【真人真事】當年中七AL，我打左成年天堂二，但我無悔！: 8-真正的秘密

我：「+100？武器安定值得10，根本冇可能可以點上100！呢個服唔係標明唔收錢賣武器既咩？」

係呢到要解釋一下。+n即係加強武器防具既攻擊力同防禦力，+愈高增加既數值愈大。安定值10即係去到+10之前都冇野，+10之後每+1有70%機會爆炸，冇左果件武器或者防具。所以，+100既成功機率 =0.7^90 =0.00000000000001，total 14個0，係冇可能既事。

樹：「我冇問佢，佢亦都冇講其他野。」

即係話佢用呢把矛，每日單拖係到打，每日可以賺幾多錢可想而知……我終於明白點解佢叫戰神，明白點解佢會話我地冇可能立足係到。但係呢把野係點黎？戰神既然冇講，又或者話，樹既然唔講，我唯有問薰。

薰係戰神現實入面既前女友，定還是係現任？我都唔清楚，佢地既關係好混亂，我冇乜興趣知。唯一可以清楚肯定既，就係薰都係魔界分裂後其中一個小盟"星空物語"既盟主，同埋佢有時會開戰神既account。比起戰神，我同薰比較熟，因為佢平時同我一樣，係奇岩遊蕩，周圍了人玩，如果要分派，我都佢就一樣都係歸為日日食飽飯冇野做屎忽痕食花生派！





我單刀直入，直接密薰問：

「薰，戰神既神武係點黎？」

薰：「啊…你地點知架？」

我：「佢show左把矛俾我睇。」

薰：「下，佢show完冇講你聽咩？把+1000矛同弓係贊助番黎加麻。」





+1000！！！！！我有冇睇錯！！

我：「你確定你冇打多一個0？」

薰：「咩打多一個0呀？」

我冇理佢，過多一陣薰又再密我。

薰：「噢，你講緊+100果幾把？果d係以前用金同gm換架。」





我：「即係+1000可以贊助番黎？」

薰冇再答我。我都冇再問，第一件事我就係打俾樹：「戰神仲有+1000武器！買番黎！！」

樹好平靜，答我：「咁你係咪諗住又爆出黎？」

正當「等係啦」三個字去到我嘴邊既時候，腦筋一郁，我硬生生咁收番果三個字：「你一早知？」

「係。果日戰神show左把+100矛，我就去下載左個發光程式，即係+100紅光，+1000白光果隻。」

我屏住氣，細心寧聽，樹平淡咁講：「之後我就係奇岩見到唔止戰神一個。佢同亞格斯兩個拎住一個白光弓一個紫光既雙刀，紫光係+500左右。」

「……唔怪得我地第一次入墓，亞格斯可以遂隻斬。」

樹繼續：「之後去亞丁行下，紅光有幾件唔記得咩名，仲有個叫平頭和尚拎把綠光弓，即係+700左右，全部都係理想世界，暫時見到係咁多。」





我真係聽到有點兒心寒，係呢個標榜唔收贊助既私服，原來仲有個咁既秘密，而呢個先係呢班人強大既真正原因。