【真人真事】當年中七AL，我打左成年天堂二，但我無悔！: 89-最後一場攻城戰 (二)
我軍一邊攻門，一邊攻水晶塔，沿途半點阻撓都冇，興鬆制霸，理想世界果真完全棄守－－幾座掌管復活、重生時間既水晶塔，以及城牆、外門、中門等地全部送俾我地。
我軍就如閃電般，一波攻勢就直接打入內門。
我不停問係廣場上守旗既紅：「出面有冇動靜？」
紅卻冇答我，佢剩係打左個喊露，問我：「咩話講多次？」
唔洗講，一聽就知出面拍緊烏英，即係話，理想世界唔守城之餘，連旗都唔拆。
棄城？冇可能。亞丁呢舊肥豬肉，就算佢地唔食都唔會讓俾我食。
唯一一個可能，就係佢地龜晒係內廳……
「佢地好可能全員守內廳，大家做好準備，近戰散開。」隔數秒，等眾人做好準備後，我就發號：「遠攻隊爆門吧。」
鵬！
所有魔法及弓箭同時放出，聽到既就只一下特別重特別響既爆破聲，左門就咁憑空消失。
影入眼廉，內廳依舊係一個人都冇……
但行入去，再行多兩步，望兩望，係封印室入面似乎隱弱見到理想世界既人影，仔細一望，一樓二樓合共四個門口，入面全部都係理想世界既人……原來佢地由頭到尾一直龜係封印室！！
我地就企係內廳，係敵軍射程範圍外，企定定。
但係理想世界眾人一樣冇意思出廳迎戰，即使我軍就係面前，佢地依舊龜縮。
分散爆破呢個戰略，最根本方針就係要將敵人分散。但呢一刻敵軍全數龜係封印室，全部集中埋一齊，仲分咩散？
「佢地龜係封印室。」我向電話報告。
「封印室！？咁仲洗唔洗守？我過黎喇！」紅似乎一早等到悶，一聽到消息異常興奮。
「唔好黎住，繼續守旗，等我地死番黎先。」我立即禁住紅，企係內廳，向大家命令：「我地照原計，四個門一齊衝，中間再穿牆入。」
好波，我不得不承認，好波。
理想世界最具優勢既，就係佢地人數唔少之餘，仲幾乎每個人都有贊助得番黎既強大火力同防禦力。
有咩方法可以將呢個優勢完全發擇出黎？廣場亂戰，難於指揮，容易被分散擊破，發揮唔到火力優勢。城牆上防守，可以容納既人太少，打擊面亦唔大，亦難以完全發揮優勢。城堡內戰鬥，戰場太大，防得呢到又要顧第二度，仲要防我地穿牆偷襲，一樣唔化算。
最能夠發擇火力、防禦力優勢既戰術係咩？
就係龜，完全唔迎戰，死守，將整個戰場完全局限係封印室。根本無視我軍任何戰略，佢地完全著眼係攻城戰最後，亦係最重要既步驟－－封印水晶。無論如何，我軍攻城方都要攻入封印室，無論如何我地都要用五分鐘時間封印水晶，而理想世界就直接龜係封印室，用佢地最強火力，逼我軍與之硬碰硬。
封印室有四個門口，但同紅所講既分散攻入完全唔同。以理想世界強大火力集中打擊四個門口，情況就如同封傳點一樣，被襲方根本冇可能反擊。就連穿牆都冇用，守護水晶一定佈滿大量近戰，一穿入去就會立即被圍死，
龜封印室死守，係最無聊、最無恥，卻最穩打札實、最能夠發揮戰力既戰術！佢地什至唔care三個水晶塔被破後，每次死亡都要八分鐘先可以重生，因為我軍根本做唔成任何損傷！
但儘管如此，我地都要闖。
呢一波我預左死，我只係想睇下佢地既應對係咪真係如我所想。
分配好隊伍，我就發號：
「準備好未？準備好數三二一就衝。」
………「三」……「二」……「一」……「衝！！」
眾人分成五大隊，共同往封印室直衝！而我就企係大廳中心留意一切。
只見四個門立時透出大量閃光，一陣白光紅光藍光紫光不停閃耀，魔法炸響既聲音，以及箭既爆擊聲音響過不停，封印室內隱約見到無數回血光柱，光影延續一陣，一切歸於平靜，剩我一個係大廳。
「你地就打算咁樣死守守到完場？」我就係皇座上，坐係到問。
韓修修單字回答：「係。」
「出黎送我番旗吧，我就坐係皇座上面，冇埋伏。」
蒼日：「想死就入黎送死，唔好咁多廢話。」
「連我一個人你地都驚？咁多把武器怕我一個人？無膽匪類！」
結果佢地連回都唔回。平時咁樣挑釁一番，光頭就算唔出手都會還口，但係今次手口都唔還，理想世界真係打算死守到底，點都唔出黎。
我就索性坐係皇座上指揮：
「近戰全部換做騎士，總之有三轉騎既就換晒出黎，唔理幾level！」
「神武俾定霸主，搵定巫師，睇錶，隨時準備計時開無敵。」
「控埋娃娃入城堡，要回血。」
「搞掂晒就入黎。」
一輪擾攘，又浪費左十幾分鐘，理想世界就係封印室內，就咁等左十幾分鐘，直到我地又齊人，佢地一粒聲都冇出，一支箭都唔發。
「紅你係邊？」
紅答我：「守旗囉。」
「頂，唔洗守喇入埋黎快。」我居然唔記得左電話旁既紅，但紅都居然睇住周圍既人係咁郁問都唔問自己要做乜。
其實我唔肯定理想世界係咪會串到連旗都唔拆，但呢一刻，我巴不得佢地出黎派一隊人出黎拆旗，分散得一隊得一隊。
真正齊人。我地成班人企晒係內廳，我Σα就坐係皇座上，懶理背後一班龜係封印室既敵軍，仿忽我先係城主一樣，下令：
「照頭先一樣沖陣，但騎士先打頭陣，我一叫衝，你地就開""魔法反射盾"、"物理鏡射"，暗騎開埋"還擊"，總之乜野反彈傷害技都開晒，然後就衝。莎莎數住秒，叫完衝後八秒即開"不滅之火"，應該夠保大隊入去，弓巫入去狂用掃場技清場，薰睇住時間開第二個無敵，之後用補帥補血，ok？」
魔法反射盾，就係反射魔法咁簡單，有效時間係八秒。霸主既無敵，有效時間十五秒，呢廿幾秒內如果順利送到弓巫團入去封印室，我地就有勝機。
待各位準備好，立即「衝！！」！
地獄連放三個技能就一馬當先，帶領一隊騎士，包括我控制緊，已轉職為騎士既葉，向一樓左門直衝！
踏入門口，第一步，迎面以黎就係無盡箭雨以及無盡魔法！橙汁加持下，地獄既血量維持近半，"魔法反射盾"果然有效，假如冇護盾，地獄剛剛踏入門口第一步就已經死左。
騎士隊無懼風雨，憑藉八秒反彈時間向前死衝，已經突破門口！我緊隨在後，眼見地獄既盾擊快要打上一名巫師既時候，光頭突然係二樓跳落黎，係葉面前出現，+1500大刀自天向地一揮，一記"壞滅衝擊"斬向門口，一樓左門頓成一片屍海！光頭隨即轉身，一刀欄腰斬下騎士半身，再使出"疾襲"跳到地獄身前，又係一刀，無視盾防一刀秒殺！
斬馬大刀完全無視盾牌既擋格，結果就連身穿戰神防具既地獄騎士都係一刀死，光頭開晒三狂，係左門口大發神威，僅僅八秒內，將幾名有幸衝入封印室既騎士全數秒殺，整個左門攻勢幾近瓦解！
後方小愛見到一片屍海，立即彈一句：「死左唔好走！我復！」
作為屍海一員，我當然唔會走。作為破壞者既玩家之一，我更加唔會走。+1500破壞者既破壞力，係呢個moment、呢個狹窄環境下，發揮得淋漓盡致，連我都未試過係攻城戰上如此威猛，如果光頭唔係敵人，呢一幕其實值得欣賞。
但光頭再強，面對霸主"不滅之火"，一樣要投降。一眾僥倖係"壞滅衝擊"範圍外逃過一劫既弓手巫師，眼見身上出現火環，立即勇者無懼再向前衝，延續攻勢，數個魔法球立即追住光頭狂丟，"箭雨"、"火焰之鷹"射向人群。
但出乎我意料之外，理想世界不閃不避，每食一擊就立即有數度光柱出現，敵軍補師充裕，似乎根本唔怕我方攻勢。
更讓我估唔到，係幾秒過後，一圈火光突然係理想世界眾人前出現，赫然又係"魔法陣-不滅之火"！一向唔太重視霸主既理想世界，見到我地幾次妙用，終於都學左番黎！
無敵對無敵，你眼望我眼，大家都停手。我軍順勢衝入封印室，倒數、計時，又係一個無敵，幾秒後，敵軍同樣地，又放一個無敵……
顯然，佢地都有兩個或以上既霸主。
但我地就只有呢兩個。呢一輪無敵完結後，意味住眾人要受幾秒鐘既屠殺，理想世界六、七秒鐘無敵時間，大概足夠將我地全員殺番旗。
「散開！搵安全位！」幾秒鐘內，我只夠時間打呢兩個字。
但眾人都知道情況，大家都知道呢一輪無敵消失後，我地要受幾秒任打先能夠反攻。為防備群攻魔法，大家都下意識保持散開，不過咁多人又可以散得幾開？
不滅之火既效果係畫面上不斷倒數，3……2……1……又係連珠炮般既轟炸！！
我方光柱從天而降，莎莎、小愛等人不停施放"連鎖治癒"，但理想世界攻勢猛烈，光柱都幫唔切，眾人遂漸倒下。
突然間，系統問我接唔接受復活－－係小愛既"團體返生術"，整個血盟一齊復活！
小愛仲催：「快，我要獻祭！」