【真人真事】當年中七AL，我打左成年天堂二，但我無悔！: 90-最後一場攻城戰 (三)
見到"獻祭"兩個字我先醒起，主教既最終技能，"崇高自我獻祭"，犧牲自我，恢復我軍的所有hpmp，再加15秒無敵！
主教呢個職業專職就係補血，連buff都冇多個，莫講話正服，就連私服入面都冇乜人會練，更加冇幾多人了解，就連我都唔記得左，所以係呢場戰入面，小愛隻主教係編制下只不過係娃娃之一，而且小愛一直都用緊巫師作戰。
偏偏呢隻娃娃就就係全服唯一一個滿級既主教，可以施展呢招冇人記得既大絕－－全軍復活、全軍滿血、全軍無敵。
小愛一招"團體返生術"，眾人立即按確定接受復活，然後小愛再高呼一聲，隨即倒地長眠，一道光芒卻憑空閃出，化成數十道光柱降臨到眾人身上，岩岩復活既我hpmp即刻升滿，並立時帶有無敵，終於到我軍反擊！
就連光頭都呆一呆，左門明明屍橫遍野，眨下眼既功夫居然全部起番晒身，身體仲帶有無敵火光！
「殺呀！！」紅呢刻似乎殺得興起，隨即係電話大叫！
復活既地獄，憑藉"貴族的祝福"，buff依然健在，企立係敵群當中，立即換出戰神把+1000雙刀，開啟"先鋒"攻擊型態，不停揮舞雙刀劃圈，打出"刀刃颶風"，以自己為中心造成範圍傷害！巫師們受斬，立時四散。
呢邊地獄係敵軍當中亂斬，二樓左門既紅卻恃住無敵，直頭企定定係向下方狙擊。地獄剛打散敵軍，紅就針住對方亂逃既紅光、橙光狙擊，一箭一件秒殺，連血都冇得回。
但呢種亂像只呈短暫，理想世界眾人好快反應過黎。
佢地並冇再放無敵，顯然理想世界亦只有兩個霸主咁大把。只不過，位於封印室中心，封印台上既幾個騎士，包括韓信，大吼一聲開啟"信念之盾"，立即保住台下一眾巫師弓手，紅既箭傷、地獄既刀傷、我軍所有火炮全數轉介到呢班騎士身上。
只見騎士們身上聳立無數光柱，腰間閃出無盡橙圈，韓信更加張開綠色既半圓防護罩"鐵壁陣勢"。牧師回血加上橙汁連按，再加上銅牆鐵壁，呢班騎士就算唔係無敵都相差不遠，我軍根本做唔成修害。
其他戰士亦頓時開啟各自既應急技能，"極限閃避"、"極限防禦"、"劍盾"、"靈魂屏障"等等開到一地都係，15秒無敵時間，居然硬生生，就咁被佢地撐過，小愛既犧牲完全白費。
隨著無敵火光消失，封印室又變成亂戰。一個手持黃光法杖，身穿重甲既霸主係敵群中衝出黎，黎手就係一個"絕望封印"駁"約束封印"，再接連一大串封印術如機關槍般施展……
我望住技能欄，一瞬間，我所有能力下降30%、回血魔法效果減半、無法移動、無法施展魔法、移動速度再降30%、中毒、…………
「霸主！中間！黃光！」我向電話狂嗌。
紅係二樓居高臨下，一早留意到呢隻霸主，我未講已經射左佢兩箭，一射完就屌一聲話：
「好撚硬喎！」
我立時明白，原來呢隻霸主先係佢地既秘密武器。戰場局限係封印室，範圍細，正好岩晒霸主放封印！我軍一攻入黎，就一定硬食霸主各種封印，+1500杖，唔洗審肯定係韓修修果把，用係霸主身上根本咩人都擋唔到。至於一身重甲，更好有可能係韓信套神防。
霸主難練，打怪冇乜貢獻，又樣衰，平時根本冇人會用。但講到打仗佢絕對係王者，一堆技能全部都係為打仗而生，紅樹葉多次靠霸主打勝仗，我地用得多，終於都俾理想世界抄埋，仲搞出呢隻逆天既神裝霸主……
我冒死向聯軍發送命令：「殺霸主，id"創世之神"！」
但係現場人又多，又lag，冇番紅咁上下眼力，要exactly點中你想要點既人之餘，仲想保命，談何容易？想打指令taget？我就係為左打上面呢句說話而戰死。
結果，霸主當然殺唔到。"創世之神"放完一輪機關槍式封印，又立即退入人潮，離開攻擊範圍，根本就打唔到佢。但身陷封印既我軍卻肉鎚針板上，+1500法杖施咒，就連+1000級別既都幾乎施乜中乜，普通玩家更加照單全收，我軍實力大打折扣。
我同樹一樓左右兩門一早已破，soso中心突襲更加唔洗講，只剩番二樓紫幽同紅。縱使紅依舊橫行無忌，死好命既佢只係中左"沉默封印"，冇得用魔法，而弓手係唔需要用魔法。但單憑紅一個弓手，又豈能逆轉局勢？紫幽右門被擊破只係時間問題，右門一破紅就命不久矣，一樣等死。
「呢波攻勢冇了，有命就走番黎冇命就死番黎，準備下一波，唔好晒時間」我同紅講。
口講準備下一波，其實下一波都唔知點打。
呢一波攻勢已經說明，我地攻唔入。
雖然成功用無敵衝入去封印室，成功殺死幾件巫師，但形勢依舊一面度，衝得入還衝得入，卻完全攻唔破佢地既防守。
而且，霸主無敵要冷卻要半個鐘，主教無敵冷卻一個鐘，換言之，下一波我地可能連衝都衝唔入。
「點打？」眾人心入面都問緊呢個問題，等侯我頒布指令，但冇人問出口。
只需要兩波攻勢，大家就心知肚明，呢場戰無得打。絕對既實力差距擺在眼前，所有人心入面都知道，只有理想世界先有實力擺得出呢種龜陣，一個無得打既陣勢。
如果呢個時候我話撇，閃人，肯定毫無異議。
但我唔會。
「艾爾，入大廳，屌佢老母。」
艾爾唔明白，問：「屌咩老母？」
「就係屌佢老母囉，成批神裝走去做龜仲唔抵屌呀？反正我地要等無敵cd，都冇野做，咪屌佢老母囉。」
眾人哇然：「下？」
大家都明白，我從來都唔鐘意嘈交，罵戰一開始我就係第一個閃，更莫講話主動挑起罵戰。但係今日我身先士卒，第一個係白頻開炮：
「你班人火力又強過我地，擋又好擋過我地，都仲要匿係入面做縮頭烏龜？羞唔羞家呀？嬴左都唔光彩啦，成個服都恥笑你呀！尤其你個光頭，日日話要隻抽，而家我就同你隻抽，係男人既同我出黎打過！」
艾爾見我黎真，就唔理咁多屌埋一份。
我繼續：「黎黎黎大家一齊聲討佢，恃人多塞住封印室門口唔俾人攻城，邊有人咁打架，你再狗D丫笨！」
講係咁講，事實上我地仲多人過佢。
盟內幾個心水清既，明白我做緊乜野，都開始屌埋一份。
我做緊乜？又係諸葛亮同司馬懿，只不過今次身份調轉，我先係諸葛亮，佢地係司馬懿……小亮第五次北伐，去到五丈原，面對死守不應戰既司馬懿，諸葛亮都冇晒佢乎，送件女人衫俾佢想串佢激佢出黎，結果司馬懿採佢都有味，終於拖左百幾日拖到小亮病死、退兵，司馬懿就係咁龜城龜到打勝杖……
我只希望理想世界冇司馬懿咁忍得。
重點挑釁對象，當然係光頭。
「你想幾打幾都得，就係大廳等你！廢柴次次打都輸，俾個機會你報仇都唔夠膽報呀？」
「做男人做到你咁真係冇癮！男子漢大丈夫，日日俾個老婆騎住，女上男下UNUNUN，打輸左有冇番去叫媽咪幫拖？」
「蒼日呢係邊到？理想世界原來係啞人集團黎，GM有冇派傷殘人士津貼俾你地？頂，唔怪得知你地咁好打啦！」
不停地挑釁，理想世界結終唔還口，由得我地係咁屌，無視任何挑釁，總之就係死守，唔出聲，亦唔接戰。
「死光頭咁鬼無膽，抵你成世俾個癲婆騎住！」
呢一刻，我及弓手隊、暗天使隊兩大隊佈係大廳，大廳後方就係封印室，方便佢地一出黎我地就全速逃走。近戰、巫師團分別係大廳入口出面既走廊位、大廳二樓暗角位等做埋伏。攻城陣地上，只有一隻娃娃監視。
……「而家出面支旗冇人架，唔好話我唔提你，而家唔拆以後冇機會喇！」
我向同盟頻下令：「紅樹，你地兩隊四圍搵下有冇bug位可以偷射佢地。」
……「喇，講埋俾你聽喇，我地而家就班緊霸主番黎，等陣十幾個無敵係咁LOOP，你地咪繼續死守囉。」
又向盟內問：「有冇自願小刀肯隱身入去送死？埋到光頭身就插佢，埋唔到身就求其搵蒼日、華雄果d是但插件，係咁煩佢地。」
……「真係鄧你地可憐，個盟主俾人鬧都豬頭都唔還口，俾你嬴到個城都冇晒尊嚴啦，亞丁送俾你地當可憐你啦。」
暗殺、煌、風聲鶴唳、暗影殺手……等幾個高級行者立即報名。
「仲有乜野煩招可以煩到佢出黎打過？」我向盟內問。
「用召喚師搞佢。」恰恰又俾左個提議。
「小草，香草，麻煩幫幫手。」香草同小草係兩個人，香草全名"香草蕾絲"，咁岩同小草一樣又係玩召喚師，盟入面主職玩召喚既唔多，用召喚師參戰既更少，只有呢兩個。
然後樹提議左一個更煩膠既方法：「全世界用巨集，係咁邀請光頭呀韓修修果d做好友囉，每五秒一次。」
最終，煩不勝煩既韓修修、光頭、蒼日等，幾乎出名既都加晒我地盟員做好友，加到好友名單滿埋，我地冇得加佢好友……
面對一連串煩膠突襲，韓修修終於開腔回應：「你地真幼稚。」