【真人真事】當年中七AL，我打左成年天堂二，但我無悔！: 24-奇岩防守戰 (一)

星期六晚，奇岩第一場守城戰。

大家心入面都好緊張，經過左咁多野，終於都第一次正正式式同理想世界正面交鋒。有戰神加盟，所有人都好有信心，士氣高漲。

樹葉：「一定守到！」
然後開始整個同盟頻道都係呢句說話，一人一句，一下子洗晒成板。

所謂齊心就事成，我有信心，一定守到！

登記左攻城既狼來了盟主小草，係戰前已經於戰場附近做好準備，其他人就係奇岩。等開戰後小草就會穿牆入黎進行四項實驗，掃清我既疑慮。





一：用"/目標 飛龍管理員" 點選飛龍管理員(筆者按: 唔記得左個npc叫咩名)，再騎龍向目標直跑，可唔可以直接穿牆去到奇岩城堡既停機坪？
二：係城堡內可否插旗，召喚攻城陣地？
三：係城堡內敵軍可否施術"召喚戰友"？

最重要既係，四：如果召到入黎，狼來了呢班未確定係咪內鬼既人，會點做？

八點鐘，server lag左幾分鐘，然後系統標示：《奇岩攻城戰就開始》

靜心既大軍早就到左戰場外待機。戰事一開始，百幾人既大軍每人個名前面，立即多左一把紅劍logo，標示佢地為攻方－－理想世界、日殺，亦即係大理想世界同盟。大軍衝上前，奇岩城堡正面既廣場瞬間變成無盡既紅劍logo海，一個藍盾logo都冇。





小草係呢個時候趁機由城堡後方穿入黎。令我意外既係，佢竟然直接就穿左上停機坪，企左係飛龍管理員隔離。呢件事實在令我好驚喜，因為咁樣表示左，只要有方法點到封印水晶，就可以直接穿牆至封印水晶旁邊！小草繼續實驗，雖然唔可以插旗，但係卻可以召喚敵軍，真係不得了既情報。呢個情報亦向我說明左，守城戰略既backup plan可行。

葉：「繼續監視狼來了既人。叫你班保鏢唔好周圍走，係停機坪玩就好喇。如果我密你單字一個"救"，你就直接去封印房封印個城堡，封印完再召喚番我地入黎ok？」

狼來了既其他人係呢場攻城戰入面既角式，係backup plan小草既保鑣。當然，如果入面冇內鬼既話。就算有鬼，只要唔佔多數，backup plan應該都無大礙，我唔可以再放更多人入backup plan而減少主戰略人數。

小草：「知道喇葉，我會坐係到幫你打氣，祝你旗開得勝。」

小草係一個溫柔可愛既女仔，我都唔希望佢沾染殺氣，最好成場都坐係到。





同時間城外既靜心同韓信見我地聯軍龜縮城內，完全冇人出黎應戰，就立即開始召喚攻城陣地準備作戰，佢地既娃娃亦都開始施buff。

眾人回憶起琴晚既戰略說明：

………「外面唔洗守，佢地裝備強，係野外正面衝突對我地冇著數。而且佢地武器太強，門同城牆根本頂唔到，派人守都只係白死。」

靜心韓信二人召喚完攻城陣地，揚起兩支血盟旗後，平頭和尚就一個人行前。舉手，拉起果把深不可測，發出綠色光，有藍色電圍繞，精練左既+700伊克魯斯弓。一箭、兩箭、三箭…，唔洗一分鐘，外城正門已經被射破，即使係奔馳帶領既三聯幫箭隊都冇可能做到，何況係一個人。

一陣煙過後，企係城門後面既一群黑影－－係戰神帶領既大隊！

………「戰神，你帶人伏係外門後面，城門爆左之後就係外門儘量拖時間拖到兩隻攻城高崙出黎。」

平頭一見到戰神，諗都唔諗，立即拉起果把發綠光既伊克魯斯弓向戰神發箭。因為贊助武器打贊助玩家係唔犯規！但係戰神亦立時開左"極限迴避"，迴避率大大提升，平頭空有一把神弓，攻擊卻全數落空。亞格斯見狀，竟然唔理戰神，帶左一隊手上閃紅光既+100武器隊，衝過護城河，想用紫光+500雙刀斬破右則城牆直入城內！





戰神見狀立即上前向亞格斯發出"制動之射"打算減慢亞格斯既移動速度，奈何亞格斯本來就係城牆旁邊，加上佢整套神裝，魔防極高，"制動之射"對亞格斯根本無效，三兩下手勢就俾佢突入左城牆！