【真人真事】當年中七AL，我打左成年天堂二，但我無悔！: 16-四人攻城戰

本來既策略係：扮玩。

扮只係同戰神"玩攻城"，到最後封印完都可以話係唔小心玩大左。

但係而家有隻亞格斯係到，仲扮咩玩？仲點樣話玩大左？何況，亞格斯真係純粹想同我地"一齊玩"咁簡單？以佢既實力一個人就可以妨礙我封印，呢個可能性一定要排除。

時間近逼，剩係封印都要封接近五分鐘，但係時限得番十五分鐘，偏偏亞格斯就係到空拳打城門，仲要同我地team左，樹葉同戰神根本唔可以用隊伍頻道對話。

葉密戰神：「用贊助武器殺亞格斯，算唔算犯規？」





戰神回密：「唔算，殺？」

葉繼續用密頻回答：「準備好，我係白頻話"打唔爆…"既時候，即殺。」

然後葉將同一番話係密頻對樹講：「準備好，我係白頻話"打唔爆…"既時候，即殺亞格斯。」

樹、葉、亞格斯三人依然係到打城門，而戰神就企係城門旁既塔頂靜靜地觀察。

三人深知，呢場小小既pvp，將會係成場攻城戰既關鍵，直接決定葉封唔封印到城堡。





…
…

「打唔爆…」

塔上既戰神，立時拉弓，發出"七箭"，準備連射七支箭往亞格斯身上。

但係亞格斯一見到戰神拉弓，竟然後發先至，拎起紫光雙刀，使出"波動劍震"，唔係打向戰神，卻係打向葉！

葉連食兩發劍氣，手指即時連按f6f7f8，開啟"戰鬥咆哮"、"勇氣加護"回血加防，再飲橙汁補血。正當亞格斯打算追殺，使出連續技"三連斬+波動連斬"既時候，就係呢一瞬間，決定命運既一剎那！戰神同樹二人既"七箭"同時到達，將亞格斯既劍招完全打斷。葉一邊猛飲澄汁，一邊向亞格斯補一記"破甲壞擊"將之擊暈，兩位弓手再把握時機，一人幾發重擊，成功擊殺亞格斯！





我大叫：「仆街！好彩得呢套王朝甲咋！岩岩得番2000血我個心真係卜卜咁跳，唔係你地斷左果下連擊我就死左！」

戰神隨即射破自己城堡既城門，樹葉二人向封印室進發，然後就係戰神面前，葉開始封印戰神既城堡。

葉一邊封印一邊話：「而家係攻城期間，傳送唔到黎奇岩城，佢地就算要過黎都要時間。只要呢五分鐘內冇人黎到，我地就贏！」

…五分鐘
…四分鐘
…三分鐘
…兩分鐘
…一分鐘

系統宣佈《紅樹葉佔領奇岩城堡》，戰神亦同時被系統踢出奇岩，去左歐瑞城。整個奇岩城堡內，就只剩低樹葉二人。





距離攻城時間只剩低七分鐘，但係除左樹葉二人，整個奇岩城堡範圍根本冇其他人。係呢七分鐘內，已經冇人可以再趕入黎封印室封印。

即係話，紅樹葉成功佔領奇岩城堡！