【真人真事】當年中七AL，我打左成年天堂二，但我無悔！: 48-奇岩戰略 (四)
理想世界呢一波攻勢人數唔多，憑我軍五把贊助武器：紅+2000弓、樹+1000弓、薰+500魔杖、soso+500魔杖、艾爾+500魔杖，合共兩把神弓三把神炮，而佢地就只得靜心一個贊助巫師係到，仲要俾紅狙殺，根本就攻唔陷我軍陣營。
係城戰入面，最關鍵既一點就係巫師同弓手。佢地就係大炮，係火力最猛既部隊，但同時亦係最脆弱既部隊，係戰場上所有其他職業都係為左保護佢地而生存。但係玩贊助既巫師弓手唔單止係大炮，佢地係坦克－－有裝甲自保，而且火力更猛更強大！我地紅樹葉五架坦克全力狙殺靜心，然後再輾過理想世界既大軍，我地又再次攻入內廳。
大廳一個人都冇，我冇懷疑。因為奇岩城堡既水晶塔俾我、地獄、暗殺三人破壞左，復活時間延長，我估，佢班人根本趕唔切番生，囚禁係地牢入面！
我下令：「未番生，紅樹分兩路爆塔！」
直接去封引城堡水晶係不智，因為封引需時五分鐘。我地人少做唔到人牆，無論有幾多坦克係到，敵軍只要死衝，用自殺式襲擊，係五分鐘內必定可以殺死我阻止封引。但係只要三座水晶塔爆晒，佢地每死一次就要等成八分鐘先番生，到時候我地唔洗守，可以直接攻佔城堡！
同時間，小明密語傳來話搞掂。一時間我真係分身不暇，我唯有將葉暫時用"跟隨"自動跟住樹跑去左邊既水晶塔，又立即切換到下面視窗召小明等人番海音，都冇時間問佢地咩情況，又再換番螢幕左上角既葉。
一換番黎，就係嘭一聲！利箭一擊剛剛好將薰射殺－－敵軍原來唔係未復活晒，係佈左陣防守水晶塔！水晶塔附近空間細，既適合巫師亂轟，又同時增加巫師被殺既風險，係一把雙面刃。但係敵軍弓手多，呢把雙面刃明顯對理想世界有利。我地都未入到水晶塔房，作為坦克既薰就已經被幾個+100弓手遠程伏殺，完全阻止唔到。然後樹同一眾弓手就上前同敵方弓手換射為薰報仇，我同幾個近戰亦衝前斬人。
但係我留意到薰一路留條屍係到唔復活。
薰傻傻地係盟入面問：「點解冇得揀返回攻城陣地？」
眾人即係sense到咩事！
我相信，呢一刻，除左薰之外，所有人心入面都係：「仆街！支旗有乜可能咁快俾佢拆左！！」
我地由城外衝入大廳，再係大廳打入水晶塔，比到盡都唔過一分鐘！就算係一隊+100劍鬥，一分鐘內衝出去再拆旗？
冇可能！
……咪住……+100劍鬥冇可能，+500呢！？
係呢一刻，我先醒覺到，點解我地頭先防守陣地咁順利！！根本唔係因為咩坦克唔坦克，係因為亞格斯、平頭、蒼日三個都唔係到！！頭先城外一戰，呢三個人根本冇出現過！！
中計！
陣地係成場攻城戰只能夠召喚一次。陣場被拆，意味住我軍一死就要死番歐瑞城，跑番黎一程就要成十幾分鐘，正常既情況下呢場戰我地已經輸左，但係我地唔同，我仲有放係奇岩城鎮既teleport，最後一招奇謀！
我係盟入面宣佈：「陣地被拆，大家死左既話就番歐瑞，我用召喚師召奇岩。」
然後我本埋條命，起勢咁打塔，希望死前可以將之攻下，但係隨住時間推移，理想世界既人遂漸番生，理想世界本身人數已經係我地兩倍，又多+100武器，係水晶塔仲有近一半血既時候，我果隊就被送番歐瑞。
係歐瑞一重生，原來紅都係到，仲同我揮手say hi－－分兩路爆塔，一座都爆唔到。
睇一睇時間，原來已經打左個靚鐘。如無意外，今次召番去奇岩整頓好後，就係最後一波攻勢。
呢個時候我先可以抖啖大氣，放鬆全身崩緊既肌肉。
以前都講過，打一場攻城戰其實好累，緊張既心情伴隨既係心臟狂跳同肌肉崩緊。但係緊張只會壞事，就係咁我先會中計，俾佢聲東擊西、暗渡陳倉。
係準備最後一波攻勢前，我問大綠：「岩岩殺人點？」
大綠答我：「個保鏢唔係好強，我地直接連保鏢殺，佢地屍體消失之後先傳走。」
完全係我想要既效果。
我再用teleport監視四周，已經冇人出黎練功。想當然爾，理想世界突然轉守為攻，只有一個可能性，就係佢地已經排除左紅樹葉既嫌疑，憑藉攻城戰同大綠幫手，我地成功制造左不在場證據，第四步已經搞掂，剩下既係紅樹葉同理想世界既遊戲時間。
我就眾人召到奇岩城堡附近既海邊，全軍+buff，已經剩番四個字攻城時間。
暗殺傳來軍情，理想世界幾乎全員齊集，成四十幾五十人聚集係城堡前既野外戰場等我地黎。我邊有咁傻豬同佢正面打？全員準備好後，就係城堡後方既海邊直接穿牆上山，直接穿牆入城堡！
一下子我軍突入封印室，迎面見到既就係靜心韓信同幾個近衛，霎時間佢地都唔識反應！所謂先手必勝，我地乘亂將眾人一舉擊殺，然後我直接上封印台封印！
系統立時向兩軍宣佈《紅樹葉開始封印》。
野外既理想世界大軍見狀即蜂湧攻番入城內。紅樹葉擋得一樓兩個門，又擋唔到二樓兩個門，情況根本一面倒。平頭和尚一個箭步就係二樓越過我軍，都未踏入門口，影都未到就幾箭射向我，然後後面再十幾個弓手掃射。
開始封引後一分鐘都冇，葉戰死。
一分鐘都冇，我地紅樹葉就輸左。
雖然預左會輸，但我冇預過會咁快，仲輸得咁難睇。
實力既差距，係咪真係幾多計謀都冇用？
落紅枯樹沙卷葉……