【真人真事】當年中七AL，我打左成年天堂二，但我無悔！: 9-選擇

樹問我：「咁點，係咪又諗住爆出去？」

「……」

樹繼續：「我唔同你講，就係知你肯定又想爆出去。你呢次爆左出黎，莫講話攻城，好可能連個server都冇埋，你自己考慮下。」

葉：「如果事實係咁樣，我地係唔係都攻唔到城，咁我爆唔爆有乜分別。」

樹：「未必，我地可以同戰神聯手。」






好……好。


係我地醉心研究四大陵墓攻略法、紏結於爆同唔爆既期間，局勢又起左變化，根本冇時間俾我地喘息。主要有兩件事，都係關於寶寶龍：

一：寶寶龍同三聯幫開始展開口角。

二：寶寶龍居然秘密邀請我地同盟。





寶寶龍既盟主，其實就係叫做寶寶龍，事實上就係因為個盟主叫寶寶龍我地先叫個血盟做寶寶龍，盟名叫咩？WFC，重點係寶寶龍不嬲都睇三聯幫唔順眼。所以係人都知，寶寶龍邀請我地同盟，只不過係因為佢想同三聯幫開盟戰，又礙於我地同三聯幫有交情，所以向我地示好，唔想我地幫三聯幫手－－簡直係寶寶龍之心路人皆知。

而紅樹葉血盟成員全體意思係：「佢都傻傻地既，我地不嬲都同三聯幫friend底加麻！」

冇錯，我都係咁話。平時全部都係台灣人，好難得先有個三聯幫有咁多香港人，同我用香港口語傾計，我點可能唔幫佢？

於是由樹做代表向寶寶龍回應：

「紅樹葉係比較保守，我地紅樹葉同貴盟兩個血盟平時都冇乜交流，盟友們又唔太互相了解，所以我地既盟員都表示佢地都未準備好接受同貴盟進一步關係。但係我地完全明白你既意思，你地同三聯幫既紛爭，我地係可以保持中立既，不過，保持中立對我地有乜著數先？」





寶寶龍見我地問到咁白，亦都開門見山：「我盟可以將狄恩城送俾你。」

葉大喜，搶先樹即刻答左句：「咁我去登記攻城先喇！」

要知道，係天堂二入面，係冇所謂"讓城"或者"送城"。要轉讓城堡，就必需要透過正常既攻城程序，即係：係攻城戰開始既24小時之前向電腦登記攻城，然後係攻城戰既兩小時其間，由盟主成功封印位於城堡中心，係封印房入面既聖物，咁先叫做完成手續，成功"轉讓城堡"。當初理想世界將奇岩由魔界轉讓番俾自己，就係透過咁樣既"手續"。

而紅樹葉同寶寶龍既對話，就此完結。

事後樹同我分析話：

「喇，以交情黎講，無疑我地係應該幫三聯幫。撇開私人交情，純粹從利益分析。如果我地應承以狄恩做條件同寶寶龍同盟，咁呢個已經係平等交易，以後如果我地要做乜野，寶寶龍大可以唔幫手，什至同敵人連盟。相反，今次我地無條件幫左三聯幫，咁三聯幫就差我地人情，而我盟絕對有呢個本錢出手幫忙。如果保持中立，剩係拎得狄恩城呢個雞肋番黎，又損害血盟邦交，根本係最壞結果。在情在理，我地都應該拒絕狄恩呢個禮物，主動去幫三聯幫。」

葉：「我知呀。我都冇話唔幫三聯幫，我話登記"攻城"喎！」

樹立即醒悟：「丫！你條仆街！」






樹同葉開始為攻城準備，而寶寶龍點解讀葉既所謂"攻城"？WFC。

樹密"粒的"，即係三聯幫幫主，將寶寶龍邀請我地同盟既事和盤托出。

樹：「我諗寶寶龍打算轉完城俾我地就同你地開拖宣佈盟戰。你點睇？我地一齊直接攻佢狄恩城俾個下馬威佢！」

粒的：「佢都痴Q線既，我地又冇得罪佢，佢就成日話我地香港人又乜又物，我就係deadline前登記攻城，打爆佢！」