【真人真事】當年中七AL，我打左成年天堂二，但我無悔！: 32-0-0-11

離守城時間剩低三日。前兩日考左中化，聽日有科ue，守城日朝早仲有ue listening。但係中化ue我從來都唔擔心，老實講句，根本冇理過，因為由細到大考語文都係靠天才波，語文考試根本唔係叫考試，係叫iq題。

講擔心，我擔心下星期科pure多d，但我更加擔心點樣守城。

因為本來大家預計冇攻城戰，所以根本冇人就"黃昏同黎明"兩個陣營做任何準備，由得佢亂咁封印。結果今期理想世界為左減我地稅，入左"黃昏"陣營封印左其中既"戰亂的封印"。換言之，除左所有城堡稅率上限得番5%之外，防守能力仲會大大減弱。"戰亂的封印"其中一個最重要既弱化防守效果，就係攻方冇攻城陣地既時候死亡，唔會好似以前咁傳去第二近既城鎮，而係傳番去最近既城鎮。即係話，今次係奇岩戰場死左，一番生唔係去左歐瑞，係去番奇岩城鎮，而由奇岩城鎮行番去奇岩城堡，真係兩分鐘都唔洗。

但係諗深一層，都未必係壞事。

我問盟入面：





「你地有冇人諗住上王朝甲？」

有幾個都答話諗住上, 包括soso同莎莎。佢地係四大陵墓打怪多時，儲夠百幾億都唔過份。但係為左今次守城戰，唔上得！

葉：「唔好上住，直接拎去將把武器+100。買套王朝甲要180億，你地點到+10再上+100都係180億！但係今次攻城戰我地要好多+100先有可能守到！」

soso：「但係我仲拎緊把S級祕儀權杖，著緊A級黑暗水晶法袍咋，我想換左s頂級武伊克魯斯杖先+100。 」

葉：「信我啦。祕儀權杖同最top果把伊克魯斯手杖魔攻都差唔得幾多，但係伊克魯斯杖一把都成百幾億，你買完唔通再打過成百億黎+100？黑水袍加施法速度15%，王朝都係加12%咋。你巫師無論著咩防具都好，打+100弓手都係等死架啦，施法快d自補咪仲好。信我，唔好換王朝，直接換+100低一級既祕儀權杖，仲經濟。」





我連續勸左幾個盟員將佢地既紅龍弓、祕儀杖、塔黑雙刀等等s級最低級既武器上到+100。

一般黎講我都唔強逼盟員換咩武器，但係今次要守到城，就要睇雙方有幾多把+100武器，火力係關鍵。我什至叫盟友可以既話，用160億賣左套王朝甲去，我補20億幫佢換把+100武器番黎。其實gm開放攻城戰之餘仲開放用錢換+100，好明顯，佢都睇得出我地唔用npc既話根本守唔到城。呢下絕對係gm放水，係平衡遊戲性既措施，我等係要用盡機會。要贏，就要用全攻陣型，以攻為守，打0-0-11，龍門都唔要！

粒的問我：「我洗唔洗換把+100紅龍弓幫你手？」

我答：「唔洗喇，始終都係我地盟既守城戰，你黎幫手守城已經好夠，唔洗等登換把+100紅龍弓。」

粒的：「其實我都諗住唔玩，就黎考ce，上年已經衰左，我要早d開始溫書。我地盟好多都係ce生，都差唔多走喇，我地唔玩d野都送俾你地架啦。」





我到而家先知原來粒的係中五重讀生。見佢講到咁，我真係唔係幾好意思同佢講自己係al生，下星期開考…

我同佢講：「咁我多謝你地先，你地成個盟都係ce？」

粒的：「差唔多啦，有幾個上班族、al咁，不過al果d一早走晒，而家大部份剩低都係ce，都就走架喇，我都係諗住幫你守埋呢場就走。」

我：「其實我有d私人野做，所以都係打算打埋呢場唔玩。不過未同盟友講，廢是影響士氣。」

講到唔玩，我差d唔記得左要同咪嚕講，交低身後事。

咪嚕一聽到，剩係話：「我管唔到你班手下架…」

我：「俾d信心自己，佢地個個同你friend，點會管唔到？你係最適合果個架喇。」

咪嚕係我再三要求下先肯答應做下任盟主，我事後先知，呢件事對佢黎講係幾咁大既重擔。





最終，係星期六既最後一場守城戰前，我地紅樹葉、三聯幫、皇族三盟聯盟合共有：

+100弓x8
+100法杖x7
+100雙刀x4
+100小刀x2
+100矛x1
+1000弓x2！

我有信心，一定守到！