【真人真事】當年中七AL，我打左成年天堂二，但我無悔！: 34-大決戰 (二)

理想世界大軍一下子蜂擁入大廳。

連戰直接用+1000王朝弓，企係二樓發出"箭雨"射入人群，大量防禦力低既普通玩家被秒殺。正常既"箭雨"，因為威力均分於眾人身上，即使用+100弓都冇可能有咁大威力。結果平頭和尚一見先鋒被秒殺就發現唔妥，立即反應過黎，舉起弓就係一記"火焰之鷹"射向聯軍眾人。"火焰之鷹"係人類弓手"人馬"獨有既高威力直線群體技，透過+700伊克魯斯弓放出，屍體頓時成一直線鋪係地面！

贊助武器不能攻擊普通玩家既規定，係一開始第一箭已經冇人理會。

戰神係大廳二樓，向下狙擊贊助玩家，但係亞格斯一見狀就帶左四個+100既劍鬥士發左癲咁死追住戰神。雖然亞格斯手上只係+500雙刀，但劍鬥士威力驚人，對付身穿+250輕裝甲既戰神簡直係=13px綽綽有余。受五個劍鬥士圍攻，戰神不得不後退自保。同樣企係二樓既soso、艾爾等+100巫師隊，見幾名劍鬥死追住戰神，立即開炮狂轟保護我軍最強既主力，最終戰神依然死於亞格斯等人刀下、但亞格斯亦死於魔法炮轟，二人同時戰死。

一樓大廳內既魔法球飛來飛去，劍聲同拉弓聲不斷，相方大軍聚戰於大廳，但係離破門已經有一兩分鐘，大廳內始終未見靜心出現。





「暗殺搵靜心！」

葉一聲令下，仍然隱身既暗殺即刻開始尋找靜心。原來靜心韓信一直都冇入大廳，二人只係一直就企係外城等。暗殺見狀就匿蹤到靜心後方，描準呢位女精靈純白幼嫩既臀部，放一下"爆擊之痕"就一野插入去！

「丫！」

+100既頂級匕首"伊克魯斯分解者"仿似瞬雷一下插入立即抽出，精靈自動發出一下呻吟聲，隱身既暗殺亦同時強制現身。韓信立時施以一記"重擊盾"將暗殺打暈，再發出"強力盾擊"，然後靜心極速施咒，一下"冰旋巨鎚"就將暗殺打至九霄雲外。

暗殺報軍情：「韓信騎士靜心巫師，但係我插靜心唔入，石女黎架！」





靜心作為巫師，身穿防禦力極低既法袍，受+100=13px刀仔一插竟然可以唔死，說明佢防禦力極高，肯定有贊助防具。

鏡頭番黎大廳，呢個moment兩軍都傷亡慘重，主力部隊死既死散既散。連戰俾蒼日平頭兩把+700伊克魯斯弓圍射，一早已經被召入冷板房等復活。但係蒼日平頭又同時俾粒的等人既+100弓手隊狙擊戰死。不過螳螂捕蟬黃雀在後，聯軍既+100弓隊隨即又俾理想世界三名號稱弓手剋星既半獸人"暴君"用+100拳套屠殺，雙方殺來殺去，屍橫遍野。

兩軍繼續互相施殺，我就單手拎住把大型斬馬刀"天國審判"，身穿一套輝煌閃爍既"王朝重甲"，坐左係大廳盡頭既皇座上面睇住呢場戰鬥--因為有bug，假如生前坐係皇座上面，再被一下秒殺，就會保持姿勢，只要唔按復活就可以一直坐係到。咁做當然純粹只係為左霸氣，事實上以我當時既裝備，既無+100武器，又冇+25防具，就算身穿王朝甲，充其量都只係一個高級卒仔，即係兵長。係呢場決戰中我既戰力根本冇作為，左右唔到大局，多一個唔多少一個唔少，倒不如坐係戰場隨時觀察指揮。

內廳既施殺維持近七分鐘，到靜心入黎既一刻大廳就只剩低理想世界既人，同埋坐係皇座上面葉既屍體。

靜心眼尾都唔望我一眼，直接衝入封印室。到呢個時候我先按下復活，唔係係城堡入面復活，而係返回村莊，去番奇岩鎮！





五分鐘後，靜心成功封印奇岩城堡，攻守互換，大理想世界同盟變成守方，紅樹葉聯軍變成攻方。

而我地聯軍早已經施好整套buff，從奇岩城鎮趕到黎奇岩城堡，抵達城門並拆毀理想世界同月殺既陣地！

攻守互換後重生既城門同城牆猶如草堆，戰神一箭一門，只需兩箭，聯軍就攻入大廳。

滿buff既聯軍連旗都廢事插，一窩蜂就攻入去，面對冇buff既理想世界，直情可以用橫掃黎形容。戰神連戰兩人向粒的帶領既箭隊借左3人，兩個+1000弓手連同3個+100弓手組成層殺小隊，由戰神發號施令先發箭，其餘4人用指令"跟隨射擊"，兩箭+1000、三箭+100，就連亞格斯同平頭和尚等人都敵不過一輪連環掃射。再加上+100巫師團既掃場魔法，縱然理想世界頑強抵擋，聯軍卻勢不可擋，扎實地推入封印室。

soso：「clear。」

一直係門外計時既我，呢個時候先進入內廳，身邊有咪嚕、地獄、暗殺3人做保鑣。

呢一波攻勢，由奇岩出發到而家我入去開始封印，共計約13分鐘，如果預計埋封印需時約5分鐘，加埋總共接近一次buff既時間。問題係，雙方既buff娃娃都老早死晒番奇岩城鎮，我地係城堡入面根本冇得加buff。

五分鐘後，紅樹葉成功封印，進入第二輪，再一次攻守互換。