【真人真事】當年中七AL，我打左成年天堂二，但我無悔！: 39-雕欄玉砌

我繼續檢查份血盟名單，除左盟主變左做地獄之外，仲多左一堆唔識既名，一堆三聯幫既人。三聯幫？查一查同盟，我而家先發現原來我地同皇族同三聯幫已經冇同盟關係，睇怕粒的冇玩後三聯幫都散左。

來回確定幾次，係名單上面我好肯定冇左近半數人。就連咪嚕、艾爾、soso、連戰、小草等骨幹成員幾個都唔係到。唔係冇online，係真正唔係份名單上面。

我問戰神：「到底咩事？」

戰神避重就輕咁答我：「我只係知一半唔知一半，廢事搞亂你，你搵樹問下啦。」

但係凌晨五點，血盟內一個人都冇。





我係橙色既奇岩地區頻道講左一句：「爸，我回來了。」

估唔到又有個叫"oasis綠"既回我一句：「不要這樣打我媽媽！」

然後又有一個叫"薄荷綠"既人回多一句：「難道你手不會痛嗎？」

難得有人咁夜都咁有興致，但係呢兩個人我都唔識，佢地回我歌詞，應該都係唔識我。

城塞戰我已經冇乜心情打，告別戰神，我用"返回卷軸"番左去奇岩。一番到去，就見到果兩條友，oasis綠係人類巫師，身穿王朝法袍一套，手持王朝法仗；薄何綠係女精靈，身穿帝國聖軍重甲。兩套都係s級裝備，睇黎呢兩個人都玩左一排，而oasis綠一身行頭更加明顯地係有錢人。





呢兩個人係同一個盟，盟徽以前未見過，睇一睇個名，叫「壬生一族」，盟主肯定係睇鬼眼狂刀睇上腦。

然後我再去奇岩既"商業區"行下。奇岩城鎮係分成幾區，AI既武防店分布係其中兩區，呢兩區就俾gm劃左做"商業區"。呢d商業區只有亞丁同奇岩有，亦同時係全服僅有既幾個安全區，冇得任意pk，所以所有人都聚集係"商業區"擺攤。而奇岩入面原本賣武防既npc就全部移晒去奇岩廣場，呢個係一個幾方便既設定，主要係廢事多人聚集係廣場，一番城就lag爆機。

不過，我望一望而家既商業區，放眼落去幾乎全部都係掛緊壬生一族同理想世界既盟徽，我記得以前呢到係一片黑底紅葉紅樹葉既人海，而家卻一個都冇……

好陌生。

但係再望真d，果個係中間掛機賣野，打住「全服最靚屬性石，唔靚包換」，叫"仙瑞黛拉"既人，咪就係咪嚕既分身？點解變左做壬生一族？





我跑番去奇岩廣場，果兩個乜乜綠仲係到，即刻問佢地：

「你地識唔識果個掛網賣緊石既仙瑞黛拉？」

薄荷綠同我打趣：「識呀，買左次貨想換石？」

當然遊戲道具係唔會有次貨，我懶理佢既幽默，直接問：「佢幾時入你地盟？」

薄荷綠：「佢係我地盟主分身黎架喎???」

盟主。

我：「啊，係咩，咁冇野了。」

回頭，我打算走。





然後，oasis綠就邀請我加入隊伍。

我答應左。

隊伍只係得我地三人，明顯佢唔係邀請我去打怪。

然後綠色既隊伍頻道就出現一句說話。

oasis綠：「我冇估錯既話，你係紅樹葉前盟主？」

好熟悉既氣氛，我知道，又有故事聽。

「係。」





薄荷綠：「啊，唔怪得之！」

「可唔可以解釋下？」

oasis綠：「你好。我叫大綠，佢叫小綠，係後來加入壬生既，所以所知唔多。我剩係知我地盟主"紫幽"以前係紅樹葉，後來分開左，有人跟隨佢就變成呢個盟。但係佢唔鐘意講番紅樹葉既事，盟內既人都好少提，我都好想知係咩事。」

我開始意識到大概係咩一回事。

葉：「你地血盟而家同理想世界係咩關係？」

大綠：「表面上係友好。」

葉：「咁幾好丫。仲有冇事？冇事我走先。」

「咪住！」大綠一句叫住我：「我知你地同理想世界一直開緊戰，靜心成日都走黎煩我地盟主，你可唔可以幫下手，我地全部人都對靜心冇乜好感。」





…

我：「我地同理想世界開緊戰，連我自己都唔知喎大佬，點幫你手呀？」

附圖：葉奇岩廣場自拍照, 回歸後既新look