【真人真事】當年中七AL，我打左成年天堂二，但我無悔！: 17-最後通牒

紅樹葉突然佔領左奇岩城，同盟頻道裡面又驚又喜。

葉：「我同戰神玩玩下，佢話個城堡都冇乜用，我地要就俾我地喎。」

我同樹二人商討後，決定咁樣向血盟成員解釋。呢個理由套用係普通人身上係好難成立，但係套用戰神身上，大家都覺得合情合理。

突然，戰神問我：「有冇影相？」

葉：「有呀，一攻完城就即刻坐王座影左張相！你想睇？」





戰神：「我係問，亞格斯打你，你有冇影相？」

我心諗，亞格斯打我我做乜要影相？同靜心交待？冇理由丫照情理計係我地開佢拖先……

丫！！

紫光雙刀！唔可以打普通玩家！

我即刻拉長左下角既對話欄，想搵番"「亞格斯」對「葉」造成xxxx的傷害"呢一句，但係根本搵唔到。一攻完城全世界都係到問咩事，as仲連問左十幾句：「乜我地攻奇岩咩!!?」將果句系統訊息洗走晒，洗唔洗咁驚訝？





葉：「冇，果陣好緊張，完全忘記左呢回事，你岩岩講我先醒起。」

呢句係真心說話。當時時間剩低十五分鐘，我地為左扮玩連攻城陣地都冇召喚，亞格斯只要想阻止一定可以阻到我封印，死左後就算趕到黎都冇時間再封印，所以只可以一take過冇encore，咁緊張既時刻，仲邊記得影相？我相信亞格斯都係因為太緊張先會犯規。而戰神到而家先問我，好明顯都係緊張到岩岩先醒起，樹更加係連提都冇提過。果個咁緊張既時刻，根本冇人會記得呢個規定。

戰神：「咁算啦，我只係想叫你唔好舉報亞格斯姐。」

葉：「放心，我唔會。」

呢句係咪真心說話？我自己都唔知。亞格斯用+500武器打我，唔理幾唔小心都好，的確係事實。但係舉報完，最多都只係廢左亞格斯把武器；唔舉報，我地就有說話既本錢。





攻佔奇岩城，其中一個最主要既目的就係稅收。理想世界一直都係0%稅，因為佢地本身已經有錢到所有血盟成員一夠76level就送一套S級武器防具，仲洗乜收稅？但係我地紅樹葉好需要呢筆錢。紅樹葉根本冇錢買武器防具俾盟員，所有裝備同錢都係靠大家用血汗打番黎，所以稅收好重要。稅收上限係25%，紅樹葉set左做10%，即係以後奇岩原價100蚊既野，而家會加價做110蚊，多出果10蚊就係歸我地。

攻奇岩以黎，靜心一直冇任何表態，可能係礙於亞格斯既事。但直到我地改左稅率後，靜心終於都密我：

「你地可唔可以改番稅做0%？而家買野貴左好多，好多玩家都投拆。」

靜心一句都冇提攻奇岩既事，我都唔提。

葉：「你地有錢就話唔收姐，我地紅樹葉係窮人黎，唔收25%已經算係好仁慈，一係你叫亞格斯入黃昏封戰亂的封印，咁咪得番5%囉。」

天堂二有「黎明」同「黃昏」兩個陣營，系統比較複雜難以說明。基本上，只要黃昏陣營殺指定既怪較多，就可以封印「戰亂的封印」，對所有城堡有負面影響，例如稅收上限得番5%、城牆hp減少，反之亦然。而有城堡既血盟成員係會自動加入黎明陣營，所以因為理想世界既關係，呢到一向都係黎明陣營長勝，稅收上限由本來既15%提升至25%。

靜心：「我俾最後一次機會你，聽日下午三點稅率唔係0%，攻城戰見。」

傾兩句就最後通牒？哇我終於見識到薰所講既霸道！