【真人真事】當年中七AL，我打左成年天堂二，但我無悔！: 2-局勢

因為葉既無里頭招人、樹四周結交豪強，紅樹葉漸露頭角，人數開始多，亦開始為人熟悉。開始每日都有幾十個常駐盟員online，紅樹葉係新興既血盟當中可以算係有潛質既其中一個。

係呢到我講解下當時既局勢。前文提到已解體既「蘇聯」，本名叫做「魔界」。而解體後剩番最強大既血盟，即係前文提到既「俄羅斯」，就叫做「理想世界」，本身係魔界眾多"分盟"之一，"分盟"可以理解成血盟分部，即係由原血盟既幹部成立既血盟，獨立運作，但仍然臣於原血盟。魔界解體後，大部份城堡係名義上依然係歸魔界既各個分盟所有，而實際上根本就係一個空城，因為大部份分盟係解體後都冇乜心機玩。只不過一直以黎都冇人夠膽攻呢d城堡。有兩個原因：

一：魔界解體既事並非為公眾所知。
表面上魔界既血盟成員依然係魔界既血盟或分盟入面，但係實際上大部份人都重新開左個新角式，各玩各，什至唔玩。有d入左理想世界，有d自己開新血盟。所以就算上私服既網站check，依然會睇到魔界仲有百幾個人，好似好強大，係表面上我地根本睇唔到任何野。而紅樹葉係點知魔界解體既呢？歸功於阿樹四處建立邦交，結識左一位前魔界猛將："戰神"。戰神亦即係前文提到既「皇族」盟主。魔界解體既情報就係由戰神泄露俾我地知。

二：就算知道係空城都唔夠膽攻，因為理想世界既存在。
係魔界解體後，全國既首都亞丁城就易手左俾理想世界，係外人眼中只係魔界進行緊行政調動（因為一個血盟只能持有一個城堡)。但係係知情者眼中明顯就係宣示緊主權，因為亞丁城係直接管轄其他城堡，亞丁一抽稅，係抽晒全國稅，而唔似其他城堡只抽其管轄地區既稅。換句話講，你攻魔界既城堡就等同向佢地宣戰。





因此，雖然新既血盟不停湧現，但係解體後幾個月黎，地盤既分佈根本冇變過。

但係我地紅樹葉，當然唔會由得各個城堡擺係到，我地由頭到尾既目標，都係攻城，攻奇岩城。