【真人真事】當年中七AL，我打左成年天堂二，但我無悔！: 45-奇岩戰略 (一)

今次奇岩攻城戰，既冇戰神，亦冇三聯幫，就連紅樹葉都唔多人，我根本冇諗過要打贏。

呢場戰事純粹係一個煙幕，係一場戲。

靜心一直都試探我地到底做緊乜，攻城戰就係靜心最好既試探機會。如果攻城其間佢地派人出去練功，而又冇俾人補刀，就可以肯定呢一連串既補刀事件關我地事。咁樣理想世界就搵到理由，可以明正言順將所有野入紅樹葉數，連埋一眾被拖累既小盟開我地波。

所以我軍既目的就係要一邊攻城，一邊係出面補刀－－輸贏與否根本唔重要。

紅係新加入，唔算主力亦唔算出位，參唔參加攻城戰都冇乜所謂。我本來打算叫紅開樹既角式扮樹，等樹可以係出面專心補刀，但係紅死都唔肯，佢話：「等陣攻城有surprise俾你呀！唔用得樹！」





冇計，要其他人扮樹既話我完全唔放心，唯有叫樹唔參加補刀專心攻城。

而soso艾爾薰幾個有+500武器，照常理係紅樹葉攻城主力部隊，冇可能再分心玩分身，所以要做好場"戲"，佢地一定要全程參加。於是，補刀任務就落係壬生一族三人，大小綠同小明身上。我係紅樹葉既盟主，攻城戰入面既職責係做指揮工作，唔洗直接參戰，所以我仲有大把時間用teleport做司機。

直到開戰前一刻，我地紅樹葉一共只有約二十幾人，全數聚集係奇岩城鎮。

一到十點正，全員係東門出發向城堡進發！

一直走到奇岩城堡上山既小路，終於見到理想世界人員。包括蒼日、平頭和尚兩個已升級成+1000既弓手在內，兩隊遠程部隊就聚集係城堡正門左右兩方既塔上。而正門前既，就係亞格斯率領既一隊近戰部隊，近貼住城門，見到我地上晒山都唔郁，佢地係採取守勢。





我看在眼裡。

今時唔同往日。以而家理想世界既實力，洗鬼同我地打防守？直接係城堡外既戰場開殺，連旗都可以唔俾我地插，我地完全冇反擊之力。佢地之所以要打守勢，係要我地疲於進攻，無時間用正身攻城之餘又用分身補刀，咁就減少一個變數，可以完美地進行靜心既"試探"。

我有點兒不滿。冇錯，的的確確係我做既，但表面證據根本唔關我地事，你班人咁樣懷疑我，透露左理想世界對我呢個岩岩番黎，乜都唔知既葉係完完全全不信任。

就係城下，我將"跑步"切換成"行走"，葉單拖行上前，向正門直走，走到剛剛好係弓手巫師既攻擊範圍一步之距，同亞格斯對望，再用"勝利"動作舉起發光既英雄武器無限滅斬大叫：

「吼！！！！！！！！」





半獸人既吼叫聲霸氣懍然，大有張飛係長板叫陣之勢。

大叫後，我回頭就走。

就係我回頭既同一時間，亞格斯居然一個人衝上前同我單挑！

係時候俾理想世界見識下…我已經唔係當日坐係奇岩皇座上俾平頭和尚一箭秒殺既葉！更加唔係當日四人攻城戰差少少就被亞格斯秒殺既葉！！

就係亞格斯衝到葉背後，準備開刀既一瞬間，葉突然發難大叫一聲，放出"超越之體"，60秒內爆發鬥志突破力量解限，回頭就係一記由天斬落地既"破滅爆碎"，來戰吧！

雙方軍隊都屏住氣息，靜觀呢場大將單挑！

亞格斯受完一刀"破滅爆碎"，用雙手揮舞+500雙刀，掃出"波動連斬"反擊。

但係+500雙刀，同戰神既+1000雙刀比起簡直係蚊脾同牛脾！





根本唔夠喉，打得完全唔痛快，葉直接將上身既裝甲脫下，裸露上身同亞格斯對斬！亞格斯見狀立即揮出"波動三連斬"，果然葉立即噴血，一瞬間就噴到7000血以下。時機已經成熟，葉隨即著番上身裝甲，連叫三下開左三個技能！

亞格斯好清楚葉既職業"破壞者"既特性，當HP低於30%既時候就可以連叫三下，"爆三狂"，一爆起黎攻擊力暴增，遇神殺神遇佛殺佛，所以一直留有後著。亞格斯一見到葉連叫三下，就即刻使出"武器封鎖"，強制解除葉既大刀五秒，又立時對自己施放"最終秘密"，30秒內增加三成攻擊力，隨即再"三連斬"、"波動連斬"、波動三連斬"等等等等，連環劍招有如狂風掃落葉一樣，務求係葉解除武裝既5秒內致其於死地！

平時單對單，一旦中左武器封鎖可以立即逃走。但係而家係兩軍對壘大將單挑，邊個走先即係邊個認輸，霸氣士氣盡失。葉就企定定係到，而空手硬接亞格斯既連環劍法，出奇地冇血又冇武器既葉連食數招卻完全冇事！

原來剛剛連叫三下，根本就唔係"爆三狂"，葉只係開左其中一狂"狂信者"，其餘兩下係"勇氣加護"、"戰鬥咆哮"，分別加防加血，亞格斯中左計！五秒後葉再次拎起大刀，連叫兩下放出其餘兩狂"狂暴加護"、"狂暴戰士"，趁住號稱第四狂既"超越之體"效果仍然係到，一秒內連續向亞格斯揮出三四刀，一瞬間，四狂大開既葉就秒殺左亞格斯，亞格斯連飲橙汁既時間都冇就訓低左。

呢一刻，所有人都睇到目定口呆，冇人預料到呢個結果。

除著我面前既亞格斯倒下，我順勢大叫：「仲有冇人？你班雜魚唔要命既就同我上黎！」