【真人真事】當年中七AL，我打左成年天堂二，但我無悔！: 30-閒人與悶人

其實我早就有諗過周星星到底係咩人。

記得第一次見佢，佢一個人空身走入帝國墓。果陣就話唔知咩事，到而家已經知道左四大陵墓、知道左贊助武，好自然就聯想到"周星星"係咪只係某個人想練既分身？空身走入去，同我想練分身一樣，只係為左吸精。不過唔小心死左，比我發現，見幾得意，就順勢入盟。

我全部都諗過。

但係諗還諗，周星星既然唔講，我當然唔會問。憑周星星泄露四大陵墓既秘密俾紅樹葉聽，就應該明白周星星係紅樹葉既貴人。唔理佢係咩身份，我只要知道"呢個人係幫我既"，咁就夠晒，人地既私事，我理咁多做乜？

所以我見到戰神話「我地好耐之前就識」都唔係好驚訝，我只係想知道"太極"到底係咩人。





我又直接問：「連戰，你以前有玩開？」

連戰密我，冇答我：「嘿嘿，睇下。」

佢係密頻show左一把王朝弓比我睇，重點係，+1000！

葉：「幾時買左把弓？」

連戰：「以前仲係魔界果陣。」





葉：「做乜唔買伊克魯斯弓要買王朝弓？」王朝弓比伊克魯斯弓低一級，正常人都會買把最勁架啦。而更加重點係，佢已經表明左佢既身份。

連戰：「王朝弓型d丫麻！」

連戰果然唔係正常人，同我臭味相投。比我揀，我都一樣寧願要把型d既王朝弓。

然後連戰又答番戰神：「太悶咪番黎玩，打一場？」

戰神：「好。」





連戰：「你等等，我開太極過黎。」

連戰呢一句說話，好可能真係真心話。點解會番黎玩？悶囉。點解要幫我地？悶囉。同戰神一樣。

大概等左兩分鐘，太極駕到，原來太極係有血盟，仲正正就係戰神個盟：皇族。

我望一望，不禁覺得好笑。三個角式，周星星、連戰、太極，全部都係男白妖，連髮形髮色都一樣，開咁多件做乜？又係到諗，皇族係咪成個盟都係一班悶到極既閒人？然後又諗起，紅樹葉既發展，竟然幾乎全靠皇族既呢兩個終極閒人……到底係佢地帶起紅樹葉，定係我帶起紅樹葉？

然後一個手持+1000伊克魯斯弓，身穿王朝甲既黑妖弓手，戰神；一個手持+1000王朝弓，身穿王朝甲既白妖弓手，太極，就直接係奇岩城既教堂門口展開決鬥。

我問薰：「佢地防+幾多？」
薰答我：「兩個都係全套+250。」

弓手既決鬥其實有點兒無聊，兩條友射程一樣，只能夠企定定互射。整個奇岩城廣場既人就被逼係到睇佢地射。當然，係佢地眼中，可能係兩個用最top裝備既弓手係到互射show off，佢地或者會諗，遲早有一日自己都會去到呢個境界，著住同樣既裝備係奇岩決鬥、晒命。但係我地樹葉二人既眼中，我地心知肚明，呢個將會係我地永遠唔會去到，亦冇打算要去到既境界。





"七箭"、"死之螯針"、"迴避射擊"、"斷魂箭"、"鬼刺"等等技能不停射來射去，你來我往，毫無間斷。突然間，太極中左一招"斷魂箭"後立即倒地，我睇得出，係因為咁岩發動左"斷魂箭"既即死效果，瞬殺。

太極：「竟然瞬殺左，再黎！」

我愈睇愈無趣。同樹講左句：「我睇書。」就走左。

好快就考中化，最起碼都應該立下。