【真人真事】當年中七AL，我打左成年天堂二，但我無悔！: 31-信任與責任

我有點兒納悶。

忽然覺得自己辛苦建立既紅樹葉，原來背後都係呢兩個人擺佈，而自己可能只係一隻棋子。呢種滋味真係好難受，你親手建立既野原來唔係真係你親手建立既，你只係屎忽撞棍，識到兩個貴人。就好似方新俠以為自己做就左大奇蹟日，到第二集先發現背後有個賽斯操縱股市，要佢升就升，要佢就跌就跌，結果方新俠難受到要走去左泰國隱居。

而最最最重要既係，今個星期考中化ue，都算冇乜野，下個星考第一科al: pure maths，我連past paper都未掂過，真係有d淆底。趁而家天下太平，我係咪都係時候功成身退？

我問樹：「下星期考pure喎。」

樹：「係呀，所以你唔見我呢排我都少打左啦，落自修室溫書。」





我：「乜你有溫架，我完全冇溫過喎……」

樹：「咁等係有啦，al都唔溫書想死咩，你平時online都係奇岩冇野做，俾d時間溫書好過啦。」

我：「咁個盟點算，冇可能擺係到由得成班盟員唔理。」

樹：「冇架，揀個人傳位囉，可以點算。」

揀個人。有邊個我係放心可以俾佢既呢？





連戰，即係周星星，雖然係紅樹葉貴人，但充其量只係打手。性格衝動自我，鐘意打打殺殺，唔適合做盟主。

暗殺，好有趣，成日講笑，盟內識既人都叫多，但係本身少諗法，係聽order做野既人。

地獄，呢個人係好可靠，亦有自己既諗法，但係好少說話，似乎係適合人選，但盟內識既人少，認受性唔會高。

咪嚕，盟內識既人多，經常睇到問題係邊到，愛好和平，似乎係適合既人選。

我話：「俾咪嚕做，你點睇？」





樹既回答係：「好，我贊成。」

但係，估唔到就係我準備拜託咪嚕既時候，gm出左一個重大公告：

1.攻城戰再開，但係取消左npc道具，即係冇得再買npc守城。
2.開放用天堂幣+武器防具。武器上限+100，防具上限+25，每10億可以+5。

睇一睇奇岩，居然今個星期六就攻城。我100%肯定靜心會攻城，如果而家話退位唔玩，仲邊有士氣守城？

做得盟主，我有責任。

雖然呢個只係一個遊戲，只係一個大家都用假身份進行既化妝舞會。但身份雖然係假，付出既信任係真。一班人咁信任我，聽我領導，聽我指揮，而我係臨陣殺敵既關鍵時刻話走？講唔過去。我自己都接受唔到，我冇可能丟低呢班盟員。

我忽然明白。





紅樹葉既發展，或者真係係靠運氣，係靠貴人扶持。但係如何駕馭呢道運氣，如何掌握呢種緣份，卻係我既所為，全靠我既一念。我活到呢一刻，先第一次感受到乜野叫「謀事在人，成事在天」，心底豁然開朗。

我問連戰：「你有幾多錢？可以出幾多把+100武器？」

連戰冇直接答我有幾多錢，佢剩係話：「唔計幫你出套+滿既防具同飾物，最多有5把，可以借俾盟友用。」飾物即係增加魔防既裝備。

我懶得計佢咁樣即係洗左幾多錢：「唔洗幫我出防，你用果筆錢出多兩把+100，total出三把弓，四把法杖，可唔可以？唔該。」

連戰爽快地答：「ok。」

再計下血盟有幾多錢，上次守完城開倉派錢，血盟倉基本上好空虛。奇岩呢兩星期既稅收，大概只有45億，血盟倉入面仲有一把紅龍弓，同幾把惡魔獵爪。惡魔獵爪係半獸人"暴君"既武器，冇乜人用，所以放奇岩擺攤低價賣。而紅龍弓就俾我留番自用。

我決定，到星期六守完城先走。