【真人真事】當年中七AL，我打左成年天堂二，但我無悔！: 19-亂一亂

無論理想世界決定用方法一定二都好，只要睇下五日後既亞丁攻城戰有冇新盟登記就知。冇，就係方法一；有，就係方法二。 

而係呢五日間，我計劃左"亂一亂行動"。 

早一排，我自己新練左一隻矮人收集者，叫creamyonion，因為果陣咁岩食緊creamyonion味既品客。btw呢個只係事實陳述，唔係置入性廣告，唔好咁敏感。呢隻收集者一開始係為左收集只有低級怪物先收集到既基本材料制造卷而練，因為我覺得隻工匠去到78lv，識得自己整高等s級既武器防具，但係竟然唔識將10塊"動物的皮"合成做"皮革"，搞到次次整防具都要自己掛網"收皮"(向玩家收購皮革)，真係好唔make sense。 

而重點係，因為呢隻收集者由細就周圍收集到大，完全冇吸精，又冇入盟，所以莫講話理想世界，就連紅樹葉入面都係得幾個人知呢隻野存在。 而理想世界又一直係active既血盟，成日公開收新手玩家，如是者，creamyonion就好順利就入左理想世界。 

我又用樹隻霸主，叫做"絕望的哀悼"，開左個新血盟，叫「狼來了」。 





然後我就開始係招攬一隊搞事者一齊去"亂一亂"。呢個用左唔夠一日計劃既"亂一亂"，目的就係亂一亂，混水摸魚抽下水，睇下搏唔搏到個亞丁番黎。主要內容如下： 

1.假設佢用方法二，即係開新盟易手亞丁。咁我就用狼來了登記攻亞丁城堡。 
2.搞事者全部人係五日內重新練一隻用做黎殺手既弓手或者巫師或者刀仔，係四大陵墓吸精好快就得。 
3.creamyonion既副職業係召喚師，係亞丁攻城開始前，利用理想世界既身份，我直接入城堡潛伏係內城隱閉位置。 
4.creamyonion入左理想世界，開戰後唔會被自動踢走。所以開戰後就試下用召喚師既"召喚戰友"將各搞事者直接召喚入城堡內，順便收風。 
5.直接係亞丁城堡內，召喚狼來了既"攻城陣地"，不過未試過唔知得唔得。 
6.等，佢冇人黎我地就封印，有人黎就殺左佢再封印。 

呢件事，當然愈少人知愈好，所以完整既"亂一亂行動"就只有搞事者們知道，即係：樹、葉、暗殺、咪嚕、煌、soso、艾爾、as同另一個前寶寶龍既成員"皇上"，剛剛好一隊9個人。 





就咁，好快到左星期五既21:58，即係登記攻亞丁城既deadline兩分鐘前。 

廣闊既亞丁廣場上面，絕望的哀悼同另一個叫做"靜芯"既人企左係亞丁侍衛長面前。唔洗一分鐘，「狼來了」同靜芯個血盟「世界酒店」都登上左攻打亞丁城既血盟名單上面。明顯，靜芯就係靜心，世界酒店就係理想世界，唔係連名都懶得改，而係擺到明話你聽，此人就是我！ 

亦即係話，我既假設冇錯，理想世界決定用既係方法二！ 

靜芯登記完攻城，好似連眼尾都費事望多我一眼，係白頻丟低一句： 

「葉，你都係諗下點守你個奇岩，少做d無謂野。」 





然後就獨自走左。 

呢隻霸主長駐四大陵墓，佢有見過都唔出奇，所以我唔奇怪佢知我係葉。 

但係靜心呢一番說話，仿佛看破我一切計謀一樣，聽完之後個心有點不寒而慄。