【真人真事】當年中七AL，我打左成年天堂二，但我無悔！: 47-奇岩戰略 (三)

紅把弓實在太surprise！我忍唔住問佢：「你買既？幾錢？」

紅答：「月租3500台幣，租左三個月。」

果一刻我心入面諗既係：「頂你私服都俾錢玩，仲要係俾月費！真係超級大傻仔！」

我以為我地三個人有個原則，就係唔會俾錢玩私服！紅居然走去俾錢玩，都算啦，仲要俾月費？當然，紅係我老死，更加搖身一變成為我軍主力，我冇可能當面咁話佢，我只係唔出聲。但係紅深知我性格，唔洗我講出口，紅彷彿可以係葉呢個假人既面上，隔住螢幕，通過鍵盤，睇透我既想法一樣：

「如果唔係為左幫你復興紅樹葉，我先唔會咁on9買呢把野。」





外城門爆後，我地兵分兩路：紅樹帶領主力直接破內城門攻入內廳，而我、地獄、暗殺三個人就去爆城牆附近既水晶塔。

三人衝上樓梯走上城牆，兩個行者兩個劍鬥士就企左係水晶塔附近防守。行者，俗稱刀仔，皮簿少血易暈，葉同地獄一個破壞者一個騎士剋到呢兩個刀仔仆街。我唔理咁多，見到刀仔就直接上前，憤力將大刀一下拍落地面，施出"壞滅衝擊”襲向前方眾人，然後捉住一隻刀仔，連揮兩刀，一刀"破甲壞擊"一刀"破滅爆碎"，刀仔毫無還擊能力，被秒殺！

那邊箱，地獄一下"猛擊盾"打向另一件刀仔，封鎖佢所有物理技能，冇得用技能既刀仔面對騎士尤如廢物。但係兩個劍鬥士亦都描準我方既刀仔，走去突擊暗殺！地獄見狀，立即用"復仇"吸住劍鬥士，將佢地既攻擊目標轉成自己。暗殺就趁劍鬥士被吸住，一招"愚弄"，就搞到其中一隻劍鬥擰轉面用個屎忽對住自己！睇好時機，啪啪啪啪，暗殺用技能向劍鬥士連插四刀！

同時間，葉既大刀揮向另一隻劍鬥單挑。不過冇得開狂既葉就如老無牙老虎一樣，得個樣，兩人打一陣就進入左高手決戰既最後階段：比併內功，不停飲橙汁，鬥水多！

被暗殺連啪四刀既劍鬥士立即反擊，連續揮舞雙刀使出劍鬥既成名連技，"三連斬"、"波動連斬"、"波動三連斬"等等好似倒水咁斬向暗殺。劍鬥出名瞬間破壞力高，就係靠呢幾招無腦亂斬！但估唔到暗殺心水極清，早就有準備，連啪四刀後立即開啟"反擊態勢"，無損毫髮將所有技能傷害100%反彈，劍鬥士無腦連放刀技，居然秒殺左自己！





然後暗殺再上前插向同葉膠著既另一隻劍鬥士，又係連啪四刀，咁就啪死左隻劍鬥。剩番一隻冇得啪人既刀仔，二人由得地獄sm佢，直接攻擊水晶塔。

就係呢個時候，大綠等人密我話"螞蟻洞穴"已經搞掂！

我由得葉繼續攻擊水晶塔，切換到螢幕左下角，位於海音城堡停機坪既召喚師。按一下確定，接受大綠等人既組隊邀請，然後放魔法將佢地三人逐個召喚番地城堡。

番黎既三個人有兩個係壬生一族，即係紫幽，aka咪嚕既盟。當然係大小綠佢地自己收既。點解要用壬生一族？一黎，我地貫徹random既原則，二黎，我地要靜心搞紫幽，唔理咩方法有冇效果都好，總之就係要離間靜心同紫幽既關係，呢件事係大小二綠同小明都同意。

「順利？」





大綠：「冇保鏢，我地直接衝入去就殺，等佢地屍體消失先番黎，好順利。」

perfect。

我又換番右上角係螞蟻洞既召喚師，果然唔洗一陣就有一個理想世界既弓手英雄，連同幾個新手到左。

理想世界果然冇派晒所有主力守城，呢次守城戰就如同我既推測一樣，係用黎試探紅樹葉。

即係話，第四步已經成功左一半。

番番去左上角既奇岩戰場。

水晶塔已經被破，但係由紅樹帶領進攻內廳既主力已經差唔多死晒。我、地獄、暗殺三人一落番內廳就被理想世界既魔法掃射，魂歸天國矣。眾人死番去城門前既攻城陣地，整頓軍備，準備第二波攻勢。

趁呢個空閒，我再將大小綠等人佢地傳去螞蟻洞，今次用高級分身加高級武器，連保鏢一齊殺。只要呢邊一直攻城，果邊一直殺人，我地紅樹葉就有不在場證明，證明補刀殺人唔關我地事。





就係我剛剛傳完之際，內廳既理想世界卻衝出黎突襲我軍，完全唔俾時間我地喘息！

紅樹葉三人立即上前防守！葉怒吼一聲，放出英雄專屬技能"英雄的恐怖"，理想世界既低級人士立即呈現恐懼狀態，雞飛狗走咁自動跑離戰場。剩番係到既高級人員卻衝上前直接斬葉！紅樹二人當然唔會放過佢地，不停放箭趕退敵軍。突然間，月殺既盟主"韓信"衝前放出一記"命運之挑戰"，將紅樹兩把神弓吸住！憑韓信既贊助防具，加上聖殿騎士既全方位盾擋，以及無限橙汁白水補血，一時之間兩個弓手都無計可施，只能硬生生不停放箭攻擊既韓信。

靜心把握時機，睇好兩把神弓都被韓信吸住既空檔，一下跑前，一下施咒，天上突然閃出大量流星飛石，係"墜星術"！所有流星同時飛向我軍後方，我軍幾乎全部都被佢扣左一半血，然後靜心又以極快速度連放兩下魔法，直接將我秒殺！

此時韓信已經被紅樹圍死，紅立即追住靜心狂射。靜心放完魔法已經立即逃走退入城內，但係紅窮追不捨，居然直接單拖衝入城內狙擊靜心，未幾就將之射殺，又係城內出番黎，係理想世界既後方殺人。憑佢一身全服最強既贊助重甲，冇人奈得佢何。