靜心變左做亞格斯，然後我再遂個遂個人名對，唯一一個多左既名，叫做"光頭和尚"。唔洗明眼人，根本係人一睇到都知呢條友係乜水－－平頭和尚連掩飾都廢事，新人物個名就咁將平頭改做光頭，佢就係寸到要講俾全世界知：「我就係平頭，我係停左權又番黎呀，吹呀？」





當然吹佢唔漲。只要gm一日冇block佢ip，佢的的確確係可以開新人番黎玩，更何況佢冇大大聲聲發表聲明話唔玩。

但係除左"光頭和尚"呢個人之外，成個名單就再冇多人。

連續兩三日，成個服都好太平。靜心到底去左邊？冇人知。

靜心真係好似唔見左咁。

whatever，唔擔心得咁多。


係呢兩三日內，憑大小綠既穿針引線，紅樹葉同壬生一族終於搞左一次聯合打王，我終於，終於都正正式式第一次同紫幽傾到計。我番黎玩咁耐，今日先真正第一次同咪嚕有互動，老老實實，我好掛住佢，我好懷念以前一齊去打肯特拉獸人、一齊扮係劇情人物做任務打王、一齊白白痴痴無無聊聊既日子。

不過紫幽唔認自己係咪嚕。





而家我地兩個已經唔同身份，有唔同立場，有唔同責任。我唯有當佢唔係咪嚕，就當佢係新認識既友盟盟主，就當我地以前從來都唔識。

打完王，我無里頭地邀請紫幽參加兩日後星期日既亞丁攻城戰。

早係我火起收番soso果陣，就已經向晒奇岩同亞丁宣戰。上星期六打完奇岩，我地攻唔破，所以今個星期日對亞丁既宣戰依然有效。亞丁城堡而家係由理想世界既同盟，"日殺"，即係由"韓信"所擁有。所以名義上，亞丁並唔直接關理想世界事，幫手攻亞丁亦唔應該會影響壬生一族同理想世界既關係。

但係紫幽對我邀戰亞丁既回答係：「我地已經有海音城堡，攻唔到。」

其實想攻既話，邊會有"攻唔到"呢三個字？不過我都冇預過紫幽會答應參加攻城戰，我只係想借呢個問題講俾佢聽，我地紅樹葉黎緊既目標係乜野。


到左星期六晚，樹一路係原始島打錢，一路係電話聽我講解亞丁既攻城戰計劃，突然間……

「仆街！有條友補我刀！」然後唔洗幾秒，樹呆左一呆，叫左聲：「屌，佢單拖殺左我！」





我都呆左一呆，因為呢件事基本上係冇可能！須知道，樹平時身上面著既係太極留低既全套+250防，唔計紅果套犯規既+500防，樹呢套就係成個server最頂級既防具，同戰神係同級數，單拖根本就冇人可以傷到佢！除非……

樹葉二人同時醒悟：「贊助武器！！？」