【真人真事】當年中七AL，我打左成年天堂二，但我無悔！: 51-收成
邊個係我？
冇人知。我地一直以黎都係用分身，咩血盟咩裝備都有，正正就係草木皆兵，所有人都係我。
靜心會點做？佢一直認為殺手係我地紅樹葉，以佢既性格，佢一定唔會甘於只係用保鏢守，佢一定會反殺，但係又冇証據冇得明打－－所以佢會直接見人就殺！
神諭島之戰後既第二日，我地冇開分身，冇開teleport。我地只係開正身周圍遊蕩，打寶物。
因為今日係收成日，唔洗郁手，只需要等。
由當日收番soso開始，我就開始左連環計：
第一步－收番盟友，破壞本來既和平協議，試水溫。
第二步－草木皆兵，用唔同分身補刀。
第三步－怒而撓之，係咁補刀，有幾仆街就仆街，惹到佢發火。
第四步－奇岩攻城戰，不在場証據。
第五步－等佢殺錯人。
頭四步已經完成，而家就係第五步。
終於到左大概夜晚八點，奇岩頻道爆發罵戰，連日既耕耘終於都結果！
靜心同平頭和尚兩個人，問都唔問，係練功場見到陌生人就殺，居然殺左幾批正常練功既玩家！毫無疑問，佢地當左果班人係連日黎補刀既殺手，一見就殺，仲要係用贊助武器秒殺－－因為佢以為我地係紅樹葉！
我就係奇岩食花生等睇戲。
被殺既人其中兩個屬小盟"風之谷"。風之谷之前已經俾我地既殺手累過幾次，好可能被靜心點左相。風之谷盟主"美國風"之前幾次都係適事寧人，順靜心意踢人就算，直到今次，連同其餘幾個受害既，佢終於都忍唔住要爆了！
奇岩頻道上面，靜心話自己冇錯，一句歉都唔肯道，反指之前幾次被風之谷既人殺。而風之谷等等相關人士亦數番前幾次，話好明顯係有人混入佢地盟，又已經按照靜心意思踢人，今次只係係到打怪相安冇事，反而就被佢殺，而且傷害仲咁離譜！
其間混雜左大量花生黨抽水人士，我作為花生黨之一，等係要加幾句幫下嘴：
「咁好明顯係靜心你唔岩啦，之前你吩咐我踢走殺你既人，而家係你殺左風之谷既人，你係咪應該踢走番自己先！」
靜心立即密我：「呢件事係我地兩盟既事，唔關你事，你最好收聲。」
呢句說話應該點解讀？我會解讀成「我而家好嬲嬲呀！」
一個霸道既人再火起，就會失去理智，冇判斷，失大利，孫子兵法有云「怒而撓之」，就係對付呢種人，靜心呢鋪你已經中晒我計！
然後樹無啦啦係奇岩頻道爆一句：「人地殺你你就屌到人退盟，而家你殺人人地就屌下你都唔得，大盟大撚晒咩！」
一句「大盟大撚晒咩」將罵戰推向高潮，我本來打算開分身抽多幾句水，點知都唔洗開，就憑住樹呢一句，一下子所有長期以黎不滿理想世界既人都湧晒出黎圍插靜心，連戰神都抽左幾句水！靜心由本來同幾個人對罵，變成受千夫所指，一時之間靜心都語塞，半隻字都打唔出。
我又立即密番靜心：「喇，樹講咩唔關我事架我收左聲。」
靜心冇回我。
我都唔得閒理佢，因為我要準備第六步－－引爆。
我用紅既大學acc，入佢大學既vpn拎偽裝ip，再用呢個ip係私服論壇開一個分身account，將事前已經撰好既文章，就風之谷既事件修改少少，就post左上論壇。入面除左力數靜心不是之外，仲話佢有把犯規武器，恃住自己勁就蝦蝦霸霸亂殺人！
一出完文，我又開分身係奇岩頻道叫人上論壇睇。
幾個字之後，風之谷等幾個被殺既就係貼左張萬幾傷害既圖上果個post。終於，終於所有事情都引爆左！
雖然贊助武器不得打普通玩家既例，係我走之前就已經破左。但係收錢經營私服係台灣係犯法，早排已經有個大私服因為收錢俾台灣警方拉左，所以就算收錢都唔可以太揚。即係話贊助武器一揚出黎，gm就一定要介入，我就係要逼佢介入玩家紛爭！
………
呢一晚，係混亂既一晚。
各大練功場只剩低新手。
大部份受欺壓既小盟聚左係奇岩，討論緊靜心同論壇張圖既事，"犯規武器"已經基本上通天。
紅樹兩個人就借機拉攏各盟，唔係要同盟，我地只需要同各盟達成共識，確認一個共同敵人理想世界就夠。
私服第二大既盟，紫幽既壬生一族，整個晚上一直保持沈默。
私服最大既盟，靜心既理想世界，係事件引爆後冇再出過聲。
我，就同戰神傾緊計。
引爆後冇耐，戰神就問我：「你搞鬼？」
我答戰神：「點解靜心同你都一口咬定係我搞鬼！」
戰神：「嘿，神諭島我都係到，我係"輸嬴"。打打下，見到咁有佈局先諗到係你地，最後如果唔係我帶頭落龍，你地都未必殺得咁興鬆。」
我好驚訝。連落龍呢一下都知，落龍呢下敗手，唔係身處其中既人係冇可能感受到，可以確定佢真係係戰場。"輸贏"俾我既印象好深刻，連破我兩次plan，絕對係難纏既對手，原來係戰神！？戰神真係無處不在！
「你幾時擺左隻入理想世界？」
戰神：「果隻"輸嬴"入左好耐，冇人知，見悶就會開黎玩下。下次攻城既話記得預埋我。」
戰神係紅樹葉信得過既伙伴。佢係為左尋求樂趣同刺激，有得打佢就過癮，而我，正正滿足到佢。
翌日，論壇既文章被gm刪左，gm同時宣佈靜心同平頭和尚玩bug，破壞遊戲平衡，將靜心、平頭和尚兩個角式即時停權，又重申冇贊助武器呢回事。
同日，靜心係論壇道歉，並宣佈正式退出唔玩，理想世界由亞格斯接手。