【真人真事】當年中七AL，我打左成年天堂二，但我無悔！: 22-混亂狀態

我落樓下七仔，買左杯思樂冰，廿粒燒賣，企左係到食。

靜心呢下well play，唔係一句you are welcome咁簡單。

welcome完，到底仲有冇無間道？有幾多？邊個係？幾時放左鬼入黎？as係寶寶龍前成員，係狄恩戰後先加入我地，狄恩戰佢係到觀戰，唔通就係果陣放鬼？咪住先，第一次入四大陵墓就已經俾靜心見到，會唔會係果陣已經有鬼？唔得，咁樣豈不是大半個盟都有嫌疑？如果係狄恩戰後，剩係寶寶龍都廿幾個，點check呀？如果我係鬼我會點做？我話見as一次殺as一次又嚇唔嚇到人？鬼係會好高調定低調？……

整個人陷入混亂，我急需一啖思樂冰幫助冷靜，吸一吸，刺耳既風聲傳出，原來杯思樂冰已經飲晒。

我笑左笑。諗起以前打三國志九，點一下計策，揀混亂，再搵個智力高既，點一下人地，人地就進入混亂狀態，然後就企定定任你打，混亂就係咁兒戲既野。到左今日，我先明白混亂係咁大獲。我開始懷疑所有盟員，而重點係，我冇得揀，係必須要懷疑！明知中計，明知會傷士氣傷感情，但我又可以點，唔通由得佢？三國志入面用一下激勵就可以解除混亂，現實邊有咁簡單？然後我又突然發現，當初呢個"亂一亂行動"，真係冇改錯名，而家搞到自己真係亂一亂。





番到屋企，on番line。盟入面仲講緊無間道事件，大家話估唔到as係內鬼，又討論邊個仲有可能係，人心惶惶。我唔知樹點同盟入面講，亦都無意過問，我第一件事只係密煌同皇上表示道歉，佢地兩個都話明白，仲俾左d覺得有可疑既名單我。

仲有一個星期就係奇岩守城，一係就係守城前搵晒所有無間道出黎，一係就係玩盲守，即係守城果陣得幹部知道全套戰略同人員分佈，盟員只係知道自己咩崗位，冇訓練過要成功真係仲難過登天。

樹既意思係：「盡可能搵出所有內鬼。」

於是我地花左些少時間，制定左一套有少少煩，叫trust level既機制。trust level既存在到今日都只係得樹葉兩個人知，機制運作如下：

0.首先樹葉做base，是為level 0
1.兩個人唔睇血盟成員名單，分別list out無可能係內鬼既名單，叫名單A




2.兩個人睇血盟成員名單，再list out無可能係內鬼既名單，再減去同名單A重疊既人，是為名單B
3.對比樹葉二人既名單A，重覆既人入做level 1，其他人入做level 2
4.對比樹葉二人既名單B，重覆既人入做level 2，其他人入做level 3
5.無入樹葉名單AB既人全部入做level 4
6.叫所有level 1既人list佢地既名單A。
7.對比所有level 1既名單A
如果入面有level 2既人，並且重覆2次，就降一個level
如果入面有level 3既人，並且重覆3次，就降一個level
如果入面有level 4既人，並且重覆4次，就降一個level
換言之，如果一個level 4既人重覆左4+3+2=9次，就連降3個level做level 1




8.完全冇入名單既level 4人升入level 5
9.對新既level 1成員重覆step6, step7, step8
10.重覆step9 直到再冇人入到level 1
11.level 1為安全，level 5直接踢盟，其他按level進行調查。

呢個機制唔係用黎抽出內鬼，而係樹葉二人對盟內所有成員進行既一次信心審示，係俾我地兩個自己睇，一係信，一係唔信。進行既過程就唔係到詳述。到最後，踢左大部份長期冇上線既人，而我地只係調查左level 3至level 4既人，大概十幾人左右，呢班人，少數俾我地踢左，大部份被移左去狼來了。狼來了冇同紅樹葉同盟，share唔到同盟頻，可以方便做盲守。

我好記得，其中一個被踢既密我話：「我咩都冇做過，一上線就冇啦啦俾人踢左，咩料呀？」

問心，我唔知被踢既到底係咪真係無間道，但係寧我負人毋人負我…既然佢通過唔到trust level，我只能對佢講聲對唔住。

果一晚，係我做咁耐盟主以黎，覺得最對唔住盟友既一次。