【真人真事】當年中七AL，我打左成年天堂二，但我無悔！: 33-大決戰 (一)

四月五日，星期六。今朝早考左ue listening，感覺良好，收卷前仲有時間諗下野。

心入面諗住既，當然係今晚奇岩守城，亦係我既最後一場決戰。

守城方，紅樹葉、三聯邦、皇族，戰力合共有23把+100武器，戰神、連戰兩把+1000弓。
攻城方，理想世界、日殺，戰力應該有三十把以上+100武器，亞格斯+500雙刀、平頭+700弓、靜心韓信唔知+幾多。

兩軍卒仔數目雖然係理想世界較多，但剩係睇主力部份，似乎有得打。

葉：「連戰、戰神，記得set4個巨集，用"/目標 亞格斯"、"/目標 平頭和尚"、"/目標 靜心"、"/目標 韓信"，隨時鎖定佢地。」





巨集即係天堂二內建既program指令。只要set左巨集用"/目標 xxx"，放快捷鍵，咁到時只要按一個制，如果目標係附近就可以即刻target到目標，唔洗打字。而呢四個目標，頭兩個係已知贊助玩家，尾兩個係可以封印城堡既盟主，全部都係狙殺目標。

我曾經係msn問過連戰：「贊助玩家有冇名單知道邊個有份贊助？」

連戰既答案讓我意外：「冇，我都唔知邊個有份。」

呢個係一個漏洞，係"贊助玩家不能攻擊普通玩家"既漏洞。憑住呢點以及同GM係黑房既對話，我判定，呢一條根本係一個假規則，GM完全無意執行。

「連戰你用+1000弓見人就殺，信我，肯定唔會有事。」





攻城戰前，我再次係同盟大叫：「一定守到！！！」

今次冇左樹係到一齊叫，佢去左溫書。但係留係到既大家都一樣諗法，一齊大叫：「一定守到！！！」

聯軍士氣旺盛！不停洗板直到20:00，攻城戰開始。

同上次一樣，我地冇人係出面守。唔同既係，連門後面都冇人守。

聯軍既佈陣完完全全係內廳，外內城門由得佢打。戰略好簡單，就係冇戰略，背水一戰，見人就殺，純粹硬仗一場。





戰前兩軍係奇岩頻道互相叫囂：

「咋咋臨入黎啦仲係到磨乜野！我地係大廳等你黎送死！」

「誰怕誰呀！等陣打完睇你仲有冇野講！」

事前我已經叫暗殺隱身，係城牆上面監視城外一舉一動。

靜心召喚好陣地後，擺出三箭頭陣式，亞格斯攻正門，蒼日、平頭分別射左右城牆。

暗殺：「蒼日都有把綠光弓，+700！！」

又多把……





我即刻叫戰神同連戰加多個巨集"/目標 蒼日"。

好快三箭頭破左入黎。亞格斯見一個人都冇，就自己上左城牆準備破水晶塔。水晶塔係城堡設施之一，有三個，主責玩家復活時間等，破一個就會延長守城方死亡後既重生時間，最長可以去到8分鐘，但係我地根本唔需要理會。

理想世界主力集中係內城門前，蒼日、平頭二人向內城門發箭。

葉：「預備…」

內城門每受一箭就穿一個破洞，露出空隙。突然間，門內有兩箭同時穿過門上既破洞，由內廳向外射出，分別射中蒼日及平頭和尚！二人立即退後。理想世界亦唔執輸，幾個魔法球透過破洞射入門內，門縱然未破，雙方就已經開始交戰。此時平頭蒼日身上出現光柱，二人唔理戰神連戰，再向城門發箭，一人一下就射破門！

葉：「gogogo！」

大戰一觸即發！