【真人真事】當年中七AL，我打左成年天堂二，但我無悔！: 37-回歸，online

考完al之後，樹就繼續玩番。佢話：

「考緊al果排真係冇on過，而家考完冇野做，咪玩番囉。」

我從來冇問過樹任何關於遊戲既事。我連隻game都del埋。紅樹葉點、咪嚕管成點、奇岩有冇攻番等等，我好想知，但係亦好怕問。

唔係怕知道答案，我係怕自己再跌入呢個黑洞。

我好清楚明白自己係一個點既人。一旦投入一件事就會投入到廢寢忘食，係真真正正既飯都唔食。一日24小時都放晒入去，上腦呢個形容詞都唔足以形容。我投入既程度直頭係融合，人機合一。online既時候唔在講，offline既時候我都會上巴哈、透視鏡等遊戲網站同大型討論區，研究各種職業技能，一係就思考攻城既戰略，再唔係就諗pk技巧，鑽研各種細節、規定同遊戲設定，我可以話係玩透呢隻game。





就係因為咁，我連書都唔溫就去左考al，結果考成點，心照。

所以由考完，到放榜之後，我都盡量避免自己再接觸天堂二。我同樹講：「就算有野都唔好搵我，我唔想聽關於天堂二既任何野。」

一直到到九月中，差唔多半年時間，我都冇再接觸過天堂二。我以為我好成功咁戒甩左呢鋪癮，點知阿紅入左大學之後，話太悶太多時間冇野做，居然番左黎玩天堂二，仲係咁遊說我番去玩：

「你果陣成日話我玩一陣就唔玩，丟低你兩個。而家我呢個紅番左黎，你呢個葉又唔係到喎，仲點叫紅樹葉姐？之前就話考試姐，你而家又冇野做，打下機有乜所謂。」

紅日日都係講，我唔理佢，佢仲搵埋樹黎一齊遊說我：





「你玩玩下丟低我一個自己走左去，幾咁悶。番黎啦，而家改左板，開放左地獄島原始島，有暴龍打。仲開埋英雄，用50億就買到喇，番黎試下新野都抵啦。」

英雄，我玩咁耐真係未做過。係正服入面，每個職業得一個英雄，要做就要打奧林匹克pk賽，每期入面每個職業最高分果個先做到英雄。係正服未開放英雄之前我已經走左，私服又未試過做英雄，真係想試下。

英雄有咩著數？我都未玩過唔係好清楚，剩係知道有得用最高攻既英雄武器，武器同自己個身都識發光，仲有英雄專用技能，同埋英雄專用頻道，全世界都睇到你講野，真係好威威咁。

仲有地獄島同原始島，又巴列斯又恐龍咁，俾樹講講下，我又真係心郁郁想試下新野。

「唔止英雄，gm大改板，四大陵墓既打王任務都開放埋喇，改左好多野，同埋而家打錢又易左喎，我送個英雄俾你都得。」





能夠令老玩家回流既，無非都係新野姐。就好似你同個ex分左手，俾佢block埋facebook，都依然念念不忘，係咁問朋友佢既動向一樣，因為你忘記唔到佢，你心入面依然有佢，即使個ex令你衰左al。

其實我已經被樹打動左，好想試下d新野：

「我都冇錢，有英雄都冇用啦，把英雄武器仲要冇得+，又冇+100武，有鬼用咩。」

有人叫呢d做欲拒還迎，我叫呢d做矜持。

「加埋都係幾百億姐濕濕碎啦，英雄加埋成套加滿武防完全冇問題，聽日維修完即有。」

「咁我多謝先喇。我del左game，download完就上黎玩啦。」

四五日後，我重新下載過天堂二。特登揀左凌晨四點鐘，打開天堂二。

帳號: leaveleave




密碼: **********

登入中……

事隔半年，終於番黎。