【真人真事】當年中七AL，我打左成年天堂二，但我無悔！: 23-激勵

透過trust level，我正式將血盟成員分級。

天堂二既血盟系統其實好精細。血盟可以開"親衛隊"，下面又有"騎士團"，又有"血盟學院"，仲有"血盟技能"等。血盟成員可以分成5級，每級有咩權限都可以由盟主修改。血盟成員權限亦都分到好仔細，大到"收人"、"踢人"、"宣戰"，小到"踢外人出城堡"，"檢視血盟倉庫"呢d咁細微既權利都有。

紅樹葉轄下有兩支親衛隊，一個隊長係樹，隊名叫「枯樹」；另一隊隊長係紅，隊名叫「落紅」。枯樹轄下有兩支騎士團，團長分別係"暗殺"同"地獄"；落紅轄下都有兩支騎士團，團長分別係"咪嚕"同"周星星"。呢班人可以話係紅樹葉既幹部級人馬。不過呢班幹部入面，首先"紅"係未做隊長之前已經冇玩，隊長之位只不過係掛名。其次"周星星"係狄恩戰後換完套王朝甲之後好耐冇on過line，講起黎都已經接近大半個月冇見，整個落紅實際上得番"咪嚕"一個騎士團團長。

基本上，盟員等級既原本設定係紅樹二人有齊血盟所有權，等同盟主葉。騎士團團長係2級血盟成員，同普通成員最顯著既分別係可以收人入盟，之後其他人就冇特別分級。但係係制定trust level之後，我將我同樹名單A到出黎既level 1 人升左做3級，之後生出黎既level 1人轉左做4級。3、4級係權力上冇乜分別，主要只係俾我用黎排次序。

trust level係咪準確，我唔知，我只能夠相信。係呢一次清人後，留番係到既，我一定要完全相信佢地，所謂用人不疑疑人不用，不信任只會愈來愈多心，深入混亂狀態！最起碼，我要呢班留係到既人，擺脫被自己可能被壞疑既感受，要佢地感受到盟主既信任同激勵。





「今日清完人，剩番低既所有人都係我最信得過既血盟成員！疑人不用，用人不疑，今後我會毫無保留信任你地。我開放左檢視血盟倉庫既權利，入面既所有武防都係屬於血盟，全部可以免費借用，只要問樹或我拎就得，大家book定啦！守完城，再分埋咁多日既稅收去！今仗我地有戰神幫手，肯定嬴！」

血盟倉庫係一個小小寶庫。入面收集左我多年於奇岩行街shopping，係玩家擺既攤檔上執番黎特價武器防具。基本上平時我一見有平過市價既貨就會買入，然後再賣高少少價擺到有人買為止。有時又會收材料自己做裝備賣，或者做完存入血盟倉。係未有奇岩稅收果陣，血盟既資金基本上都係靠幾個幹部供，再一買一賣咁賺番黎。

大家似乎都幾滿意。

至於移左去狼來了既成員又點呢？狼來了既成員，我同佢地講，攻城戰當日，有實驗做，所以先調出血盟。而事實上，我的確係有實驗交俾佢地做。狼來了係守城戰既back up plan，我將狼來了既盟主，換左俾一個元素士，即係召喚師，叫"小草"。我同樹兩年前f.5，又係study leave果陣，係另一個私服入面識左小草，果陣已經交換左MSN，大家有時都會傾下計，點知咁岩係呢個私服又撞到。小草一向愛好和平，好少參戰，不過佢係唯一一個樹葉名單A既trust level 1既召喚師，唯有委屈下佢去戰場。

處理完靜心帶俾我地既混亂，距離奇岩守城已經得番一日。





粒的、戰神分別登記左守城，而小草既狼來了就登記左攻城。戰神既皇族將會同我暫時同我地同盟，紅樹葉、三聯幫、皇族三盟共享同盟頻道，特別既係，薰都係皇族入面。

戰神係同盟頻道第一句說話：「好耐冇打過，真係好期待！聽日大家加油殺鋪勁既！」

我諗，戰神可能真係悶左好耐，所以先咁興奮。不過戰神呢一下無心既激勵，卻的的確確帶起盟內戰意！

然後，係同盟頻道入面，我開始交待理想世界+100武器既事，以及相對應既守城策略－－我苦思四晚既戰略。