【真人真事】當年中七AL，我打左成年天堂二，但我無悔！: 外傳-理智與感情

十二月中，去美國既一個星期前。紅樹葉三人約左出黎飯聚，亦當係順道同葉慶祝生日。

食食下飯，樹收到個message，一收到就屌左聲。我同紅即刻問佢咩事，佢就show左個電話俾我地睇，寫住咩我不能忘記你之類既野。

紅即刻話：「情慾短訊？」

樹答：「薰黎架。」

我大驚：「唔係掛？真架？你地果陣結婚係真係一齊左？」





其實我考完al之後有一排停左冇玩，所以完全唔知果陣發生過咩事。但係由我後來番去再玩番到而家臨走前夕，樹同薰由頭到尾係game入面都係結婚狀態，我亦都冇問咁多。

然後樹就擺起一副想當年既look，向我覆述往事：「果陣考完al，得我一個係到。有一日，薰同太極兩個人係奇岩鬧交…」

我一聽就覺得奇怪：「佢地兩個果陣唔係同居咩？做乜要係game入面鬧交？」

樹回答：「我點知…」

「咁佢地咩事鬧交？」





樹再答：「唔記得喇，好似薰話佢唔搵工掛住打機之類啦…」

「薰有咩資格話太極呀佢兩個係game識架喎！」

樹又答：「點知佢地咁多姐，女人係咁架啦，之後…」

「一d都唔make sense喎你單野。」

樹忍無可忍：「屌你聽我講埋先得唔得呀，聽故咪撚駁故ok！！」





「ok…」

樹繼續：「喇，咁之後呢，佢地鬧鬧下，靜心又懶係好人咁出黎做和事佬…」

「佢地唔係唔妥既咩？」

樹：「屌，你再插嘴我唔撚講。」

紅搶先回答：「唔好理佢你繼續啦！」

樹：「喇，葉你收聲咪撚再插嘴下。咁靜心懶係好人，薰同太極兩個自然唔領情，鬧鬧下仲屌埋靜心話佢係八婆，咁靜心等係反擊，結果變左薰加太極同靜心係到嘈。就係果日之後，太極就擺低左堆武器冇玩，靜心就開始追殺薰。咁本來呢，我都冇諗住要插手既，話晒係佢地兩個私人事。點知薰打電話俾我，喊晒…」

聽到呢到我真係忍唔住要再插多次嘴：

「長途電話！？」





樹怒啤我：「係呀屌你。佢係台灣打俾我，喊晒口咁訴苦，又講靜心又講太極，佢話佢同太極果晚之後就分左手，之後上網打機又係咁俾靜心殺，極度depress。我見咁慘，咪同艾爾開個分身幫佢反殺囉。本來係諗住私了，點知薰又白痴，殺完人講句『艾爾快d走』，我地明明開緊分身加麻。我地兩個盟本來都唔妥對方，薰咁樣露一露抵仲火上加油，結果就引爆左第一次世界大戰，薰入埋我地盟。」

「我冇興趣呢d喎，快d講重點啦，個message係咩事！」

樹：「其實都冇乜野好講，你知薰成日都係game入面識仔，又戰神又太極。果排我為左方便先用個分身同佢結婚，結左婚我可以隨時傳去佢身邊反殺丫麻，唔知佢係咪因為咁樣會錯意，冇幾耐就send左個sms同我表白…」

「哇英雄救美喎係女仔都lum啦，咁你點re佢？」 

樹：「我咪拒絕囉！佢住台灣，更何況佢唔係我果type。」 

「好hurt架喎！」 

樹：「我仲hurt啦，之後佢日日都send sms俾我又話等我又盛，由果陣send到而家呀唔係點會俾你見到呀。」 





然後，一路唔出聲靜聽故事既紅，說出一句精警金句做作為故事總結： 

「呢個故事教訓你，以後唔好立亂俾電話人呀。」