【真人真事】當年中七AL，我打左成年天堂二，但我無悔！: 38-戰神

我仲係當日offline果個地方，果個奇岩附近既無人沙灘。唔同既係，我身上發出英雄既光芒，手持既係一把+100英雄武器"無限滅斬"，係阿樹用百幾億幫我買番黎，gm直接放入角式身上。

我召喚條座龍出黎，騎係上面，用座龍游水番奇岩。

沿路一直冇出聲，我只係靜靜係河邊泛舟，丫唔係，係泛龍，就當係泛龍舟。

我將畫面開到最靚，將所有技能鍵、對話視窗等等通通關閉晒。仔細觀賞一下，其實天堂二既景色真係好靚，做得好唔錯。一個人泛舟，欣賞旁邊既湖光山色，更有幾分詩情畫意。回想以前每日打打殺殺，腦海入面剩係諗點樣攻城，點樣殺人，有幾可有咁樣係到靜靜地睇風景？忽然覺得，咁多好風景擺係面前，我以前連睇都冇睇過，好浪費。

係河上遊左幾分鐘，我細心欣賞四圍如畫既山色，不知不覺就到左奇岩。





我冇入城，唔想咁快被人發現，掃我睇風景既雅興。

沿住奇岩上方既死亡迴廊一直走，好快就會到達蜥蝪草原。蜥蝪草原係"里多蜥蝪人"聚居地，四十幾級既怪物獵場，以前最適合岩岩二轉既弓手係到單練，唔知而家變成點？

一睇，成個地型唔同左。右手邊多左個唔知係要塞定山寨咁既野。我打開地圖望望，原來舊野叫做"地龍邊境要塞"，係改板後新增既系統，可以俾人隨時登記進行要塞戰，打左番黎可以賺寶物或者有專屬練功場等等。

再行前望望，忽然系統話《進入戰場》，隱隱約約傳來既刀劍聲將我睇風景既心情一下子掃光。凌晨四點都有人打要塞？我戰意漸起。

我實在好想試下新系統。更重要既係，我想試下把新刀。呢把+100既無限滅斬，未加buff攻擊力已經有五千，以前果把爛刀，加完buff都係得三千幾，我真係好想知道爆左狂後我會有幾強，會有幾暴力。一諗起我就衝左入去。





而迎面既，正正係戰神。

「……」

「……」

戰神：「你係樹…定係葉？」

「我係葉！」





戰神：「…哈哈。終於番黎喇？打一場？」

戰神手持既係雙刀，我未下載武器發光程式，唔知佢+幾多，不過我入黎本身就打算試刀，打一場正合我意！

「好！你幫我加buff先！」

戰神用娃娃幫我地兩個加滿晒buff，戰神換左一把刀，我立即同佢講：

「唔洗換刀，用番本來果把啦。」

「好。」

開波！戰神一下連技斬落黎，即使身穿加滿左既最新最高級既王朝白金重甲都被佢扣左幾千血，我知呢把肯定係+1000雙刀。

我望實血量，兩秒半左右我已經被佢斬到得番六千血，即係話已經係30%以下，夠血開狂！





f1f2f3連按，立即爆三狂！打開狀態欄一睇，86772！居然有八萬幾攻！完全超乎我想像！我唔知戰神+1000既攻擊力有幾高，但係我知道，係呢一刻，我就係真正既戰神！

爆狂後既葉一秒斬兩三刀，單靠吸血已經可以保持血量全滿。戰神都立即feel到唔妥，唔再使出連技而改用普通攻擊，什至開始飲橙汁！普通人係唔會感受到呢幾秒間既微妙分別，係外人眼中我地只係兩個傻佬不停互斬。但係我地兩個沉淪殺欲既人完全明白，咁樣係意味住戰神已經唔夠打！連技雖然攻擊力高，但係用技能攻擊係冇得吸血，所以加滿buff既近戰到左生死相搏時刻，係唔會再用技能，只能用普通攻擊互斬，憑自身既攻擊力不停吸取血量，務求成為最後一刻企係到既人！而戰神係呢一刻，即使靠+1000雙刀既攻擊力吸血都保持唔到血量，要用瞬間體力回復藥回血，好明顯，八萬攻擊力已經遠遠凌駕於戰神。

可惜，戰神就係憑住橙汁成功挨過左爆狂既三分鐘，冇狂後葉被斬多幾下就訓低左。

戰神勝。

「呼，厲害，真係刺激，你走左之後好耐冇試過打到心跳加速。」戰神繼續：「你岩岩先番黎？知道你盟既事未？」

我訓係地下答佢：「岩岩番咋，咩事？」

戰神：「你望下個血盟視窗。」





我望一望……盟主變左做地獄？

附圖：葉爆狂後能力表(PS:打怪時影落)