【真人真事】當年中七AL，我打左成年天堂二，但我無悔！: 46-奇岩戰略 (二)

其實我只係順勢嚇下理想世界。

點知城門前果班劍鬥士一聽到我大叫，居然毫不畏懼全員衝前！成班劍士仗住塔上有弓手保護，就企係弓手既射程範圍內，不停斬出劍氣射向我！爆晒四狂既我，近身對戰當然係無人能敵，但假若俾人屈距離、受遠程攻擊狙殺，就算有無限既攻擊力又點？根本埋唔到敵方身，空有一身四狂卻完全冇用武之地。

正當我想大叫「Cover me」既時候，樹已經老早察見勢色唔對，帶領幾個弓手上前掩護射擊，我立即龜縮軍隊後方準備插旗。

我早已經將成個mon一分為四，左上既就係葉，其餘三個分別teleport123三隻召喚師。就係插旗呢個空檔，我不停登出登入分佈係各個練功場既兩打召喚師，找尋理想世界冇參戰，在外練功既低級人員。

但係我搵唔到。完全搵唔到。





唔通靜心真心想同我打城戰？真係諗住打防守？

呢個時間葉已經插完旗，城門前喧嘩亦已經停止。我軍傷亡者直接係陣地番生，眾人再補一次buff，樹葉soso艾爾等幾個英雄不斷向所有人施放"英雄的祝福"，咁樣眾人就算戰死後身上既buff都唔會消失。

然後離遠就見到，複活後既亞格斯再親率劍鬥士部隊係城堡後方衝出黎，今次仲混有暴君、行者等等近戰，連as都在場！

「吼！！！！！！！」

葉舉起大劍向前揮拳，再一下大叫，係"進擊"既動作－－開戰！





紅樹葉人數處於劣勢，所以我地將戰線控制係塔上既射手範圍外，以免被上下夾攻。樹企係後方，手持太極留低果把+1000王朝弓，開啟"精準目標"，專門狙殺防禦力低既行者。第一個受靶既就係前無間道as，佢渣住把刀仔，都未埋到我地身就已經被樹射死！

但係亞格斯都唔係善男信女，拎住+500雙刀，著住一套+125王朝重甲同+125王朝飾物，憑藉劍鬥士極高既瞬間破壞力，轉個彎衝上前打算襲擊我軍既炮團－弓手巫師！手持+500魔杖既艾爾只係剛剛向前方射出一個"火山爆發"，亞格斯就從旁現身放出佢既得意三連環"三連斬"－"波動連斬"－波動三連斬"，KO Perfect！

葉係第一場大將單挑已經用盡四狂，要再開就要等技能cd，即係cool down。但係四狂呢種變態技能cd時間接近半個鐘，要冇狂既葉阻止亞格斯既屠殺，只能講句，有心無力。

就係亞格斯係炮陣橫衝直撞大開殺戒既時候，本職係行者，手持刀仔既紅，突然換左一把王朝弓，一箭、兩箭，亞格斯就咁就訓低左！紅再射向一個身穿輕裝既暴君，一下爆擊，僅次於破壞者既血牛就咁被紅秒殺！！！

呢個就係紅既Surpise？





係紅樹葉頑強抵抗下，本來人數居多既理想世界近戰團居然呈現敗軍之勢，人數遂漸減少。塔上既弓手巫師見形勢逆轉，紛紛叫出坐龍，打算直接由塔上面穿牆落地面助攻！

紅樹二人見到塔上魔法陣四起，一齊開啟"極限迴避"，唔理四周既刀手，把握機會衝上前！二人仿如事前排練過一樣，一左一右兩把王朝弓同時指向蒼日。連續數箭射上去，就算係+250防既蒼日都抵擋唔住，果個用黎召喚座龍，不停旋轉既藍色六角星魔法陣就咁憑空消失，蒼日係塔上被射殺。

同時間，係我個mon右上角既召喚師終於都搵到理想世界，就係"螞蟻洞穴"，新手地區，三十幾level場。我即刻用駐紮螞蟻洞穴既召喚師同大綠小綠小明三人組隊，再將佢地召喚到蟻洞準備屠殺。

我又望番螢幕左上角既葉。

本來係塔上既理想世界遠程部隊已經穿牆落左地面，但係佢地既近戰已經死得七七八八，係戰場上弓手巫師冇左近戰保護，就算有贊助武器都不值一晒！有紅樹兩把弓，加上我軍陣地就係後面，所有人一死就即刻係陣地復活。後方仲有主教小愛不停補血，莎莎霸主既血盟buff，一放就係成個血盟一齊加，同埋超強技能"帕格立歐之心"，成個血盟一齊回血，紅樹葉既軍隊好似殺極唔完一樣，不停死完又衝死完又衝，將理想世界既遠程部隊完全瓦解。

理想世界既最後一個弓手倒下，紅樹二人隨即上前一人幾箭，外城正門就咁爆左。

紅到呢個時候先彈一句：「sur唔surprise！？」

好Surprise。但係而家打緊攻城戰，我唔得閒彩佢。





我只係打左兩個字回應：「+幾」

佢係密頻show俾我睇，竟然係一把+2000王朝弓！！！成個server應該再冇一把武器係強過呢一把弓，真係夠晒surprise！！！

唔理紅係邊到得番黎，加埋呢把弓，計落，我地紅樹葉而家已經有五把贊助武器，分別係soso、艾爾、薰+500法杖、樹+1000弓、紅+2000弓。而理想世界，已知既都係得五件，亞格斯+500雙刀，平頭和尚、蒼日+1000弓、靜心+?法杖、韓信+?雙刀。

純以贊助武器黎講，經過半年既變化，紅樹葉居然仲強過理想世界！理想世界而家比我地優勝既地方，就只係佢地人多有錢，除左贊助武器之外，理想世界幾乎所有人都持有+100武器，人數仲比我地多。正正好似樹咁講，紅樹葉係一支遊擊隊，理想世界係一支正式既軍隊。