【真人真事】當年中七AL，我打左成年天堂二，但我無悔！: 樹之章-魔劍薩雷奇

（葉註：樹之章由樹所執筆，屬外傳性質，葉不作任何修改。）

自從葉番黎玩之後，紅樹葉要為補刀行動準備大量武器，洗左一大筆錢，盟倉已經所剩無幾，大家都知葉好鐘意無無聊聊係奇岩唔知做緊乜，

而紅本身係一個好懶去刷怪賺錢既人，所以賺錢依個任務就落左係我依個可以係同一個地方不停刷怪練功幾個鐘既傻仔身上。

原始島，即係恐龍島，成個島都係三五成群既龍仔，我開隻傭兵拎住我把+100聖者之矛，拉四、五十隻去死角位，

掃下掃下，都不知不覺掃左兩個幾鐘，賺左幾億。





係同一時間，葉就係度同SOSO等人，仲回味緊神喻島之戰既戰術同成果。

突然之間，畫面地動山搖左幾秒，成個畫面變晒紅色，系統出現左一句 「魔劍‧薩雷奇 已降落於原始之島。」

葉：「出魔劍，全部人準備去原始島，搶魔劍。」

魔劍到底有幾把閉？首先要介紹下魔劍既setting，魔劍係會以極低機率是但任何一隻怪都會掉落，所以成個世界既人只要打緊怪都有可以會打得到，而同一時間只會有一把魔劍同一把血劍，兩把效果係一樣只係外型有分別。

天堂2每個玩家都有2條血 CP同HP，CP係PVP先會生效既血量。





換句話講，同人打先扣CP再扣HP，HP冇晒先算死。以葉依種血牛黎講CP都係得萬幾，而魔劍主人一拎上手CP就會有九至十萬左右。

魔劍一拎上手係 Lv1 及後每殺十人就會升一級，每一級都會加血加攻加CP加防，可以講乜柒都加，最高可以升到十級，而且魔劍仲識吸血，所以真係可以以一敵眾。

但係魔劍又唔係無敵，英雄就係魔劍既剋星，英雄只要對魔劍作出一下普攻，魔劍主人既CP就會瞬間歸零，得番幾千至一萬血，到時就是但打兩下都可以番屋企。

魔劍主人死亡後，會有兩個可能性，一魔劍直接掉落，在場既人都可以去搶；二就係直接消失。

係我仲未黎得切同大家講魔劍係我手既時候，我已經發現葉佢地已經到達在恐龍島既碼頭。





雖然我外型已經變左做魔劍主人，但係我頭上依然有紅樹葉既盟徽，一睇就知道係自己人。亦因為係咁，我係葉都未開口問到底係邊個拎到，已經衝上去放一個魔劍專用技能 "虛空破" 一下就清晒葉既CP。

再打多兩，三下普攻，再用第二招範圍技能 "真空斬" 打葉同埋其他盟友。

葉：「你想做咩姐，都未升任你打都唔死啦。」

沒錯，係我好似好型既一輪狂風掃落葉既攻擊之後，其實葉同大家既血都係扣左少少，一級既魔劍攻實在太低，除左殺下新手想打玩開PVP既真係得淡笑。

樹：「係我拎到架，人齊就岩晒啦，全部除衫排隊比我洗魔劍。」

經過一百次既生生死死輪迴，魔劍終於Lv10。十級既魔劍會散發出一陣血色既光芒，而我就被光芒所迷惑，拎起魔劍瞄準葉，再次使用 "虛空破"，當葉CP清空之後，斬左兩刀，當我想再用"真空斬"既時候。葉已經死左，成為左我十級後第一位犧牲者。

葉：「…唔係十級左咩，仲打我做咩？」

原因？冇架，我只係想試下威力。而我當然都唔會正面會回答依個問題。





樹：「哇，十級爽好多，打幾下就死，但係用魔劍去暗殺，一死左就靜就會知道係我，我地只可以去食下小王，同埋比你地挑下我機。」

結果，我地就出發去左高達特城，出發去左肯特拉獸人基地。

暗殺：「我地得幾個人，點打黑卡頓。」

我：「睇我表演啦。」

由於魔劍攻高又識得吸血，我做既野好簡單，選擇王身邊小怪，禁一下攻擊，打到佢死，下一個目標，打到佢死……

大約過左十令分鐘，就KO左黑卡頓。黑卡頓今次都好識趣，比左一把S級既小刀 "天使殺手"。

我：「KO，仲出寶，分散搵王，有王就出位置我。」





天堂2野外王重生時間 大約係24~36小時，所以唔係話想打就打，都要咁岩有王係度先得，跟手大家再搵到幾隻王，一樣食花生等掉寶，有出既王我地都打晒，大家就去左亞丁PK場玩。

去到亞丁，紅都番左屋企，都黎左PK場，一見到我一身型英帥既外型，紅忍唔住就話要同我隻抽。

紅：「玩咁耐都未同魔劍打過，黎啦，樹，今日我地要一決高下。」

樹：「好！我欣賞你既勇氣，不過我要同你講，你係英雄，所以你唔可以……」

當我仲同紅講緊，英雄會一下扣晒魔劍CP，剩低萬幾既HP係食唔到紅果把+2000弓幾箭既時候，

紅先手一招"制動之射"就已經將我CP清空，再黎一箭清脆既爆擊，澎，最後送上"斷魂箭"。 就係咁 我就比紅斷左魂。

「魔劍‧薩雷奇 已消失。」

眾人：「…」





樹：「頂，我都未講完，就係想同你講我食唔到你幾箭。」

紅：「… ，我未玩過魔劍，真係唔知一下會冇晒CP。」

樹：「收工啦，我番原始島賺錢。」

就係咁，我既魔劍之旅都未插就已經射左。