【真人真事】當年中七AL，我打左成年天堂二，但我無悔！: 3-備戰

想攻城，就一定要做準備同理想世界開戰，以我地而家既裝備根本冇乜可能打贏。理想世界差唔多個個都用緊頂級S級既裝備，王朝甲，即係S級最強既防具都有幾件。而我地呢，最top果個，即係我阿葉，都只係用緊把A級既屠龍刀，A級既聖威甲，根本冇得打。

所以為左備戰，紅樹葉開始不停打王。我同樹每日都捕係d boss既身邊，一出現就吹雞call馬打boss，務求打多d寶物番黎增強各盟友既實力。又不時連同其他盟打大boss－－當然唔係我地唔夠打－－連同其他盟係為左增強同其他盟之間既聯繫，方便日後組聯軍！

而其他盟入面，同我地最老友果個，叫做「三聯幫」。我成日同佢地盟主"粒的"講笑話：「不如我開個分身叫山雞，你俾個毒蛇堂堂主我做。」

三聯幫同我地紅樹葉一樣，都係新興血盟而非魔界分裂出黎。唯一唔同既，就係三聯幫雖然叫三聯幫，佢地係標榜香港血盟，剩係收香港人，睇下盟主個名都知幾咁香港。亦正正因為咁，我同樹兩個人同佢地溝通都係用廣東話，所以特別friend。順便一提，前面提到既咪嚕同周星星，雖然我用左廣東話表示所有對話，實際上我地係用書面語溝通，佢地係台灣人黎架。

時間一日一日過去，我地依然繼續每日打王、團練備戰，表面上局勢依然未變，實際上各方勢力都開始蠢蠢欲動。





期間最大既事件就係「寶寶龍」呢個血盟攻佔領左「狄恩城堡」，一個名義上仍歸於魔界，但係無乜戰略價值同經濟價值既城堡，因為狄恩地區係新手區，人少，又冇乜收入。有趣既係，寶寶龍呢個咁香港既名，其實係唔關多多同海灘事，佢係一個台灣人領導既新興血盟，而佢最討厭既正正係三聯幫呢個標榜純香港人既血盟。係online game既世界，唔知點解總係有呢種唔知應該叫國家主義定種族主義既人存在。

寶寶龍佔領狄恩城，可以稱得上係名副其實既無血佔領。由宣佈攻城到真係攻城到打左落黎，理想世界連一粒聲都冇出過，自然地魔界亦唔會有人守城，寶寶龍一個人都冇死過就攻佔左狄恩。狄恩被佔，理想世界對此唯一既反應，就係將奇岩城易手，正式將奇岩由魔界歸於理想世界名下，而奇岩城正正係我同樹既攻城目標。

係我地籠絡盟友積極備戰既時間，覺得唔妥既咪嚕問左一個問題：

「點解平時我地可以打王打得咁順利？理想世界既人唔打王既咩？咁佢地d裝備點賺番黎？」

的確。平時我地見到最多理想世界既人既地方係邊到？亞丁、奇岩，兩個最多野賣，最多人擺攤既經濟重鎮。莫講話王，就連怪都好少見佢地打，係練功地點根本冇乜見到佢地。到今次狄恩被佔竟然都憬冇聲出？唯一最常見到佢地既地方，就係帝國墓穴，即係我地最初認識周星星，佢空身走黎走去既地方，亦係佢長駐練功既地方。





於是我問周星星：「你成日係帝國墓練功，有冇見開理想世界d人？」

周星星無回應，我唯有係血盟頻道同各位盟員討論。

「理想世界唔理狄恩，因為狄恩無稅收丫麻，平時都冇人去狄恩買野，狄恩種田d怪又低級，要黎都冇用。」
「其實佢地可能已經太有錢，根本唔洗再點練功。」
「問下戰神咪知佢地平時做乜囉。」
「會唔會理想世界其實都冇乜幾多人剩？」

盟入面大家都七嘴八舌，突然周星星密我(即係用私人對話)：「黎帝國墓，我俾d野你睇，叫埋樹過黎。」