【真人真事】當年中七AL，我打左成年天堂二，但我無悔！: 20-無間道

翌日，亞丁攻城戰。

我預先用creamyonion摸熟亞丁城堡既地型。果然係大城堡，剩係門都要打三個，入面又城個迷宮咁，個大廳面積仲要係奇岩兩倍！

我選擇左地下室做召喚地點。一般黎講，地下室好少會佈防，更何況佢地只係易手城堡，就算知道係狼來了既實際盟主係我，即係葉，但係成個血盟得九個人，佢地唔會點認真佈防，地下室肯定唔會有人黎。

下午三點鐘，我將creamyonion放左係地下室，然後就offline，開番絕望的哀號，即係狼來了個盟主。

狼來了入面所有人都係到！如果有一日我開葉，見到紅樹葉全盟都on緊line，一定會好感動！





絕望的哀號：「靜心知道左我係葉，所以今日亞丁一定會有人防守。但係唔緊要，我地只要阻止到"靜芯"封印就得。佢要封印就要經過大廳，只要經過大廳我地九人就即刻殺佢！」

但係咪嚕一個問題完全打亂左我算盤。

咪嚕問：「如果佢地用召喚師直接召入封印室，咁點殺？」

……

咪嚕呢個問題我真係完全冇諗過。事實上，我連召喚師可唔可以係攻城戰期間召喚敵方入戰場我都唔清楚。咪嚕既問題突然將我打醒，原來呢個"亂一亂行動"，本身都係亂一亂，缺乏周詳步處，成功機會渺茫。





但係我唔可以直接話我冇諗過，咁樣只會打亂士氣。

我決定天花龍鳳9up一番：「咪嚕係正確既，呢個係"亂一亂行動"既盲點。但係我地亦有對策。首先我地可以肯定佢只會到最尾時間先黎封印，即係話，只要到時限佢都未出現係大廳，就可以肯定佢地係直接召喚。另外我既creamyonion會一直online係佢地盟內收風，如果收到情報會召喚，我地一行人就殺入去封印室，亂一亂佢！」

9up係我強項，眾人似乎都好接受。

然後到左攻城戰開始，我開番creamyonion……未見畫面，聽到音樂我已經心知不妙。一睇，仆街！點解去左獵人村？人名隔離個理想世界logo都冇埋…竟然俾佢踢左出盟？冇理由，下午果陣都好地地，呢隻creamyonion就只有狼來了既人知道。

忽然之間，我諗起登記攻城果陣，靜心果句說話……我完全明白晒。





我打開私服既官網，search"狼來了"，望住九個人既名單，一直盤算，只有三個人有可能。

creamyonion密樹：「有內鬼，你即刻開刀仔隱身亞丁城堡右則。」
creamyonion密咪嚕：「有內鬼，你即刻開刀仔隱身亞丁城堡左則。」

我再分別密三個嫌疑犯，分別同佢地講：
「皇上，我俾佢踢左出盟，而家開緊召喚師，等陣直接穿牆上右塔到召喚你，你係奇岩等我。」
「煌，我俾佢踢左出盟，而家開緊召喚師，等陣直接穿牆上左塔到召喚你，你係奇岩等我。」
「as，我俾佢踢左出盟，而家開緊召喚師，等陣直接穿牆上後方平台到召喚你，你係奇岩等我。」

之後，creamyonion offline，我再求其開左隻召喚師，組左樹同咪嚕。

咪嚕又憑佢既第六感發言：「內鬼一定係as。」

我腦一片空白，問心，邊個我都唔想。我只能叫樹同咪嚕報告現場情況。 





結果，平頭和尚、蒼日兩個弓手騎住條龍，又亞丁廣場直踩上城堡正門，然後向右轉，一直跑，跑左去城堡後面…… 

果然係佢。

附圖：亞丁城鎮－亞丁城堡衛星圖