【真人真事】當年中七AL，我打左成年天堂二，但我無悔！: 29-舊識

我思前想後，決定直接向盟友爆贊助武器既事。

我同佢地講，gm話俾我聽理想世界有幾個人俾真錢買左+幾百既武器，所以先有高到離譜既傷害，用發光檔案就可以睇到邊個係，冇同佢地講有贊助武唔打得普通玩家既規定。出乎意料地，大家好似都好接受有贊助武器呢件事，即使呢個server係標明唔接受贊助。

「合理既，server都要錢run加麻。」
「你隻發光檔案係邊到download？」

什至有盟員問我：
「點先可以贊助？」





我答佢：
「我都唔知，你問戰神啦。」

大家都好似唔覺得有問題，想當初我岩岩知道果陣，都唔知諗左幾耐先接受到。或者，由頭到尾，就只有我一個人覺得有問題，呢個世界根本就係咁樣run，我太天真。

呢段時期，係紅樹葉入黎server後少有既和平時期。因為取消左攻城戰，理想世界同紅樹葉只係係攻城戰上較量，又唔算交惡，其他血盟亦各有各玩，成個server都天下太平。同往後既黑暗時代比，呢段時間可以稱得上叫真真正正既天堂。我地每日上線，愁既唔係點樣同人對戰，而係去邊到打咩王。愁既唔係點樣準備守城，而係點樣分打番黎既寶物。

呢個係最美好既時代。

同樣係呢段期間，薰話識左個新男朋友，同緊居。聽到呢句，我終於了解薰而家同戰神係咩關係，但係我根本冇興趣理會薰既男女關係。有人打機係為左消磨時候，例如戰神；有人打機係為左尋找愛情，例如薰；而我打機，絕對唔係因為呢兩樣野，更加唔係為八掛。知道佢地既關係，對我黎講講說話就方便好多，但係實則上，我真係唔想理咁多佢地既私人事。不過，薰就好有興趣介紹佢條新仔俾我地認識，仲話我地識佢。





薰條新仔，係game到開左個角式，叫做連戰，薰好開心帶左佢黎同我地介紹。

連戰：「你好，細佬三歲過澳門，四歲入葡京，五歲賭到變成精，六歲學人行老正，點知七歲呢就輸到含家拎，今年行年廿七仲係一事無成，所以希望隱姓埋名拜於紅樹葉門下，學到一技傍身。」

頂，連咩戰，你條友仲唔係周星星！！？成串金句我都認得，係賭俠入面，阿星本來係諗住咁樣同賭神拜師，三叔話唔好先變左做餅帶，先有我第一次同佢講果句"當堂嚇一跳，原來得啖笑"。但係連戰quote呢句唔係原句，佢加左句"隱姓埋名"係中間。

葉：「你好，實不相暪，我係醉拳甘迺迪個friend，神腿蓋世蔣中正。」

連戰：「oh，蔣公，你仲未死，實在太好……」





就咁我加左連戰入盟，連戰亦答應左。我十二成肯定佢就係周星星，即係周星星就係薰條新仔，同薰同居緊，佢地兩個平時都好熟，絕對有可能。佢開新人，似乎有佢既原因，斷估都離唔開洗錢，又或者想避人，總之我改口叫佢做連戰。

當時，我、樹、薰、連戰四個人都係奇岩，連戰介紹完後，戰神又咁岩傳左黎奇岩補給，於是薰又將連戰介紹俾戰神。又係果句：「你都識佢架。」

佢地就咁係白頻到講野，白頻即係普通頻道，只要係附近既人都會睇到。

連戰：「你好，我係太極。」

太極？又多個新名？然後，又一次出乎我意料，戰神認得呢個名。

戰神：「啊，太極…好耐冇見。」

我唔知佢呢個好耐冇見，到底係指大半個月冇見既周星星，定還是真係唔知幾耐冇見既所謂太極？





我插嘴：「你地識架？」

戰神：「我地好耐之前就識。做乜突然番黎？」

前半係同我講，後半自然係問緊"太極"，aka"連戰"，aka"周星星"…