【真人真事】當年中七AL，我打左成年天堂二，但我無悔！: 50-神諭島之戰
趁住保鏢只剩低靜心同兩個弓手，薰等人開左三隻之前殺過人既高級巫師分身，直接走黎清場。靜心捕係"聖者墓"，我地就揀左"凶煞墓"避開佢。三人一到場，二話不說直接向保鏢開火，所謂先手必勝，尤其係巫師呢類皮簿攻高既重炮型職業，邊個打先邊個就嬴！兩件弓手根本冇時間反應就被殺，剩低一個練功既傭兵仲係角位掃緊怪。soso同薰兩個黑球飛埋去，艾爾再一記"火山爆發"，連人帶怪清場！
紅樹兩個就由頭到尾係隔離房，隔岸觀火，自己打自己既怪。
另一邊，係聖者古墓既大綠等人，依然相安無事地練功。據大綠所講，我地掃完凶煞場之後，果班人就去晒聖者墓，同時又黎多左幾個弓手保鏢。
敵進我退，由得佢係聖者墓。
我地就係咁樣玩，敵進我退，敵退我進，打左成日，鬧到雞犬不寧，佢地根本完全練唔到功，又打唔到錢。
翌日，星期一，係海音區既"神喻之島"，野外高等練功區，一個孤立既島嶼。理想世界十幾二十個人係到，實際上大部份都只係保鏢，保護幾個練功既新手，幾個打錢既打手。
我地既目的，就係要逼佢地全部集中係一個地方，再一網打盡！而家
神諭之島既怪物比一般既強，仲要係主玩魔法，打人特別痛，exp又唔係特別多，只有為左打重要道具"屬性石"，或者為左做任務先會黎。平時冇乜人會黎呢到練功，佢地只係被我地殺到走頭無路。
而我，神早就開定三個teleport佈係島內唔同區。
我地直接用琴日，係佢地面前練既分身，混合未出過場既分身，同佢地係神諭島捉衣因！
附圖:神諭島地圖
樹同大綠等八人黎到神喻之島既"水鱗丘陵"，一到步就見到琴日理想世界係聖者墓練功既人，佢地係到打緊"暗黑水龍"，見到面仲同大綠等人say hi。
眾人不發一言，同時換上一身王朝裝備，直接開戰！
箭聲嘯風、魔球炸裂，一下子就滅左佢整團練功團。
「水龍區！」幾條屍體留係原地唔番城，直接係普通頻道叫，好明顯佢地係情急之下用錯頻道，佢地係想向同盟報告被殺位置。
我問樹：「1？」
樹答：「1」
然後直接邀請我入隊。
1係我地既暗號，即係ok咁解，相對而言0就係not ok。召喚師要傳送，首要條件係只能傳隊員，其次就係傳送對象並非戰鬥狀態，否則就會傳送失敗，一失敗就又要等reload。野外殺人時機非常重要，所以我要確定眾人1晒先可以召喚。
一下確定，我加入隊伍，然後施出"門扉頌歌"，成隊就飛左去"柯莉絲區"。
我再發號：「白沙灘方向，三隻弓。」－－當然係用無限遠+teleport偵測番黎。
紅樹眾人聽罷直奔白沙灘，冇幾遠就見到趕去水龍區既三隻理想世界弓手保鏢。雙方短兵相接，直接開火，係大家都係同級裝備既情況下，八打三神仙都難救，我軍八人不損一兵一卒就殺晒三件。
過多幾秒我又向樹確定：「1？」
樹回答：「1」
我回應：「企原地等等先。」
呢個時候水龍區已經聚左大概十個理想世界既保鏢。本來整個神諭島既人員都湧緊上"水鱗丘陵"最北既一個小平原"水龍區"，即係我地一開始殺人既地方，但係白沙灘既八打三，令整個大勢突然間凝住，所有人轉向下方，湧向"白沙灘"。整個神諭島既佈局以致趨勢就係我腦海中既地圖上浮現，憑佈係暗位既三隻眼，我對理想世界既動向暸如指掌，就好似打機有個小地圖咁，我睇晒全局！
我用位於荷莉絲區既召喚師密樹：「組。」
組完後立即向隊伍說明：「二綠明上小路騎龍佯攻詐敗散開拉人走，其他退組傳水龍區後抄。」野戰秒秒都咁寶貴，打字係最浪費時間，所以指示都要儘量精簡，所以隊友既默契就好緊要。
一講完我就將小綠傳到身邊，再準備傳送大綠。趁空檔時候我又換番係"水鱗丘陵"既召喚師，樹老早已經同我建立密契，聽到我話退組傳水龍區就已經好醒目地向我位於水鱗丘陵既召喚發送組隊邀請，等召喚。我一換畫面就accept邀請，即召，又換番荷莉絲區果隻召喚師，小綠已經係我旁邊，我望一望再按快捷鍵傳送小明，又換番去水鱗丘陵，立即召喚，成個過程不消二十秒。
人齊，我向兩隊發號：
「gogogo」、「gogogo」
小明、大綠、小綠三人既任務，就係由"柯莉絲區"出發，係出入水鱗丘陵既必經小路等佢地。三個人扮進入水龍區，見到理想世界就再扮撤退由得佢地追，將佢地分成三批，分別拉去"珊瑚區"、"神諭所"、"柯莉絲區"三個方向。然後樹等人就負責係後方殺死剩低既水龍區保鏢，之後我再傳佢地番柯莉絲區同珊瑚區，遂個包抄、分別擊破，此乃兵法入面既以小圍多！
但係戰場瞬息萬變。雖然七隻保鏢中晒計被分做三隊，不過就係紅樹等五人圍死左水龍區剩低既三件保鏢後，其中一個被拉走既保鏢"輸贏"竟然立時調頭！然後本來分散既三隊既保鏢受"輸贏"帶領，一齊調頭往後走，想番入去水龍區！
呢個時侯再傳送已經趕唔到切，唯有改用plan b－－自細同老豆捉棋佢就教我，每一步都要留後手諗後著，未諗點嬴先要諗點輸，只要多諗一步，勝算就多一分，所以任何事我心裡面都會有plan b做backup plan。
我分別命令樹綠兩隊：「騎龍追，係小路前後包抄！」
水鱗丘陵出入必經既一條小路係一條峽谷谷底，只要成功前後包抄，再穿牆上谷頂打，用地形加強爆擊我地就穩勝。而上谷頂呢件事，唔洗我教，樹見到地形就識做，關鍵只在於夠唔夠快可以圍佢地入谷底小路。
小明等人保持距離反追，"輸贏"三隊保鏢係峽谷會合，冇衝入峽谷，卻再一次調頭，反攻大小綠同小明三人！原來佢地被分成小數既同時，我地就更加小數！呢一下反攻，變成七打三局面，根本冇可能夠打！
但係呢個moment，呢個magic moment，小明三個仲騎緊龍，"輸贏"卻率先落龍準備開打！如果上一著反攻係妙手既話，咁呢一下落龍就係完全敗手，連妙手帶黎既優勢都俾佢抵消埋！一落龍，小明等人就憑住騎龍既速度優勢，係原地拖佢地埋山邊。野戰最講求既就係機動力，跟唔上人，有幾大火力都冇用，"輸贏"兩下破我plan，居然會忘記左呢點！
七人保鏢團被小明拖一拖，紅樹等等五人就已經穿過峽谷，仲穿牆上左山頂，開弓射落地面。啪啪啪啪啪，清脆響亮既箭聲表明每一箭都係爆擊，幾箭就殺一件。
結果"輸贏"呢一下敗手，就決定左呢場戰事既輸贏。
透過呢一戰，加上連日黎既補刀，我確信靜心已經收到我既messages：
1. 呢次事件係純粹針對理想世界。
2. 無論係咩人用咩武器係咩盟有冇見過都好都有可能補刀。
3. 無論係邊到我地都會搵到。
4. 就算人多都唔會夠我地打。
電話中，我問紅：「代入靜心，你會點做？」
紅答我：「比我真係唔理咁多，大拿拿比左幾舊水玩，仲要受你氣？直接用贊助武器秒殺你啦你又吹我唔帳。」
我笑笑口問：「咁邊個係我？」