【真人真事】當年中七AL，我打左成年天堂二，但我無悔！: 1-伙伴

當年中七，我同一個朋友將所有時間花左係紅樹葉呢個血盟上面。血盟，即係類似幫會既組織，係天堂二獨有既幫會系統，全名係"血的盟約"。紅樹葉係由三個人組成，分別就係阿紅阿樹阿葉，而我就係阿葉。不過係成立早期阿紅就因為溫書離開左，所以血盟既初期發展基本上全靠樹葉，阿紅只係得閒上黎吹下水，打下怪咁，閒人一名。

係天堂二開得血盟，當然係想攻城。要攻城，就要人力。咁岩我地開盟既時間，呢個私服入面既唯一獨大血盟唔知因咩事分裂左。呢個獨大血盟就好似當年蘇聯解體一樣，分裂成一個強大既俄羅斯，同埋大量小國。

而紅樹葉就係呢個moment，憑住阿樹既外交手腕，同大量小國建立良好邦交。其中一個小國血盟「皇族」更加成為紅樹葉日後既重要戰友，拜阿樹所賜紅樹葉成立初期已經結識到日後既重要伙伴。而阿葉係呢段時期就不停吸納冇血盟既玩家以及新玩家，擴充血盟實力。唔記得講，雖然我地冇正式分工，不過一般黎講都係葉主內交樹主外交。

有兩個日後好重員既成員亦係呢段時期加入，一個網名係"周星星"，一個網名係"咪嚕"，兩位都係阿葉9up識番黎，值得詳細介紹下。

我地同周星星第一次相遇既地方係"帝國之墓"。果陣周星星，一個男白妖，一件裝備都冇，空身係到遊蕩，而我地姓樹葉既人就係到團練拖怪打。阿葉見到周星星空身係周圍都係怪物既地方遊蕩，好似好把炮咁，就行埋去望下，點知都未行到去佢就比怪秒殺左！





阿葉講左句：「我當堂嚇一跳，原來得啖笑！」

點知佢又回左句：「神經病！」

之後兩人開始互quote星爺電影名句：

「你本來係咪叫曹星星？」「朋友，你都係番火星啦」……

原來大家都係星爺fans，阿葉見呢個人幾有趣，就單刀直入邀請周星星入盟，周星星亦都好爽快地加入，就係咁簡單。





而同咪嚕第一次認識，就係奇岩城。阿葉平時冇野做就係奇岩城周圍了人傾計，岩嘴形就邀請入盟。葉見到咪嚕呢個女矮人一身新手裝備，就爆左句：

「普露普普露法米法米法！」

咪嚕完全冇理過阿葉。

阿葉見佢冇反應，好唔過癮，決定要繼續了佢：「咪嚕係咩意思？」

咪嚕都係冇反應。然後阿葉就不停係佢旁邊跳舞，又不停做進攻姿勢，阿葉係半獸人，做進攻姿態就係揮拳，而阿葉就專登教好角度不停揮拳打咪嚕塊面。終於呢d無聊舉動引起左咪嚕反應：





「我頭先掛緊網食野，聽到有隻獸人係咁叫，就番黎望下，點知你一叫叫左成半個鐘，你都幾無聊喎。」

「哈哈，原來你掛緊網。一個人玩悶丫麻，你平時一個人玩唔悶既咩？」

就係果日，咪嚕加入左紅樹葉。