【真人真事】當年中七AL，我打左成年天堂二，但我無悔！: 18-接戰

我將我同靜心既對話，覆述左俾樹、咪嚕、粒的同戰神聽。

我地幾個盟主開盟主會議，本來咪嚕係唔應該係到。但係咪嚕，唔知到底係幸運定係女人既直覺，往往可以點出問題所在。例如當初，唔計知情既周星星，就係佢最先指出理想世界根本冇係外界打怪。又例如，如果唔係佢發起盟員夾錢買甲俾我，我已經俾亞格斯斬死左，唔洗攻奇岩。種種原因，我決定俾咪嚕知情。

樹：「你下次俾我同佢講丫麻，而家講到咁絕，仲要俾佢霸埋道德高地，輸晒。」

好絕咩？其實都幾。有城堡既血盟係會自動歸入黎明陣營，所以"叫亞格斯入黃昏"除左係提一提佢我地(扮)有亞格斯用贊助武打我既証據之外，仲暗示緊叫佢踢亞格斯出盟，所以先可以"入黃昏"。

粒的：「傻傻地，唔收稅連莊園都分分鐘唔夠錢搞，一蚊收入都冇咁攻個城番黎把鬼咩？更何況人地收幾錢稅關佢鬼事呀。」





戰神：「你唔洗理佢講咩。我好清楚靜心，果陣已經講過，你攻完就要諗點守。除非佢送俾你，否則你搶佢野佢追到天腳底都會搶番，就係咁簡單，稅率係籍口黎姐。」

戰神既睇法同我一樣，而家最大既問題唔係稅率，而係點守。道德高地呢家野，俾佢霸左又點？大部份小盟都係同我地友好，10%又唔算好高，我真係唔擔心。

咪嚕：「其實我地不嬲都好窮，買完套甲俾葉就冇晒錢。攻完唔收稅，咁不如送番俾佢啦，佢咁即係有錢人蝦我地窮人姐。我現實都窮架啦…部電腦又廢喎，上次打寶寶龍lag到我傻。」

lag機？我都有lag，城戰一開始就lag左陣。

樹：「我都有lag，一開始lag左下，之後剩係人多先疾疾地。」





粒的戰神都話有lag，然後大家就變左傾閒計。

通常既所謂會議都係咁樣收場。遊戲入面唔會有咩嚴肅會議，所以基本上都冇乜野傾到出黎，只係確立左我地三盟會一齊守奇岩，堅拒調稅。至於點守，黎緊仲有十幾日，慢慢諗。

到左隔日三點，稅率依然係10%，冇加冇減，即係等同紅樹葉正式接戰。

靜心都冇同我講任何野，不過我知佢地一定準備緊，因為理想世界已經有亞丁城堡，根本唔可以登記攻打奇岩。佢地要攻奇岩，事前就要做準備，並且得兩個方法：

一：理想世界既主力退盟，之後加入同盟「日殺」，剩係用日殺登記攻打奇岩城堡。
二：開個新盟，將亞丁易手俾新盟，然後就可以用理想世界攻打奇岩城堡。





兩個方法都有風險。

用方法一既話，我地只要上私服網站一search，再對比下就知道佢地既攻城名單。因為退盟要隔24小時先可以入其他盟，即係紅樹葉at least有一日時間做針對性步處。一日時間唔可以睇少，寶寶龍好大程度就係輸左俾我地針對職業既步處，更何況，有四大陵墓呢個地方，24小時足夠練到幾個三轉。

用方法二既話，佢地只能夠係五日後既亞丁城戰入面轉手。要轉手就要跟足攻城程序，就好似我地攻奇岩一樣，中間係有"轉唔到手"既風險。而呢個就係一個好時機，如果佢地處理得唔好，分分鐘我地連亞丁都可以攻破。