【真人真事】當年中七AL，我打左成年天堂二，但我無悔！: 88-最後一場攻城戰 (一)
戰神呀戰神，我真係望唔透。
當晚討論既結果，就係「戰神目的係賺錢」係一個冇漏洞而又合理既推論。呢個唔係我想見到既結果，因為我係想用反証法，由「戰神目的係賺錢」做起點，一直推導，直到出現一個與現實不符合既結果，一個矛盾點，咁先可以証明「戰神目的係賺錢」呢個理論係錯誤。奈何，根本就搵唔到所謂矛盾點，最終我只好接受呢個假設。
講完戰神，我地就開始講攻城大計。
今次唔同以前，以前無論實力差距幾多都好，終究不過係幾個神級玩家帶住一堆同我地同級既嘍囉，嘍囉先係多數，係戰場上既主角，所以無論幾神都好一樣有得打。
但而家，係幾個神級，帶住一大堆神級，嘍囉居然變成少數，同以前根本係兩個概念。再加上防守先天就比主攻容易，防守既計劃我有好多好多，但論攻城，無論有幾多計劃，最終都要上封印台封印，最終都有"絕望的五分鐘"，最終，都係一場硬戰，係實力至上既硬戰。
我真係諗唔到點打。
紅樹葉三人傾左一陣都冇咩計謀，只好破天荒，直接係同盟頻道討論攻城計劃，希望集思廣益，尋求良計。
雖然同盟頻道上平時都係一堆嘻笑怒罵，但大事一搬上台面，大家都正經起黎，個個都講到有文有路－－縱使係一堆爛計，一聽就知唔可行既爛計。
一連ban左數十條橋，係云云爛計當中，卻獨有一個計劃，一聽就知有料到，係由壬生一族盟員"恰恰"提出既「分散爆破」。
計劃好簡單，名字已經說明左一切，就係將理想世界軍力分散，我軍揀選防守較弱既部份，集中火力進行爆破。呢個絕對唔係乜野石破天驚既雄才偉略，基本構思同紅樹兩人第一次係奇岩打遊擊戰，將敵人兵力拉散後再集中火力打擊有點相近。
但呢個戰略獨到既地方，在於恰恰一句「要分散，就要用分身擾敵」。
恰恰既意思，係每人都用分身，雙開什至三開，將我方攻城人數憑空擴大，再由前後左右四方八面包圍式進攻亞丁城堡，但實際上全部都只係分身佯攻－－所有進攻部隊既目的都在於分散敵軍兵力。
－－假如敵軍中計，真係分散兵力進行全方位防守，咁每一點既防守力自然散簿，我軍就可以集中主力部隊定點爆破打入城內，勝率自然提高。
－－假若敵方唔分散兵力，自然會有防守盲點，到時進攻該盲點既分身部隊就搖身一變成為主攻部隊，直接係缺口爆破，後方主力立即支援。
到攻入內層後，照辦煮碗，亞丁三層防守都可以用同樣方法分散對方兵力打入去。
一輪商討，同盟裡面包括紫幽及紅樹，大家都認為呢個方法可行。
紅更加立時擬出進階方案：「攻封印室果陣我地四門進攻之餘，再係後面穿牆，似乎都可以用同樣做法分散佢地既，破左水晶塔先既話封印亞丁就有望。」
我一直保持沉默。
無論幾多人贊同都好，呢個計劃實際上有問題－－到底有幾多人部機好似我咁勁？攻城戰三開都唔lag？而且，最後果絕望的五分鐘，到底要點挨？計劃冇比到答案，但我亦冇提出問題。
因為根本冇人答到。
而且，呢個方略，已經係我地幾個鐘頭入面唯一一個比較可行既方法。我地就只剩下呢把刀，哪管佢生銹都要照用。
樹問我：「諗好三把+1000點用未？」
「弓歸你，矛歸我，雙刀俾地獄，多套防俾暗殺，完美。」
地獄同暗殺，兩個都係紅樹葉老臣子，贊助武器既事一早清楚晒，要買都一早買左，我相信佢地唔會因為呢套「試玩板」上癮。
忽然間，我醒起，呢個咪就係漏洞！？立即同樹講：
「戰神明知我懷疑佢係sales，仲點會借我手俾試玩板人？佢明知我一定會俾肯定唔買既人用，最終佢既目的就一定達唔成，咁呢個行為咪即係冇意義！」
樹一聽，卻語帶諷刺：「你唔係好假咁同佢道左歉？點肯定戰神『明知』？你呢個唔係漏洞，係猜包剪dup。你明知我會出包，於是出剪，我明知你明知我會出包於是出剪，於是我出dup，沒完沒了。可能戰神『明知』你會咁諗，所以特登借你以表清白？see？呢個方向諗落去冇得完。」
樹有樹既道理。
星期日，七點五十五分，亞丁攻城戰仲有五分鐘就開波，我地一眾人早已聚集係亞丁廣場外等侯。
戰神卻仍未見人，無論係輸贏定價值都一樣唔係到。
紅抱怨：「戰神仲唔出現，唔係又唔知醒下話…」
我倒無乜感覺，戰神三把武器三套防具都係晒我到，佢黎唔黎都冇乜所謂，除非佢又整多把－－如果可以既話，以佢既性格肯定每件武器都整套+1000，一早就有齊，點會都今日都係得三把？咪住……又或者，佢一直都有咁多把，但係一直冇show過出黎？又或者……
我拍拍自己塊面。
大戰當前，我唔應該諗咁多。
現場每個人都按照恰恰既計劃，唔理雙開三開四開總之開得就開，夾夾埋都唔知有幾多人，只見一片密密麻麻既人海，早已成包圍之態，係戰場外一直守候。
咁多人既場面，就連我都係第一次見。
八點正，系統宣讀亞丁城戰開始，眾人立即上前踏入戰場。
但係呢個計劃一開始就失敗左。
或者話，一開始就成功左？我都唔知。
就連我既擔心既lag機問題都係多舊魚。
因為對面既亞丁城堡，無論係城牆上、城門前、以及廣場上、以致前後左右，根本就一個理想世界既人都冇。分乜野散爆乜野破？我地七點半集合，一直到而家八點鐘，半個鐘頭內除左自己人，連鬼影都唔多隻，根本唔洗分已經散晒。
本來大家以為系統宣告開戰既一刻，理想世界眾人就會係城堡殺出，又或係唔知邊到發動奇襲，一早已經做晒作戰準備。結果開戰一分鐘，莫講話奇襲，就連守城都冇人。
空城，亞丁城堪依就係一個空城。
面對如此奇景，連地獄都呆一呆，企係到問：「空城計？諸葛亮？」
無論對面係唔係諸葛亮都好，我地倒個個表現到好似司馬懿一樣，面對空城反而卻步！
一向死衝既艾爾呢一刻都只係企係大軍中，唔敢行前半步。
「唔洗理佢，插旗先。」我同紫幽分別控制Σα及Γπ，亦即係紅樹葉及狼來了既盟主，揀左一塊風水寶地，就開始"召喚攻城陣地"。
由開始召喚，到插完旗，幾分鐘既時間，理想世界、日殺兩盟依然一個人都冇出現過。
我用聯軍頻道命令各隊長：「巫師、行者先行頭，睇隱身睇陷阱，弓手保巫師，其他人隨後，慢慢收窄包圍網，紅睇旗。」
聯軍頻道係聯軍隊長專用既頻道。佢最好用既地方就係可以選舉只俾隊長聽，定俾晒戰場上所有人聽。而且佢有別於一般頻道，聯軍頻道既說話唔係顯示係對話欄，而係一行白色標階體大字直接係畫面出現，聽睇唔到都唔得。
我命眾人：「小心睇路。」
其實呢句係有少少多餘。因為既然旗已經插左，反正死完就係陣地復活，我地根本唔驚埋伏，只要夠人守旗以防陣地被偷爆就得。但所謂小心駛得萬年船，面對「空城計」，都係小心為上。
結果，"閃光術"、"看穿陷阱"等等全部都係得個吉，對面真係乜野埋伏都冇，呢個空城居然係貨真價實既空城！理想世界竟然真係冇人守城！
望一望錶，已經係八點十二分，心裡面一陣粗口閃過：「屌，咁就浪費左十分鐘！真係多舊魚！」
我生平最恨浪費時間，而我居然因為自己一個多餘指令浪費左十分鐘。
「後方既穿牆入內城拆門先，前面既唔好行黎行去晒時間，直接打面前既牆同門，爆晒去。」
我軍有贊助武器，破牆破門不過係幾十秒內既事，即使係亞丁呢個俾錢強化左既城牆城門都敵唔過贊助武器，一陣風般我軍已經突破正門，準備沖入內城。
「小心埋伏。」我再提一提打頭陣既盟員，自己就龜係後方食花生。
但結果又再証明，就連呢句提醒都係多餘。
外城冇人就算，理想世界居然連內城都冇人，連中門都係零防守！
「會唔會連水晶塔都冇防守？」我心底懷疑，立即命令：「地獄你帶隊爆外城水晶塔。」
然後，幾分鐘既時間地獄就傳來捷報，連外城水晶塔都冇人守……