【真人真事】當年中七AL，我打左成年天堂二，但我無悔！: 7-聖地與聖者

最終果晚遠征陵墓都係衰左。

我地穿入去五次，五次唔係阿葉死就係艾爾死，跟住滅團。

葉：「樹，不如你問下戰神點先可以係到立足到。戰神都係前魔界，佢一定知道呢個地方。」

戰神，即係魔界分裂後其中一個小盟"皇族"既盟主，據說人如其名，係魔界第一猛將，理想世界眾人都忌佢三分。而同時間，皇族亦係樹所托展同紅樹葉有邦交既友好盟之一。皇族既實力如何？我都唔清楚，不過戰神徽下既小冷都據聞都實力非凡，所以我估佢地一定知道呢個地方。

但係阿樹問完戰神之後，只係答我：「算罷啦，戰神話我地冇可能係果到練到。」





葉：「冇可能？冇可能。佢冇講其他野？」

樹：「冇。」

葉：「ok。但係我諗到個方法，想唔想聽下？」

樹：「講丫。」

葉：「我地盟咪有隻霸主叫莎莎既，莎莎而家78lv，升多一級就有"阻絕封印"，可以封晒班怪既攻擊，再放埋"絕望封印"減速減魔防，然後巫師團狂轟。只要莎莎用紋身加魔攻施速，絕對work！」





樹：「聽落又好似唔錯。」

然後，我地用左三日幫莎莎衝上79lv，原班人馬加莎莎以及佢既巫師朋友soso，再次挑戰。呢一次，主要火力係soso、艾爾、換左巫師既樹、暗殺、同埋霸主沙沙，我、地獄、周星星開補師食花生。第一次，莎莎第一次穿牆嚇一嚇死左。第二次，艾爾火力太強引左部份怪追佢，結果封印過後被秒殺。第三次，地獄開左隻騎士黎放"挑撥"吸怪，終於成功！！

終於我地第一次可以係四大陵墓掃場！而剩係呢一下掃場，我地已經賺左一金，即係一億！係呢到我要講解下，呢個私服有個金幣制度，每個金幣可以換一億，而平時所有怪物都會有一定機率變做"特殊怪"攻防血速都唔係人咁品，不過佢地有機會跌金。而呢間房點解咁易賺錢？因為夠晒多怪，五十隻怪，每次重生都總有兩三隻特殊怪，殺得多自然金就跌得多，所以絕對係賺錢聖地。

幾分鐘後，第二輪怪重生，我地照用同樣既戰法，work。雖然今次冇出金，但係掃完第二輪既同時間一道光柱係我控緊既戰狂身上出現，79lv。各人都意識到，呢到唔止係賺錢聖地，仲係衝等(升level)聖地。係呢到，粗略估計一日可以賺20億以上，即係一個星期就夠錢買一套s級最top既王朝甲(當時整套要賣100億以上，凡人係不能想像)。而且，帶隻新手黎，一日吸經驗值應該可以直接衝到去76level三轉都得。果然係聖地。

當晚，眾人散伙時每人都分左一金，除左食花生既我之外。我做過d咩呢？我不停帶d娃娃過黎吸經驗值，戰狂、霸主、先知、主教、席林、55、66、工匠、收集者，每隻都吸到60level。台灣人叫呢種行為做吸精，即係我吸左成晚精，咩都冇做過，食到食飽啦仲點好意思分錢。散伙時，我係隊伍頻道同樹講：





「我都話冇可能冇可能架啦。」

點知樹密我：「你知唔知果日戰神同我講咩？我果日問完佢，佢咩都冇講，剩係show左佢把武器俾我睇。」

我心知，又有秘密。

樹繼續話：「果把係+100聖者之矛。」

+100！？